Särsenbi, 16 Qazan 2019
Öziñe sen 1332 0 pikir 14 Qırküyek, 2017 sağat 12:37

Tuğan jerge tuın tikti

 

Tayauda Almatı qalasınıñ Naurızbay audanında №36 qalalıq emhananıñ twsauı kesildi. Eñ qızığı, emhana memleket tarapınan emes, belgili käsipkerdiñ öz qarjısına twrğızılıp, sosın qarapayım jwrtşılıqtıñ qoldanısına berildi. Bwl isin Elbası Nwrswltan Nazarbaevtıñ «Bolaşaqqa bağdar: ruhani jañğıru» maqalasındağı «Tuğan jer» bağdarlaması ayasında arnayı jüzege asırğan käsipker – Tavabir Hayrullawlı.

Aşılğan künnen bastap mekeme qaladağı eñ mıqtı emhanalardıñ qatarına enip ülgerdi. Sebebi, ol europalıq standartqa säykes zamanaui qwraldarmen jabdıqtalğan jäne joğarı därejeli mamandar qızmet etedi. Kardiolog, pediatr, allergolog, mammolog, urolog, terapevt dep tizbektep kete beretin qajet mamandardıñ bäri bar.

Jaña emhananıñ tağı bir erekşeligi – ärtürli äleumettik toptardıñ müddesiniñ eskerilgeni. Mümkindigi şekteuli jandarğa arnayı sırğıma baspaldaq, jedelsatı men sanitarlıq toraptar salınğan. Olar emhananıñ tört qabatında da bar.

Ädette, emhanağa kelgen emdeluşilerdiñ biraz uaqıtı tirkelip, kezek aluğa, därigerdiñ qabıldauına jazıluğa ketip qaladı. Mwnda onıñ bäri elektrondı türde. Kündiz-tüni qızmet etetin call-centr, sonday-aq nauqasqa jedel kömek körsetuge arnalğan brigada jwmıs isteydi. Özderi jürip-twra almaytın emdeluşilerdi oñaltu üşin aşılğan arnayı kabinet te bar.

Qanday da bir derti bastalıp kele jatqan kezinde anıqtau onıñ tez äri qwlan-taza ayığıp ketuine äser etedi. Osı twsta twtas ağzanı UDZ-diagnostikadan ötkizu äli de bolsa tekserudiñ eñ tiimdi täsili bolıp otır. Alğaşqı därigerlik kömek körsetip qana qoy­may, emhana sonımen qatar Naurızbay audanındağı skriningtik ortalıqqa aynaldı. Tik işek pen asqazanda endi ğana payda bolıp kele jatqan qaterli isikti zertteu de osı ortalıqta jürgiziledi. Keude men iş rentgen diagnostikası öz aldına bölek aşılğan.

Emhananı twrğızğan «Zavod ELEKTROKABEL'» JŞS Direk­torlar keñesiniñ törağası Tavabir Çikaev bwğan deyin de talay qayırımdı is jasağan. Atap aytqanda, özi tuğan Almatı oblısındağı Töle bi auılınan ülken meşit pen mıñdağan adamdı jwmıspen qamtığan zauıt saldırğan. Sonday-aq Issyk balalar men jasöspirimder futbol klubınıñ jas sportşılarına twraqtı türde qoldau jürgizip keledi. Biz ol kisimen jüzdesip, tildesudi jön kördik. Wltı bölek bolsa da, ağamız öziniñ osı elde tuıp-öskenin maqtan etetin jäne tuğan jeri men otandastarına beyjay qaramaytın bolıp şıqtı.

– Tavabir Hayrullawlı, emhana saluıñızğa ne türtki boldı?

– Kompaniyamızdıñ Almatıda qwrılıs jwmıstarımen aynalısıp kele jatqanına on şaqtı jıldıñ jüzi boldı. Negizinen, twrğın üyler men qosalqı stansalar salamız. Elimiz boyınşa eñ birinşi bolıp SIP, kabel'di äue jelilerin şığardıq. Qala äkimi Bauırjan Baybek käsipkerlerdiñ basın qosıp, «Tuğan jer» bağdarlaması ayasında keybir äleumettik mañızı bar nısandardı saluğa demeuşi boludı wsınğanda onı birauızdan qoldadıq. Söytip, özim Naurızbay audanına eñ qajet bolıp twrğan emhana saludı wyğardım. Audan halqınıñ sanı künnen-künge ösip kele jatqandıqtan, bir medicinalıq ortalıq qajet edi. Sözimizde twrıp, bir auısımda 500 adamğa qızmet etuge layıqtal­an emhana twrğızdıq. Eñ aldımen, mwnı süyikti qalamızdıñ twrğındarı üşin istedik. YAğni, medicinalıq kömek qoljetimdi bolsın, audan twrğındarı emdelu üşin alısqa sabılmasın dedik. Qwrılıs qısta jürdi, biraq sapalı äri ädemi boluı üşin barımızdı saldıq. Ärine, Alla eşkimge dert bermesin, biraq ömir bolğan soñ, auırmaytın pende joq. Sol kezde nauqasqa bar jağday jasalğan jaña, qoljetimdi, zamanaui emhana mine, dayın.

Emhana qaşan qalanıñ qaramağına beriledi?

– Endigi berilip qoyğan. Biz qazir is jüzinde de, zañ jüzinde de emhanağa eş qatısımız joq. Alayda qwrılıs jwmısına baylanıstı densaulıq saqtau salasınıñ ökilderi kelgende eşqaysısınan jaltarğanımız joq. Sebebi, onıñ tolıqqandı jwmıs istep ketui – eki jaqqa da ortaq mäsele. Medicinalıq jabdıqtar jetkizu, jalpı qwrılıs barısında kem-ketikter bolıp jatsa, barınşa olqılıqtıñ ornın toltıruğa tırısamız.

Qazaqstanda tuıp-östim. Bwdan basqa Otanım joq. Sondıqtan öz elimniñ twrğındarı, otandastarıma arnap emhana twrğızu – men üşin parız ben maqtanış. Osı sebepti, Naurızbay audanındağı 500 adamdıq emhananı biz saldıq dep wyalmay ayta alamın. Meniñ oğan tikeley qatısım bar. Basqarma basşısı Uälihan Ahmet­lı ekeumiz birneşe ret emhananı kördik. Ondağı maqsat – emdeluşiler men qızmetkerlerge jaqsı jağday jasau. Mağan ol kisiniñ är närsege bayıppen qarap, özin qarapayım wstaytını wnadı.

– Osığan deyin qaladağı meşitterdiñ birin, sportzalın, futbol alañın saldırdıñız jäne eşqaysısın mindet qılmadıñız. Mwnıñ bärin parızım dep bilesiz be?

– Elbasımız Nwrswltan Nazarbaev öziniñ «Bolaşaqqa bağdar: ruhani jañğıru» maqalasında «Käsipkerler men şeneunikterdiñ Otanın ispen demeytin kezi keldi» degen bolatın. Meniñşe, bwl – qalıptı patriottıq tilek. Öz elimniñ patriotı retinde mwnı dwrıs sanaymın. Osınday eli üşin köp närse istegen Elbasınıñ barına rizamın. Şınında biz siyaqtı qala, el biznesmenderi täuelsiz Qazaqstanğa alğıs bildiru üşin bir närse isteuimiz kerek. Bwl – parızımız. Osı rette «Ruhani jañğıru» qazaqstandıqtardıñ sanasın sergitip, el bolaşağınıñ damuına türtki bolatınına senimdimin.

Qayırımdı is-äreketterdi eñ aldımen, Alla razılığı üşin, sosın tuğan jer men onda ösip kele jatqan jas wrpaq üşin isteu kerek. Halqımız qaşanğı em izdep şekara asadı? Jaqsı därigerler, bilimdarlar men öz isiniñ mamandarı bizde de bar. Densaulıq saqtau salası jaqsı damıp kele jatır. Jaña medicinalıq mekemeler salınıp, erekşe operaciyalar özimizde de jasalıp jatır.

Kämşat ESJANOVA, emdeluşi:

– Jaña emhana bizge wnadı. Mwnda tirkele sala därigerdiñ qabıldauına jazıldım. Osığan deyin Aqjar auılındağı emhanada tirkelgenmin. Ol jaqqa baru, äsirese, saraptama tapsıru kezinde öte qiın boldı. Erte twru kerek, onıñ üstine, qalanıñ sol böliginde keptelis öte küşti. Jartı künim ketetin. Qazir raqat, emhana üydiñ qasında, öte ıñğaylı, äsirese, qarttar men balalarğa. Bizge osı emhananı salıp berip, qayırlı is jasağan mecenatqa şın jürekten alğıs aytqım keledi.

Meruert KÄRİBAEVA, emdeluşi:

– Biz otbasımızben mwnda tirkelip qoydıq. Emhana ğimaratınıñ aumağı ülken, zamanaui qwrılğılardıñ köptigi quantadı. Onı paydalanatın mamandar da jetkilikti. Qala äkimine, osı emhananı saldırğan käsipker ağamızğa, onı jüzege asırğan ärbir azamatqa raqmet aytamız. Qaltası qalıñ azamattardıñ halıqtı oylay bastağanı quantadı. Biz osığan deyin onday adamdardıñ meşit, sport alañdarın saldırğanın estisek te, emhana twrğızğanın birinşi ret wşıratıp twrmız. Bwl – jaqsılıqtıñ nışanı.

Berik Amanhan

Abai.kz

0 pikir