Düysenbi, 22 Säuir 2019
Aymaq 2711 2 pikir 18 Qañtar, 2018 sağat 09:56

"Tobol" üşin qor bolğan qayran baylıq?

Elimizdegi futbol klubtarınıñ jayı baspasöz betinde jii qozğalatındığın aytsaq, asa qatelese qoymaspız. Onda da mwndağılardıñ şeber oyındarınıñ tañ qalıp, auız aşqandıqtan emes. Mwnday quanışqa jaqın arada jete qoymaspız. Jalpı bizdiñ jigitterdiñ europalıq nemese amerikalıq ayaqdobşılarmen bügin-erteñ tügili, neşeme jıldardan keyin de taytalasa, teñ oynauı tañğajayıp ertegi tektes dünie şığar.

Jalpı, kezinde bizdiñ klubtardıñ europalıq futbol ligasına müşe boluınıñ özi öreskel qatelik demeske lajımız joq. Kezinde mwnı futbol sportınıñ talay-talay maytalman mamandarı ayttı da. Alayda onı estitin qwlaq bola qoyğan joq. Biz qanşa degenmen aziyalıqtarmız. Onıñ üstine futbol bizde anau Franciya nemese Argentina sekildi elderdegidey dästürli sport türi emes. Demek, jaqın arada olardı quıp jete almasımız anıq. Biletinder «Au, aldımen biz Aziya futbol ligasına kirip, äbden şıñdılap alayıq. Sonda şeberligimizdi tanıtıp, közge tüselik. Mıqtap tanılğannan keyin ğana Europağa wmtılayıq» degenin de eşkim qwlağına ilmedi. Mine, endi «europalıq bolamız» dep düyim jwrtqa mazaq bolıp, külkige qalıp jürgenimiz. Wtılmağan komandamamız joq. Oyındarın körip otırıp, jerge qaraymız, Al otır ğoy mına qırğız, özbek, türkimen bauırlarımız «biz ayrıqşa halıqpız, biz qaydağı artta qalğan azyalıqtar emespiz, biz kökiregine nan pisken europalıqtarmız. Közderiñdi aşıp qarañdar» dep bosqa dandaysımay-aq.

Bwl äñgimeniñ bir jağı bar. Al onıñ ekinşi jağı osı barlıq oblısta tek qana sol öñirdiñ atın şığaru üşin qwrılğanday äser qaldıratın qaptağan futbol klubtarınıñ qarjılandıru jağdayı. Olardıñ bir emes, birneşe milliard teñge qwraytındığın eşkim de joqqa şığara almas,. Alayda naqtı bir klubtıñ, sol oblıstıñ byudjetinen naqtı qanşa milliard alatındığın eşkim de bilmeydi. Ol äskeri qwpiyadan da jaman qorğaladı. Mäselen,  bizde «Tobol» futbol klubı bar. Mwnıñ da byudjetten qanşa alatındığın müldem habarsızbız. Jurnalister sol futbol klubınıñ basşılarınan da, tipti oblıs äkiminen swrasa da,  jauaptan taysaqtap ketedi. Sondağı tauıp aytqandarı: «Onı nemenege swraysıñdar? Bizden de köp alatındar bar emes pe?» dep qwtıladı. Bayağıda bireu «Men ne deymin, dombıram ne deydi?» degen eken. Bwl da sonıñ keri.

Ayptaqşı, oblıstıñ futbolşılarına jılına halıqtıñ aqşasınıñ qanşası jwmasalatındığı jaylı osında äkim bolğan Şökeev te, Kulagin de, Säduaqasov ta tis jarmadı. Qazirgi Mwqanbetov te bwl saualdı wnata qoymadı. Ol da klubtıñ qarjısın qwpiya wstauğa degende mıqtı tabandılıq tanıttı. Sirä, bwl bir kezderi özi basqarğan Aqtöbede  qanına siñip qalğan ädet bolar. «Osı qomaqtı aqşanı halıqqa jariya qılayıq, qanşa degenmen bwl solardıñ qarjısı ğoy» dep dauıs kötergen deputattı da köre almay otırmız. Sirä, bwl olardıñ oblıs äkimderin wyatqa qaldırmayıq deytin asqan sıpayılığı şığar. Mädenietti bolğanğa ne jetsin, şirkin. Al  bizdiñ «Toboldıñ» qolı aşıq, wsaqtığı joq, mırzalıq tanıtqanda aldına jan salmaydı. Mäselen, futbol mausımı ayaqtalğan sättegi quanışın bölisemin dep bergen tüski ası jartı million teñgeden asıp jığıldı. Osınşama orasan qarjı bir sättik tamaqtarına da jwq bolmadı. Mwnıñ qalay degen sport basqarması da joq, klubtıñ jan degendegi jalğız iesi oblıs äkimi de jaq aşqan emes. Endi  «Almatıda joq, joq, Astanada joq, joq, Qostanayda joq, joq» dep ändetu ğana qaldı.

Alayda sol mädeniettiligimizdi tüsinbeytin, söylep qalğan auzına ie bola almaytındar da bar. Mäselen, tübi afrikalıq bolsa da Londonda tuıp-ösken, al qazir Qarağandınıñ «Şahterinde» oynaytın Korede Ayegbusi degen qara bala «Men kezinde AQŞ-ta, Germaniyada, Finlyandiyada, Şveycariyada, tipti Iranda da oynadım. Qazir Qazaqstanğa keldim. Mwnda mağan älgi atalğan elderden äldeqayda köp aqşa töleydi» dep qarap otır añqauım. Endi bwğan ne deysiñ. Eger Astana men Almatı sekildi bay manaptardıñ klubında emes, qatardağı oblıstardıñ birinde oynaytın futbolşı Europa men Amerikadağı ayaqdopşılardan anağwrlım köp alsa, tipti aytatın söz taba almaydı ekensiñ. Bwl degeniñ halıqtıñ aqşasın dalağa şaşumen birdey dünie emes pe. Onı aytasız, älgi qara bala «Men biraz qor jinap alğan soñ, osı Qazaqstanda biznes aşamın» dep aydı aspanğa bir-aq şığardı. Endeşe köp wzamay anau Maşkeeviç pen Şodievtardıñ qatarına tağı bir bay-manap qosıldı dey beriñiz. Olar da kezinde äkesinen qalğan düniemen bayımağan şığar.

Bir qızığı, şetelden kelgen legionerler elinde üyrenip qalğan ädetimen «bardı bar, joqtı joq» dey saladı. Birde bizdiñ «Toboldıñ» oyınşısı çehiyalıq Eton Vuh «Mwndağılar bizdi wnatpaydı, köbine qırın qaraydı. Bizdiñ köp aqşa alatınımızdı biledi. Al özderi kedey twradı. Sondıqtan şığar», - dep salğanı bar.

Keyde şetelden şaqırğan legionerlerdiñ arqasında osılayşa dımdı bilmesek te, ımdı biletindey jağdayğa jetip qalamız. Bwğan da şükir.

Jaybergen Bolatov, Qostanay

Abai.kz

 

  

2 pikir