Düysenbi, 16 Qırküyek 2019
Bizdiñ şeneunik 4238 4 pikir 6 Aqpan, 2018 sağat 09:33

Mwğalim statusı zañmen qorğaluı kerek, Sağadiev mırza!

Asa mərtebeli Bilim jəne ğılım ministri E.K.Sağadiev mırza!

Sizge jəne Siz basqarıp otırğan ministrlikke degen qara halıqtıñ qazanday ökpesin jetkizem be degen oymen qolıma qalam alıp otırmın. Men Atırau oblısı Qızılqoğa audanı Qarabau orta mektebinde 37 jıl orıs tili jəne ədebieti pəniniñ mwğalimi bolıp eñbek etken, mektep basşılığınıñ ər türli satılarınan ötken, qazir zeynet demalısındağı adammın. Soñğı kezeñde (Siz basşılıqqa kelgennen keyin) jalpı bilim beru salasında jasalıp jatqan sansız eksperimentter (təjiribe dep aytuğa kelmedi) oquşılardıñ da, mwğalimderdiñ de, ata -analardıñ da orındı narazılığın tuğızıp otır.

Birinşiden, Sizdiñ ministrlik wsınıp otırğan jaña bağdarlama oquşılardıñ jas erekşelikterine say negizdelmegen. Oğan mısal, Siz qazaq mektebine arnalğan 1 sınıptıñ oqulıqtarın qolıñızğa alıp, işin aşıp, oqıp kördiñiz be? Ne bayqadıñız? Birinşiden, oqulıqtar öte ülken, kölemdi jasalğan, yağni salmaqtı. Oqulıqtardıñ bəri de birdey kölemde, yağni mektepke arqalaytın ülken sömke de balağa şamadan tıs auır. Hoş, endi osı oqulıqtardıñ işine üñilelik.

Q.Q.Baytenova, A.A.Jakeeva, E.N.Popova, Ş.K.Sauqatova, J.M.Seytahmetova, L.L.Ufimcevalardıñ avtorlığımen şığarılğan "Dünietanu" oqulığına üñilelik. Mektepke barğanına bar joğı 15 kün bolğan balağa üyge berip twrğan tapsırmasın qarañız: "Men kimmin?" degen taqırıpta əñgime jazıp kelu. Mektepte bas-ayağı 15 kün oqığan qay bala bwl tapsırmanı orınday aladı, asa bir vunderkind bolmasa, ministr mırza?

Tağı osı oqulıqtıñ işinde qarap otırsam, 1 sınıpta oqitın nemereme ğwndar taypası turalı tüsinik berilip, sol mətin boyınşa swraqtar qoyılıptı. Ğwndar turalı material qay sınıpta oqılatının tarihşılar biletin bolar, Siz ben bizge aytu qiın. Au,ağayın, ol oquşımız keşe ğana, eki ay bwrın balabaqşadan şıqqan səbi ğoy əli, ol turalı avtorlar wmıtqan ba? Mümkin bwl swraqtı ata-analarına qoyu kerek bolar?

G.Ş.Jaqıpova, N.V.Orehova, N.V.Lebedeva, S.I.Uaqbaeva, A.S.Mwqaşeva avtorları bolıp keletin "Matematika" oqulığındağı esepterdi şığaru meñgerui orta deñgeydegi oquşılar üşin öte qiın. Tipti sol oqulıqtağı "Səule nwrımen esepti şığaru" degen taqırıp meni tığırıqqa tirep tastadı.

Meniñ aytayın degenim, oqulıqtar memlekttik standartqa say kelip twr ma? Olar aprobaciyadan ötken be? Siz "iə" deysiz, jauabıñız dayın. Ötken bolar, Almatınıñ 4-5 mektebinde, onda da elitalıq mektepterde. Solay ğoy, al qarapayım jalpı bilim beretin mektepterdegi balalardıñ, olardı oqıtatın wstazdardıñ mümkinşiligi eskerilmegen. Oqulıqtardı jazatın oqımıstılar mektepte jwmıs jasap körmegender, tipti mwrındarına mekteptiñ iisi barmaytındar. Olarğa oqulıq qwrastırıp ötkizip, aqşasın qaltağa bassa boldı, al oqulıqtıñ sapasımen şaruaları joq. Oqulıqtı Ibıray Altınsarin, Ahmet Baytwrsınov, M.Lomonosov, L.Tolstoy siyaqtı taza mwğalimder jazuı kerek. Sonda ğana oqulıqtıñ mazmwnı oquşığa meylinşe jaqın boladı. Esiñizge tüsiriñizşi ministr mırza, Halima Bekmwhamedova, Rafika Nwrtazina siyaqtı wlı wstazdardıñ jazğan oqulıqtarınan qanday qiındıq kördiñiz?

Ekinşiden, Siz jəne Siz basqarıp otırğan ministrlik öte asığıs, oylanbay jasalğan qadamğa barıp otırsızdar. Jañaşa oqıtu jüyesine köşip, barlıq mektepterge elektrondı oqıtuğa köşudi mindettediñiz. Internet jüyesimen qamtılmağan qanşa auıl mektepteri bar ekenin ayta alasız ba? Ərine, aytasız. Biraq ol məlimet jalğan. İs jüzinde internet jüyesi köp auılda bar, biraq sapası sın kötermeydi, iə bolmasa nükteleri az. Sol internetke qosılğan auıl mektepteriniñ köbinde vay-fay tek qana direktordıñ kabinetinde bar.

Basqa kabinetterden internet izdemey -aq qoyıñız. Al sizder olardan elektrondıq oqıtudı swraysızdar. Bir bes jıldan keyin swrasañız bir jön

Üşinşiden, tağı bir asığıs qabıldanğan şeşim - üştildilik turasında. Bwl jöninde talay aytılıp ta, jazılıp ta jatır, biraq sizdiñ jaqtan eşqanday jauap joq, bolmaydı da. Öytkeni bwl qadam eşqanday oylanbay, wlt bolaşağı turalı eş bas qatırmastan jasalğan qadam. "Qazaqstan tarihı", "Qazaq ədebieti" pənderi ağılşın tilinde oqıtılatın bolsa - qazaq tiliniñ ölgeni", - dep bwl məseleni ğalım Asqar Jwmadildaev öte dəl ayttı. Ol kisiden artıq aytu mümkin emes. Üştildilik - zaman talabı. Oqıtılsın, eşkim qarsı emes. Biraq jalpı bilim beru mektepterde emes, arnayı mektepterde nemese arnayı sınıptarda oqıtıluı kerek. Nağız bolmasa, ər mektepten bir sınıp aşuğa boladı. Jañaşıldıq degenniñ özi solayşa satılay jüzege aspaytın ba edi? Al barlıq mektepte sabaqtar ağılşın tilinde jüredi degenge senu qiın, əsirese auıl mektepterinde, bwl əzirşe utopiya. Bwl wstazdar qauımına küştep tañılıp otırğan nərse, bılayşa aytqanda zorlıq. Ol əzirşe jüzege asatın nərse emes.

Törtinşiden, WBT deytin nərseniñ AQŞ-ta söyleu mümkindigi şekteuli oquşılardıñ bilimin tekseru üşin qoldanılğan test ədisi ekendigin közi aşıq oqırman oqıp-bilip otır. Al onı qoldanudıñ bizge ne qajeti bar? Əlde test dayındaytındar köp aqşadan qağıladı dep, ayap otırsız ba? Odan da WBT ötkizuge ketip jatqan milliondardı oylağanıñız dwrıs emes pe? Jelge wşıp jatqan qayran qarajat!

Besinşiden, mwğalimderdiñ eñbekaqısın köterip jatırmız dep börkiñizdi aspanğa laqtırasız. Qaydam, sanatı joq jas mwğalim 50-60 teñge "ösken" tabıspen kün köre ala ma? Onıñ üstine jılına eki ret baspasözge jazılu, qağaz-toğaz, jazu-sızu qwraldarı, sabaqqa qajetti tehnikalıq (disk,fleşka t.s.s.) jəne didaktikalıq materialdardıñ bəri osı qarajattıñ işinde. Ol tamaq işpey me, teatrğa barmay ma, kiim almay ma?

Altınşıdan, əleumettik jelilerde mwğalimdi qorlau faktleri jii körinis tauıp jür. Siz qayda qarap otırsız, ministr mırza? Nege öz qızmetkeriñizdi qorlatıp qoyasız? Ükimet pen parlamenttiñ aldına "Mwğalim statusı" turalı Zañ qabıldau jöninde nege wsınıs tastamaysız?
Mwğalimge odaq kezinde berilgen jeñildikter alınıp tastaldı. Solardı qayta qarau kerek. Mwğalim qaltası jwqa, jwpını kiingen adam retinde qabıldanadı, qazirgi zamanda. Al onıñ qaltasın istegen jwmısına qaray qalıñdatıp, eñsesin tik wstap, eşkimge təueldi bolmay, eşkimge jaltaqtamay jürui üşin mwğalim statusı zañmen qorğaluı kerek. Mwğalim - mekteptiñ jüregi ekendigi ras bolsa, ol jürekke mekteptiñ işinde eşkimniñ tiisuge hwqı bolmauı kerek.

Qwrmetpen, Maqsot Sarkenjiev, joğarı sanattı orıs tili jəne ədebieti pəniniñ mwğalimi," QR Bilim beru isiniñ üzdigi, "Eren eñbegi üşin" medaliniñ iegeri

Abai.kz

4 pikir