Jwma, 22 Naurız 2019
«Soqır» Femida 3661 12 pikir 16 Naurız, 2018 sağat 11:50

Sırtqı sayasattağı är qadamımız üşin Lavrovtan rwqsat alamız ba?

Reseydiñ Sırtqı ister ministri Sergey Lavrov birswmdıq söz ayttı. Täuelsiz memleket – Qazaqstan Reseyden bölek sırtqı sayasat jürgizu üşin äueli Kreml' maqwl deui kerek eken-mıs. Lavrov söydedi.

«Resey – mümkindikter mekeni» attı forumda kösemsip söylegen Kreml'diñ şeneunigi sala-qwlaş söz aytıp, Reseydiñ äuelgi ambiciyasın tağı bir bayqattı.

Sol forumda zalda otırğan bireu beysauat swraq qoyıptı. Sondağı swrağı: «eger Qazaqstan AQŞ-pen arada vizanı alıp tastaytın bolsa, Resey bwğan qalay qaraydı?».

«Şınımdı aytsam, men sizdi aldamay-aq, qoyayın, men bwl turalı bilmeydi ekenmin. Men erteñ Astanada bolamın. Äriptesim, dosım Qayratpen (Qayrat Äbdrahmanov – QR Sırtqı ister ministri) bwl jayında söylesemin. Öytkeni, mwnday mäsele mindetti türde kelisim jasasudı talap etedi. Euraziyalıq ekonomikalıq odaq ayasında da emin-erkin jürip-twru qarastırılğan», - depti. Bwl Lavrovtıñ sözi.

Jalpı Lavrovtıñ lepirip söyleui, büginde halqınıñ 27 payızı küresin kezgen, ekonomikası şatqayaqtap, sırtqı sayasatta süykimi ketken Reseydiñ "birtışarı" bar ekenin körsetip qalu bolsa kerek.

Küni keşe ğana Astana Ortalıq Aziyadağı bes memlekettiñ basın qosıp, jiın ötkizdi. Özbekstannıñ ekinşi prezidenti Mirziyaev wsınıs aytıp, bestik qwram Astanada jiıldı. Äşeyinde mwnday jiındardan qalmaytın Resey bwl jolı şaqırılğan joq. Degenmen RF-nıñ dezinformator armiyası keşegi kündi baqılauda wstadı.

«Armiya» demekşi,  qazir Reseydiñ senetini sol äskeri äleuet qana. Öndiris müldem qwrıp, infraqwrılım twralap qalğan. Ekonomikası anau sankciyanıñ töpesinen keyin twra almay tırayıp jatır. Sondıqtan, Putinniñ özi joldauında tek qana äskeri küş jaylı aytıp, «bizdiñ äskeri küşimiz älemde teñdessiz» dep söyledi. Reseydiñ senetini jalğız – yadrolıq qaru. Öytkeni ol – agressor memleket. Ötken jolı Qazaqstan BWW Qauipsizdik keñesinde anti-yadrolıq bağdarlama wsınğanda qarsı bolğan jalğız – Resey, jalğız – Lavrov, dälirek aytsaq, Lavrovqa aytqızğan – Putin boldı.

Lavrovtıñ jañağı aytqanına qayta oralayıq. Söytip, Astanada OA basşıları oñaşa kezdesip jatqanına Kreml'  bwlqan-talqan bolıp jatqan körinedi.

Aytpaqşı, 2018 jıldıñ qañtarında Qazaqstan prezidenti Nazarbaev AQŞ-qa saparlap barğanın bilesizder. Aq üyde Tramppen kezdesip, «S5+1» formatındağı jiın jaylı söz etken. Sol kezde de qızıl üydegi qızarabörtken bireu «bwl sizder aytqanday ekonomikalıq odaq emes, sayasi wyım bolatın bolsa, onda qay tarapqa bolmasın jaqsılıq äkelmeydi» dep ses körsetken sıñay tanıtqan-tın.

Bwl jolı tağı da beysauat söz aytıptı. 27 jıldan beri Qazaqstan täuelsiz memleket. Memleketti qwruşı wltı – qazaq. Rämizderi bar. Prezidenti bar. Sol sekildi Sırtqı ister ministri de bar. Ol – Qayrat Äbdirahmanov. Bizdiñ kökeyimizdegi jalqı swraq mınau: Qayrat mırza, Qazaqstan täuelsiz bola twra, sırtqı sayasat jürgizu üşin äldekimderder rwqsat aluı kerek pe?

Nwrgeldi Äbdiğaniwlı

Abai.kz

12 pikir