Düysenbi, 16 Şilde 2018
Ruhani jañğıru 902 28 pikir 15 Mamır, 2018 sağat 11:40

Nağız «Ruhani jañğırudıñ» jemisi. Öskemen özgelerge ülgi boluı kerek

Şığıs Qazaqstan oblısınıñ äkimi D. K. Ahmetov mırzağa,

 Öskemen qalasınıñ äkimi Q. M. Twmabaev mırzağa 

oblıstağı birqatar qoğamdıq-sayasi wyımdardan 

Wsınıs hat

Elbasınıñ «Ruhani jañğıru» bağdarlamasına oray oblısımızda öziñizdiñ saliqalı basşılığıñızben birqatar oñdı şaralar jüzege asıp, qazaqşa aytsaq öñir jwrtşılığınıñ ölgeni tirilip, öşkeni janbasa da birşama sergip, serpilip qalğanı ras. Bwl şağın hatta ol şaralardı tizbelep jatu artıq. Desek te onomastika, toponimika mäselelerine kelgende Elbasınıñ talap-tilekterine jauap bere almay, jer şwqıp qalatın twstarımız da  jeterlik. Ärine, «Bolaşaqqa bağdar: Ruhani jañğıruda» Nwrswltan Äbişwlı Nazarbaev memleketimizdiñ negizin qwrap otırsa da, qazaq halqınıñ osı uaqıtqa deyin joğarıdağı mäselelerde mandımdı jwmıstar tındıruğa mümkindigi bolmağanın, endi onı keşeuildetsek keş bolatının da emeuirinmen jetkizuge tırısqan.

Özderiñizge belgili, Şığıs Qazaqstan, onıñ işinde äsirese Öskemen, Zıryan, Ridder, Şemonayha qalalarınıñ köşe atauları sonau Keñestik kezeñdegi keyip-bolmısın köp bwza qoyğan joq. Äsirese, oblıs ortalığı Öskemen köşeleri äli küngi keşegi bol'şeviktik ataularmen siresip twr. Qazan töñkerisiniñ «törkin jwrtı» — Reseydiñ özi olardan bayağıda arılıp, tazarıp, jañğırıp alğan. Al, oblısımızdıñ qalaları men auıldarı Öskemenge qarap boy tüzeytini – şındıq.

Ardaqtı Danial Kenjetaywlı!

Sizdiñ Öskemen qalası äkimine qaladağı 20-dan astam köşelerdiñ atauların «Ruhani jañğıruğa…» say keletindey etip özgertu jaylı nwsqau bergeniñizdi estip, qattı quandıq. Siz basşılıq jasağan kezde qaladağı 700-den astam köşelerdiñ tım qwrısa 30 payızı qazaqşalanıp qalsa, erteñgi küni elimiz men jwrtımızdıñ  auzında osı bir igilikti isiñiz qalatını şındıq. Juırda jergilikti baspasöz betterinde: «Öskemendegi Voroşilov köşesiniñ atauı Jaqiya Şayjünisovtıñ atımen atalğalı jatır» degendey habarlardı birneşe märte oqıp qaldıq. Äñgime mınada.

Jaqiya Şayjünisovtıñ kezindegi Semey oblısı aumağında, atap aytar bolsaq, Kökpektidegi bilim beru salasına siñirgen eñbegi mol ekendigi şındıq. Eñbek ötemine dep ol ağamızdıñ omırauına Socialistik Eñbek Eriniñ Qızıl Jwldızı tağılğan. Lenin ordenimen alqalanğan. Äneu bir jıldarı Semeydegi ülken bir köşege Şayjünisov atauı berildi. Artta qalğan wrpaqtarına, halqına ol kisiniñ aruağı riza!  

Öskemendegi Voroşilov köşesi — Abay dañğılın qiıp ötetin ülken köşe. Egerde ol köşege şınında da halqınıñ ardaqtısınıñ atauı beriler bolsa, oğan asa ülken aqın, iri filosof, kemeñger audarmaşı, Abay ağasınıñ pälsapasın zañdı türde jalğastıruşı, eren türkitanuşı, qazaq  şejiresiniñ negizin qalağan, onı wrpaqqa qaldırıp ketken Şäkärim Qwdayberdiwlınıñ atın beru kerek!!! Abay men Şäkärim – wltımızdıñ abıroyı men ar-ojdanı! Sol eki alıptıñ attarın iemdengen qos köşe danalıq pen tağılımnıñ ülgisindey bolıp qiılısıp jatsa, Şığıs Qazaqstannıñ barşa jwrtı riza bolatını aqiqat!!!

Sonımen qatar tağı da bir aytpay ketuge müldem bolmaytın mäsele bar, ol – Öskemendegi Uşanov alañın jañğırtu. Ötken ğasırdağı qılışınan qan sorğalağan bol'şevik Uşanovqa qoyılğan eskertkişti jwlıp tastap, bügingi jäne keler wrpaq sanasın jañğırtuımız qajet! Ol alañğa Alaş kösemi Älihan Bökeyhanovtıñ esimin berip, sol arıstıñ eskertkişin qoyu läzim!

Elbasınıñ elimizdiñ strategiyalıq damuında Basım bağıt dep ekpin tüsirip otırğan «Ruhani jañğıru…» bağdarlamasınıñ – Sizder üşin de asa mañızdı ekenin öte jaqsı tüsinemiz. Sondıqtan da el men jwrtqa siñirip jürgen eñbekteriñizdi qarızım dep emes, parızım dep tüsinetin Sizderdiñ bolaşaqtağı şarualarıñızğa sättilikter tiley otırıp, osı bir wlttıq-sayasi mäselelerdi oñdı şeşer degen ümittemiz!

Ä. Qañtarbaev, QR Jazuşılar odağı ŞQO filialınıñ direktorı, 

T. Tüsipbekov, «QR salalıq käsipodağı» ŞQO filialınıñ Törağası,  

S. Qwsanbaev, «Altay asu» qoğamdıq birlestiginiñ atqaruşı direktorı,  

J. Äşimov, ŞQO Aqsaqaldar alqasınıñ Törağası  

S. Aqanov, Öskemen qalalıq Ardagerler keñesi törağasınıñ orınbasarı.

Abai.kz

28 pikir