Düysenbi, 20 Tamız 2018
Ruh 1094 7 pikir 16 Mamır, 2018 sağat 15:53

Rızdığım tausılğan küni... donor boluğa dayınmın

 

Qazaqstan Respublikasınıñ
Densaulıq saqtau ministri
E.A.Birtanovqa!

Qwrmetti Eljan Amantaywlı!

Bügin "Abay.kz" aqparattıq portalınan Transplantaciya boyınşa Respublikalıq koordinaciyalıq ortalıqtıñ jetekşisi, bwrınğı densaulıq saqtau ministri Jaqsılıq Dosqaliev ağamızdıñ mäyit donorlığına tüsinistikpen qarauğa şaqırğan ündeuin oqıp, bir auız söz aytqandı jön kördim.

Men Auıt Mwqibek biıl 49 jastan astım. Qwdayğa täube, densaulığım jaqsı. El qatarı Elime, wltıma eñbek etip kelemin. Aldağı jerde qanşa jıl tirlik keşetinimdi, qay uaqıtta, qay jerde, qanday jağdayda öletimdi bir Qwdaydıñ özi biledi. Degenmen, Alladan wzaq ömir swrsem, eluge tayağanda äreñ körgen jalğız qızımnıñ qızığın jarımmen birge körsem degen tilegim bar. Sonday-aq, özim qolğa alıp istep kele jatqan Qazaq köşine baylanıstı mäseleniñ tüyini bwdan da arı öz deñgeyinde oñ şeşilip, alısta jürgen bes million qazaqtıñ Atajwrtına oralğanınıñ kuäsi bolsam degen arman da meni wzaq ömir süruge jeteleydi. Degenmen, mwnıñ bäri, tağı qaytalap aytayın, bir Allanıñ qwzırındağı şarua.
Hakim Abay:
"Adam - bir boq kötergen boqtıñ qabı,
Boqtan sasıq bolasıñ ölseñ tağı" - degen ğoy. Demek, öldiñ -- bittiñ. El-jwrtıñ "Tereñ qazıp, tekpilep kömuge" asığadı. Bir sözben aytqanda, "Ölgenniñ jazasın kömgen beredi". Bükil deneñ topıraqtıñ astında qalıp, şiridi. Odan göri... bwl turalı säl keyinirek...
Aytpaqşı, Wlı Abaydıñ jan men tänniñ ara qatınasın anıqtap bergen tağı bir ataqtı öleñi bar emes pe edi,

"Kök twman - aldıñdağı keler zaman,
Ümitti säule etip köz köp qadalğan.
Köp jıldar köp kündi aydap kele jatır,
Sipat joq, suret te joq, közim talğan.

Ol künder - ötken künmen bäri bir bäs,
Keler, keter, artına iz qaldırmas.
Sonıñ biri - arnaulı tausınşaq kün,
Arğısın bir-aq Alla biledi ras.

Aqıl men jan - men özim, tän - meniki,
"Meni" men "menikiniñ" mağınası - eki.
"Men" ölmekke tağdır joq äuel bastan,
"Meniki" ölse ölsin, oğan beki..."-dep keletin!?

Jaqsılıq Aqmırzawlınıñ Ündeuin oqığan är qazaqtıñ oyına birden Abay atamızdıñ osı öleñi oralatın şığar deymin.

Qısqası, danışpan aqın jannıñ öziñdiki, tänniñ özgeniki (Jerdiki) ekenin beker eskertpegen. Sol üşin, Jaqañnıñ köterip otırğanı öte orındı häm kerek mäsele!

Osınıñ bärin eskere  kelip, öz basım tömendegi oyğa bel budım:
Allanıñ qalauımen künderdiñ küninde Jer betindegi rızdığım tausılıp, miım öz jwmısın toqtatsa, öz basım özge adamnıñ ömirin ajaldan alıp qalu üşin kerek bolıp jatsa, denemniñ kerekke jaraytın qalğan bölegin beruge tük te qarsı emespin.
Eger, osı mäseleni retteytin qoldanıstağı Zañ bolsa, sol Zañ ayasında jazbaşa kelisimimdi beruge de dayınmın. Jäne bwl jöninde tuıs-tuğandarıma da ösiet qaldıramın.
Al, Zañ bolmasa, özge elderdiñ täjiribesine süyene otırıp, Zañ qabıldaudı wsınamın.
Tek, bir ğana şartım bar, meniñ dene müşelerime mwqtaj azamattıñ menimen tanıstıq, tuıstıq baylanısınıñ bolu-bolmauı şart emes, tek WLTI QAZAQ, DİNİ MWSILMAN adam bolsa bolğanı!

Auıt Mwqibek

16.05.2018
Astana

Redakciyadan: Qazaq köşiniñ janaşırı, qoğam qayratkeri, aqın Auıt Mwqibek 2014 jılı tamız ayında qan tapsırıp, "Qan" degen öleñ jazğan bolatın.

Abai.kz

7 pikir