دۇيسەنبى, 20 تامىز 2018
رۋح 1095 7 پىكىر 16 مامىر, 2018 ساعات 15:53

رىزدىعىم تاۋسىلعان كۇنى... دونور بولۋعا دايىنمىن

 

قازاقستان رەسپۋبليكاسىنىڭ
دەنساۋلىق ساقتاۋ ءمينيسترى
ە.ا.بىرتانوۆقا!

قۇرمەتتى ەلجان امانتايۇلى!

بۇگىن "اباي.كز" اقپاراتتىق پورتالىنان ترانسپلانتاتسيا بويىنشا رەسپۋبليكالىق كوورديناتسيالىق ورتالىقتىڭ جەتەكشىسى، بۇرىنعى دەنساۋلىق ساقتاۋ ءمينيسترى جاقسىلىق دوسقاليەۆ اعامىزدىڭ ءمايىت دونورلىعىنا تۇسىنىستىكپەن قاراۋعا شاقىرعان ۇندەۋىن وقىپ، ءبىر اۋىز ءسوز ايتقاندى ءجون كوردىم.

مەن اۋىت مۇقيبەك بيىل 49 جاستان استىم. قۇدايعا تاۋبە، دەنساۋلىعىم جاقسى. ەل قاتارى ەلىمە، ۇلتىما ەڭبەك ەتىپ كەلەمىن. الداعى جەردە قانشا جىل تىرلىك كەشەتىنىمدى، قاي ۋاقىتتا، قاي جەردە، قانداي جاعدايدا ولەتىمدى ءبىر قۇدايدىڭ ءوزى بىلەدى. دەگەنمەن، اللادان ۇزاق ءومىر سۇرسەم، ەلۋگە تاياعاندا ارەڭ كورگەن جالعىز قىزىمنىڭ قىزىعىن جارىممەن بىرگە كورسەم دەگەن تىلەگىم بار. سونداي-اق، ءوزىم قولعا الىپ ىستەپ كەلە جاتقان قازاق كوشىنە بايلانىستى ماسەلەنىڭ ءتۇيىنى بۇدان دا ارى ءوز دەڭگەيىندە وڭ شەشىلىپ، الىستا جۇرگەن بەس ميلليون قازاقتىڭ اتاجۇرتىنا ورالعانىنىڭ كۋاسى بولسام دەگەن ارمان دا مەنى ۇزاق ءومىر سۇرۋگە جەتەلەيدى. دەگەنمەن، مۇنىڭ ءبارى، تاعى قايتالاپ ايتايىن، ءبىر اللانىڭ قۇزىرىنداعى شارۋا.
حاكىم اباي:
"ادام - ءبىر بوق كوتەرگەن بوقتىڭ قابى،
بوقتان ساسىق بولاسىڭ ولسەڭ تاعى" - دەگەن عوي. دەمەك، ءولدىڭ -- ءبىتتىڭ. ەل-جۇرتىڭ "تەرەڭ قازىپ، تەكپىلەپ كومۋگە" اسىعادى. ءبىر سوزبەن ايتقاندا، "ولگەننىڭ جازاسىن كومگەن بەرەدى". بۇكىل دەنەڭ توپىراقتىڭ استىندا قالىپ، ءشىريدى. ودان گورى... بۇل تۋرالى ءسال كەيىنىرەك...
ايتپاقشى، ۇلى ابايدىڭ جان مەن ءتاننىڭ ارا قاتىناسىن انىقتاپ بەرگەن تاعى ءبىر اتاقتى ولەڭى بار ەمەس پە ەدى،

"كوك تۇمان - الدىڭداعى كەلەر زامان،
ءۇمىتتى ساۋلە ەتىپ كوز كوپ قادالعان.
كوپ جىلدار كوپ كۇندى ايداپ كەلە جاتىر،
سيپات جوق، سۋرەت تە جوق، كوزىم تالعان.

ول كۇندەر - وتكەن كۇنمەن ءبارى ءبىر ءباس،
كەلەر، كەتەر، ارتىنا ءىز قالدىرماس.
سونىڭ ءبىرى - ارناۋلى تاۋسىنشاق كۇن،
ارعىسىن ءبىر-اق اللا بىلەدى راس.

اقىل مەن جان - مەن ءوزىم، ءتان - مەنىكى،
"مەنى" مەن "مەنىكىنىڭ" ماعىناسى - ەكى.
"مەن" ولمەككە تاعدىر جوق اۋەل باستان،
"مەنىكى" ولسە ءولسىن، وعان بەكى..."-دەپ كەلەتىن!؟

جاقسىلىق اقمىرزاۇلىنىڭ ۇندەۋىن وقىعان ءار قازاقتىڭ ويىنا بىردەن اباي اتامىزدىڭ وسى ولەڭى ورالاتىن شىعار دەيمىن.

قىسقاسى، دانىشپان اقىن جاننىڭ وزىڭدىكى، ءتاننىڭ وزگەنىكى (جەردىكى) ەكەنىن بەكەر ەسكەرتپەگەن. سول ءۇشىن، جاقاڭنىڭ كوتەرىپ وتىرعانى وتە ورىندى ءھام كەرەك ماسەلە!

وسىنىڭ ءبارىن ەسكەرە  كەلىپ، ءوز باسىم تومەندەگى ويعا بەل بۋدىم:
اللانىڭ قالاۋىمەن كۇندەردىڭ كۇنىندە جەر بەتىندەگى رىزدىعىم تاۋسىلىپ، ميىم ءوز جۇمىسىن توقتاتسا، ءوز باسىم وزگە ادامنىڭ ءومىرىن اجالدان الىپ قالۋ ءۇشىن كەرەك بولىپ جاتسا، دەنەمنىڭ كەرەككە جارايتىن قالعان بولەگىن بەرۋگە تۇك تە قارسى ەمەسپىن.
ەگەر، وسى ماسەلەنى رەتتەيتىن قولدانىستاعى زاڭ بولسا، سول زاڭ اياسىندا جازباشا كەلىسىمىمدى بەرۋگە دە دايىنمىن. جانە بۇل جونىندە تۋىس-تۋعاندارىما دا وسيەت قالدىرامىن.
ال، زاڭ بولماسا، وزگە ەلدەردىڭ تاجىريبەسىنە سۇيەنە وتىرىپ، زاڭ قابىلداۋدى ۇسىنامىن.
تەك، ءبىر عانا شارتىم بار، مەنىڭ دەنە مۇشەلەرىمە مۇقتاج ازاماتتىڭ مەنىمەن تانىستىق، تۋىستىق بايلانىسىنىڭ بولۋ-بولماۋى شارت ەمەس، تەك ۇلتى قازاق، ءدىنى مۇسىلمان ادام بولسا بولعانى!

اۋىت مۇقيبەك

16.05.2018
استانا

رەداكتسيادان: قازاق كوشىنىڭ جاناشىرى، قوعام قايراتكەرى، اقىن اۋىت مۇقيبەك 2014 جىلى تامىز ايىندا قان تاپسىرىپ، "قان" دەگەن ولەڭ جازعان بولاتىن.

Abai.kz

7 پىكىر