Särsenbi, 17 Şilde 2019
Bilgenge marjan 2330 1 pikir 20 Mausım, 2018 sağat 15:41

BJZQ ärdayım baylanısta

 

Qartayğanda qamsız ömir süru üşin qanday qareket jasau kerek? Meniñ zeynetaqı şotımda qanşa qarjı jinaldı? Zeynetaqı aktivteriniñ tabıstılığı qanday? Bwl saualdar zeynetaqı qorına jarna jinap jürgen ärbir azamattı tolğandıratını anıq.  Qazaqstandıqtardıñ osı jäne özge de swraqtarğa jan-jaqtı jauap aluğa mümkindigi bar. 20 mausım küni Biriñğay jinaqtauşı zeynetaqı qorınıñ barlıq öñirlik filialdarında Aşıq esik küni ötti. Jwrtşılıqpen kezekti kezdesudiñ taqırıbı  - «Zeynetaqı jinaqtarı. Jeke zeynetaqı şotınıñ jay-küyi turalı habarlau ädisteri».  Elimizdiñ zeynetaqı jüyesi turalı keñirek bilu üşin biz Qordıñ Almatı qalalıq  filialınıñ direktorı  Ämirenov Nwrlan Slämbekwlın (surette)   äñgimege tartqan edik.

Swraq: BJZQ Aşıq esik künderin jüyeli ötkizip kele jatqanına ekinşi jıl. Bwl şaranıñ qajettiligi nede?   

Bwl jobanı biz bıltırğı jıldıñ basınan bastap qolğa aldıq. Osı uaqıt işinde oğan respublika boyınşa 25 mıñğa juıq adam qatıstı. Zeynetaqı qalay esepteledi, bwl salağa qatıstı qanday zañnamalıq özgerister bar? Keñ auqımdı tüsindirmelik jwmıstarğa qaramastan, halıqtıñ zeynetaqı qorına qatıstı saualdarı äli de barşılıq. Aşıq esik küni jwrtşılıqtıñ zeynetaqı jüyesi turalı mağlwmatın keñeytip qana qoymay, özderine qatıstı jeke swraqtarı boyınşa mamandardan keñes aluğa mümkindigi bar.  Qazaqstandıqtardıñ zeynetaqı taqırıbına joğarı qızığuşılığın eskere otırıp, Qor basşılığı şaranı jüyeli türde ötkizu turalı şeşim qabıldadı.   

Swraq: Qazaqstanda qanday zeynetaqı türleri bar? Oğan kim iek arta aladı? 

- Qazirgi tañda zeynetaqı jarnalaranıñ üş türi bar.  Onıñ birinşisi – mindetti zeynetaqı jarnaların jwmıs beruşi jwmıskerdiñ aylıq tabısınıñ 10 payızı köleminde audarıp otıradı.  Ekinşisi – mindetti käsibi zeynetaqı jarnaların jwmıs beruşi ziyandı jağdayda jwmıs isteytin qızmetkerlerdiñ esepşotına aylıq tabısınıñ 5 payızı köleminde audaradı.  Al, üşinşi- erikti zeynetaqı  jarnası öziniñ zeynet kezeñin josparlap,   qarttıq jasındağı qajettilikterine qarajat jinauğa dayın azamattarğa arnalğan. Jarnanıñ bwl türiniñ somasın salımşı öz ıqtiyarına qaray belgiley aladı.  Ökinişke oray, azamattardıñ zeynetaqı jüyesiniñ qalay jwmıs isteytini turalı bilimi birkelki emes. Osınıñ saldarınan key azamattarımız zeynetaqı şağın dwrıstap josparlay almaydı, al keyde tipti bwl kemşilik olardıñ qwqıqtarınıñ şekteluine äkelip jatadı. Sondıqtan Aşıq esik küni ayasında biz bwl taqırıpqa erekşe toqtalıp ötudi jön sanadıq.

 Swraq: Aşıq esik küniniñ ekinşi taqırıbı – jeke zeynetaqı şottarınıñ jay-küyi turalı aqparat alu ädisteri. Bwl taqırıptıñ mañızdılığı nede? 

Bwl da öte özekti taqırıp. Sebebi azamattardı öz zeynetaqı şotında qanşa jarna jinalğanı, olardıñ qanşalıqtı tiimdi investiciyalanğanı ärdayım alañdatadı. Zeynetaqı qorı salımşıları men aluşıların bwl turalı ärdayım qwlaqtandırıp otıradı. Al soñğı jıldarı aqparattandıru täsilderi aytarlıqtay keñeydi. BJZQ uaqıt talabına say damıp keledi. Qaşıqtıq arqılı qızmet körsetuge eseptelgen köptegen jaña elektrondıq servis türleri qoldanısqa engizildi. Endi keñsege barıp, kezekte twrmay-aq qızmet alıp, uaqıt ünemdeuge boladı. Zeynetaqı şotınıñ jağdayın üyde otırıp-aq, tipti wyalı telefon arqılı da qadağalauğa boladı.  2017 jılı Qordı elektrondıq  operaciyalarınıñ körsetkişi 52 payızğa jetken.  Mwnday qızmet türlerin biz odan äri de jetildire bermekpiz. Cifrlandıru – sän quu emes, bwl bizdiñ ömirimizdi barınşa qolaylı etetin uaqıt talabı.  Sondıqtan biz jwrtşılıqtı bwl mümkindiktermen keñirek tanıstırmaqpız.

Swraq: JZŞ-dan üzindi-köşirme aludıñ qanday naqtı türleri bar? Zeynetaqı räsimdeudi eseptemegende bwl eñ köp swranısqa ie qızmet türi ğoy.   

Qazirgi tañda tek JZŞ-dan köşirme alu ğana emes, BJZQ-nıñ köptegen qızmet türleri elektrondıq nwsqağa  köşirilgen.  Qor salımşıları men aluşılarına öz jarnaları turalı aqparattı qaşıqtıqtan  aluğa mümkindik beretin ıñğaylı ädisterin wsınıp otır.  Al «Cifrlı Qazaqstan» bağdarlamasınıñ engizilui bwl mümkindikterdi odan äri keñeytude.   Qısqaşa toqtalar bolsam, qazir  mwnday aqparattı elektrondıq poşta arqılı ğana emes, Qor saytında jeke kabinet aşu arqılı, KZ elektrondıq ükimetiniñ portalı arqılı da aluğa boladı.      Android, iPhone, iPad, Windows Phone operaciyalıq jüyelerine eseptelgen  mobil'di qosımşa da jwrtşılıq arasında ülken swranısqa ie. Ärine, aqparat aludıñ belgili bir täsiline jüginu üşin  Qor keñsesine kelip  ötinim jazu, elektrondıq cifrlıq qoltañbağa jüginu sındı belgili talaptar bar.  Degenmen, bwl  dästürli qızmet türlerinen äldeqayda qolaylı ekeni anıq. Osı jaña qızmet türlerimen biz jwrtşılıqtı Aşıq esik küninde keñirek tanıstırdıq. Sonımen qatar,  azamattarğa qosımşa swraqtarı boyınşa jeke keñes beruge ärdayım dayınbız. Baylanıs ortalığınıñ 1418 nomeri arqılı baylanısıp twruğa da boladı.   Qazaqstan aumağındağı qalalıq jäne wyalı telefondardan tegin qoñırau şaluğa boladı.

  • Äñgimeñizge rahmet. Jwmıstarıñızğa sättilik tileymiz!

 Swhbattasqan Kögerşin Tilegen

Abai.kz

1 pikir