Beysenbi, 20 Mausım 2019
Ne deydi?! 1533 5 pikir 10 Şilde, 2018 sağat 13:18

Bir-aq künde 26 köşege Astana atauın berip tastadıq...

Jañadan qwrılğan Türkistan oblısı biılğı Astana künine elden erek häm qoraş sıylıq jasadı. Oñtüstikte bir-aq künde 26 köşeniñ atauı Astana dep özgeritilip şığa kelgenin estip, ne külerimizdi, ne jılarımızdı bilmey qaldıq. Bwl ne, jağımpazdanu ma, joq älde şınımen Astanağa degen mahabbat pa?

Ras. Astana - elimizdiñ ordası. Memleketimizdiñ tu tikken - altın qazığı.

Bas qalamız soltüstikke köşkende Aqmola atauı köp adamğa wnamağanı belgili. Sol twsta bw qalağa layıqtı atau beru de qiın boldı. "Ar tart, beri tartpen" jürip qalanı "Astana" dep atay saldıq. Mwnıñ özi äyteuir bir auısatın atau ekenin qazir bar qazaq biledi.

Tipti dürkin-dürkin "Elordanıñ atın Nwrswltan qalası dep atayıq" degen mäsele köterilip keledi.

Elbası bwl bastamanı qoldamasa, tarihi Bozaq atauı qoyılar. Qıpşaq handığınıñ astanası bolğan Bozaq köne atau deytinder bolsa, "Qaraötkel" degen tarihi atauı tağı bar. Tipti, tarihi atau qalpına tüsip, bayağı biz qaşqan "mola" sözi qayta oralıp, "Aqmola" atauın qayta alar.

Äyteuir, bir aqiqat bar. Bw qalanıñ atauı öte jaqın merzimde özgeredi. Sol özgeretin qalanıñ atauına bir emes, eki emes, 26 köşeniñ atın bir-aq künde bere salu qanşalıqtı qisındı? Bwl köşelerdiñ bwrınğı atauları qanday edi?

Bizdiñ qazaqta daraqılıq basım. Tüymebaev biıl 26 köşeni Astana dep atasa, odan asıp tüskisi keletinder keler jılı aşıq alamanğa tüsip ketui mümkin.

Sosın on şaqtı jıldan keyin Qazaqstandağı mıñdağan Astana köşelerinen qwtıla almay dal boluımız äbden mümkin.

Bwl bizdiñ bügingi tarih deytin şığarmız. Dese de keşe ğana "Lenin", "Kalinin", "Kommunizm", t.b jüzdegen attan äreñ-äreñ qwtılıp kele jatqan el retinde säl oylanğanuğa bolmas pa edi?

Şäriphan Qaysar

Abai.kz

 

5 pikir