Senbi, 20 Säuir 2019
Bizdiñ şeneunik 4419 5 pikir 19 Qazan, 2018 sağat 16:02

Sokolovanıñ sandırağı men Süleymenovtiñ sözi nege wqsas?

Adamdar 17 qazandı halıqaralıq kedeylikpen küres küni retinde küntizbege engizgen. Demek, däl osı küni ğalımdar men sayasatkerler älemdegi işer as, kier kiimge jarımay jürgen jandardıñ mwñ-mwqtajın söz etedi. Resmi aqparattarğa sensek, älem halqınıñ 26.2%-ı öte tömen deñgeyde ömir sürip jatqan körinedi.

Jä, jığılıp jatıp süringenge külgendey bolmayıq. Älemde kedeyler köp dep kületindey Qazaqstan halqınıñ şekesi şılqıp ömir sürip jatqanı belgili. Qazba baylığınıñ köptigi men jer köleminiñ keñdiginen ğalamdı tañğaldıratın elimizde köptegen adam üpi-tapı kün keşip jatır. Bwqaranıñ alatın eñ tömengi aylıq jal­a­qı mölşeri men eñ tömengi künköris deñgeyi, statistikanıñ aytuınşa, däl qazir 28,7 mıñ teñgeni qwrap otır. Düniejüzilik banktiñ twjırımı boyınşa, är adamnıñ kündik twrmıstıq qarajatı 3.2 dollardan kem bolu —  tabısı öte tömen eldiñ körsetkişi. Basqaşa aytqanda, älemdegi kedey eldiñ halqınınan säl ğana joğarı degen söz. Al bizdiñ eldegi eñ tömengi künköris deñgeyi (28,7 mıñ) bwdan äldeqayda tömen ekenin körip otırsızdar.

Resmi mälimetter boyınşa Qazaqstan halqınıñ 2,6 payızı kedeyşiliktiñ şeginde ömir süredi eken. Bwl resmi derek. Resmi statistikanı qarapayım halıqtıñ arasına mülde kelip körmegen, jaylı kresloda otırıp alıp joğarı jaqqa esep bergişter jasaytının eskersek 2,6 payızı degeni ber jağı ğana bolıp qaları sözsiz. Bizşe, aylığın şaylığına jetkize almay jürgen qazaqtıñ kem degende teñ jartısı kedeyliktiñ qwyına batıp jatır. Tağı da düniejüzilik banktiñ esebine süyensek, halqınıñ kündik tabısı 5.5 dollardan tömen bolsa tömen tabıstı elder qatarına jatqızıladı. Al bizdiñ elde bwnday tabıs talay adamğa qol jetpes arman bolıp otır.

Statistika komitetiniñ mälimetinşe, Qazaqstanda 2,3 million jaldamalı qızmetkerdiñ 259,1 mıñı 45 mıñ teñgeden az tabıs tabadı eken. Bwnı az deseñiz elimizde 20 mıñ teñgeden tömen jalaqı alatın adamdar da bar. Al endi eseptey beriñiz, düniejüzilik banktiñ mejesi boyınşa biz qanday elder qatarına jatamız? Joğarıda biz aytqan «qatırıp» esep bergişterge sensek, elimizdegi ortaşa jalaqı kölemi 163 mıñ teñgeni qwraydı eken. Ayına million teñgeni sanap alatın sansız köp şendilerdiñ äserinen eldegi az aylıqqa kün körip otırğandar eskerusiz qalıp otır. Bizdiñ biliktegiler üşin statistika «mwzday» bolsa boldı.

Azattıq Radiosınıñ tilşileri ministrler men deputattardan eñ tömengi kün köris deñgeyi - 28,7 mıñ teñgege qalay ömir süruge bolatının swraptı. Eñbek jäne halıqtı äleumettik qorğau ministri Mädina Äbilqasımova bwl swraqtı jauapsız qaldırdı. Jauap bere almadı ma, älde jauap beru qajetsiz dedi me, onı özi biledi. Osı salanıñ otımen kirip, külimen şığuı tiis Madina hanımdı halıqtıñ kün körisi alañdatpaytın da sekildi.

Al Wlttıq ekonomika ministri Timur Süleymenov halıqtıñ twrmısı tömen degenge kelispeytinin jetkizdi. Şınayı jağdayğa emes, qağazda jazılğan esepke, statistikağa senetin ministr eñ tömengi künköris deñgeyi 28 mıñ teñge bolğanımen, halıqtıñ basım böligi bwdan köp jalaqı aladı. Äytpese, elimizdegi ortaşa jalaqı kölemi 163 mıñ teñge bolmas edi degen uäjin ayttı. Bwl körsetkiştiñ qalay payda bolğanına ministrdiñ miı jetpese de, halıqtıñ oyı jetip otır.

«Elbası 2019 jıldan bastap bwl sandı 2 esege ösirudi tapsırdı. Endi eñ tömengi künköris deñgeyi 42 mıñ teñgege ösedi. Al 42 mıñ teñgege köp närse aluğa boladı dep oylaymın», - deydi Timur Süleymenov. Bildey ekonomika ministri eldegi ekonomikalıq jağdaydan habarsız bolıp şıqtı. Zat bağası zımırannıñ jıldamdığımen ösip bara jatqan mına zamanda 42 mıñ teñgege köp dünie satıp aluğa boladı degeni bilermendik emes endi. Bärimiz biletindey jalaqı bes payız ösken küni zat bağası men aqılı qızmetter on payız köteriledi.

Qazaq biligi qwdayınday sıylap, ülgi twtatın Reseydiñ özi mınaday oylamsız mälimdemeni keşirmeytinin körsetti. Atalğan eldiñ Saratov oblısı Eñbek, jwmıspen qamtu jäne migraciya ministri Natal'ya Sokolova «Zeynetkerler 3,5 mıñ rubl'ge (19 600 teñge) bir ay toyıp tamaqtana aladı» degeni üşin qızmetinen quıldı. Sokolovanıñ sol sözinen keyin Resey jwrtşılığı ministr bwl bastamanı äueli özinen bastasın dep narazılıq bildirdi. Eldiñ narazılığınan keyin Saratov oblısınıñ gubernatorı Valeriy Radaev Sokolovanıñ qızmetten ketetinin mälimdedi.

Qarap otırsañız, Natal'ya Sokolova men Timur Süleymenovtiñ aytqanı bir äñgime. Ayırmaşılığı, aldıñğısı bir ay toyıp tamaq işuge 3,5 mıñ rubl' jetedi dese, soñğısı eñ tömengi künköris somasına köp düine aluğa boladı deydi. Qayta, reseylikterdiñ jağdayı bizge qarağanda toyğa barğanday eken. Tek azıq-tüliktiñ özine jwmsaytın 19 600 teñgesi bar. Al bizdiñ elde azıq-tülik, azıq-tülik emes tauarlar, aqılı qızmet körsetu, jürip-twru bärine 28,7 mıñ teñgeni jetkizuge tura keledi. Al endi salıstıra beriñiz, Sokolovanıñ sandırağınan Süleymenovtiñ söziniñ qanşa ayırması bar? Endeşe, barlıq iste Mäskeudi ülgi twtatın qazaq biligi Timur Süleymenov pen Natal'ya Sokolovanı salıstırmas pa eken?!

Quanış Qappas

Abai.kz

5 pikir