Särsenbi, 17 Şilde 2019
Bizdiñ şeneunik 2366 16 pikir 3 Qañtar, 2019 sağat 09:53

Arhimed Cara Alpısqızına jağımpazdanıp jür me?

Qwdayğa şükir, bir ayğa sozılıp, äbden äbigerge tüsirgen Jaña jılğa dayındıq ta ayaqtalıp, baqanday tört kün toylağan merekemiz de ötti-au, äyteuir. Özge jerlerdi bilmeymin, bir jıl boyı sarsıla kütetin bwl merekeni bar sän-saltanatımen atap ötude bizdiñ oblıs qalğan öñirlerdi şañ qaptırdı dese de bolğanday. Jaña jıl aldında oblısımızda özge oblıstardağı sekildi bwl merekege özindik jaqsı bir, jan jadıratar sıylıqtar jasalatın şığar dep oylağan edik. Qazir şını kerek, halqımız şat-şadıman ömir sürip otır, jegeni aldında, jemegeni artında, auzınan aq may aqqan zaman dey almas edik. Sondıqtan da bwl jolğı mereke eñ bolmasa qarapayımdau ğana, körpesine qaray kösile otırıp ötkiziler degenbiz. 

Alayda bwl ümitimiz beker bolıp şıqtı. Bizdegi atınan at ürketin firmalardıñ ğana emes, byudjetke qarap alaqan jayıp otırğan, ölmestiñ küyin keşken mekemesımaqtardıñ özi bwl merekeni özderinşe keremet kooperativtik keşter ötkizip, mäz-mäyram bolıp jattı. Aqırı mwnıñ ayağı 400 adam jinalğan at şaptırımday meyramhanada qıp-qızıl töbelespen ayaqtaldı. Araqqa toyıp alğan qazaqtıñ narqasqa jigitteri birin-biri ayausız tepkilep tındı.

Jaraydı, jastardiki balalıqqa bergisiz şalalıq delik. Oğan aqañnıñ da qızuı äser etken şığar. Al endi osı merekeni jwrttıñ barlığınıñ bäri de quana qarsı alatınday etip ötkizuine ne kedergi edi? Özge jaqtıñ igi isterinen nege ülgi almasqa? Mäselen, Mañğıstau oblısında kooperativtik keşterdi ötkizbeymiz dep şeşken körinedi. Al Şığıs Qazaqstan oblısınıñ densaulıq saqtau basqarmasınıñ qızmetkerleri mwnday otırıstıñ ornına Semey men Öskemendegi balalar üyine sıylıq jasaudı wyğarıptı.

Arhimed Mwhanbetov, Qostanay oblısınıñ äkimi

Al bizdiñ oblıstıñ bilik basındağılar mwndaydan müldem beyhabar bolar. Jaña jıl aldında mwnday bastamalardıñ birin de estigen joqpız. Bizdiñ Arhimed äkimimiz eñ bolmasa ana Qızılorda oblısınıñ äkimi Qırımbek Köşerbaevtıñ istegenin qaytalap, osındağı biznes ökilderinen kooperativtik keşter ötkizudiñ ornına oblıstağı kedey-kepşikke qol wşın beru kerektigin eske de sala almadı. Jalpı Arhimed Mwhanbetovti kinälay almaymız. Ol kisi tım mädenietti, asa sıpayı adam ğoy, mwnday sözderdi asau käsipkerler köñiline alıp qalar dep oylasa kerek. Sodan da bata almağan şığar.

Alayda Arhimed äkimimiz darhan kisi ğoy, Jaña jıldıq merekege ketetin şığındardı onşa eseptep jatpaydı. Osı merekege arnalğan şırşanı bezendiru, ot şaşu wyımdastıru sekildi şaralarğa anau-mınau emes, byudjetten baqanday 25 million teñge bölu kerek dep edi, sözge kelgen joq, kelise saldı. Wsaqtalıp qaytedi. Qostanay - bay ölke. Keybir köre almauşılardıñ: «Oybay, anau Aqtau men Oral qalaları bwğan nebäri 4 million ğana jwmsaptı ğoy. Taraz da qattı şaşılğan joq, olar 6,5 millionğa da toylap jatır. Tipti Taldıqorğannıñ özi 15 millionnan asa almaptı» degen sözderin qwlaqqa da ilmeydi. Dwrıs isteydi. Ärkimniñ qañqu sözderine köñil böle berseñ, halıq üşin jwmıs isteuden qalarsıñ.

Al endi osı äkimizdiñ Jaña jıl aldındağı bir «mırzalığın» oblıs halqı äli künge deyin auzınan tastamay jür. Ol kisi mereke aldında osındağı «Janwya» derevnya ülgisindegi balalar üyine 2 million teñgelik sıylıqtıq sertifikat tabıs etti. Ärine, biz qanday da sıylıqtıñ artıq bolmaytının tüsinemiz. Alayda  ol neniñ esebinen berildi, kimniñ qaltasınan şıqtı degen saualdar jauapsız qaldı. Ol aqşa äkimniñ qaltasınan şıqpaytını kim-kimge de ayan. Al endi mwnday siyapat byudjet esebinen jasalsa, ol nege osındağı barlıq baspasöz betinde erekşe dañğıra etiledi? «Janwya» qarjıdan eş uaqıtta tarşılıq körgen emes. Mwnı balalar üyiniñ basşılığı özderine jıl sayın byudjetten 88 million teñge bölinetinin, sondıqtan da qazir mwnda barlıq jağday jasalğanın aşıq ayttı.

Mümkin, äkim balalarğa sıylıq jasağısı kelse, nege anau künin äzer körip otırğan osındağı «Del'fin» balalar üyi sekildi köñili jarımjan balapandardıñ köñilin nege köterip tastamasqa?  Onı az dese osındağı onkologiyalıq sırqatqa wşırağan närestelerdiñ emdeletin orındarınıñ tarlığınan şetel asıp ketetinine janı aşımay ma? Mümkin olarğa osındağı bir ğimarattı berip, Jaña jıldıq sıylıq jasasa, talay jwrttıñ alğısın arqalamas pa edi? Älde «Janwyanıñ» Sara Alpısqızınıñ tikeley baqılauında ekenin eskerip, osı sıy-siyapat arqılı bir közge tüsip qalğısı keldi me eken?

Qalay bolğanda özgelerdi qaydam, bizdiñ oblıstağı dürkirep ötken merekeden köñilge biraz kireuke tüskenin jasıra almaymız.

Jaybergen Bolatov

Abai.kz

  

16 pikir