Särsenbi, 20 Naurız 2019
808 0 pikir 11 Qañtar, 2019 sağat 10:45

Q.Toqaev: Deputattardıñ Prezident Strategiyasın nasihattau jwmısı üstirt bolmauı kerek

Parlament Senatı Byurosınıñ otırısı boldı. Palata Törağası Qasım-Jomart Toqaev şarağa qatısuşılarğa arnağan sözinde Memleket basşısınıñ Qazaqstan halqına Joldauı ayasında äleumettik saladağı, sonday-aq Jastar jılın ötkizuge baylanıstı mañızdı mindetter boyınşa deputattar korpusı aldındağı jwmıstardıñ negizgi bağıttarın belgiledi.

«Senattıñ köptegen deputattarı Parlamentte aymaqtardıñ müddesine ökildik etedi. Deputattar korpusı men atqaruşı bilik organdarı, eñ aldımen el aymaqtarındağı äleumettik mäseleler men twrğındardıñ mwñ-mwqtajına basa nazar audaruı tiis. Qoğamnıñ twraqtılığına qauip töndiretin jağdaylarğa jol bermeu üşin aldın alu şaraları jedel türde äri uaqıtında qabıldanuı kerek», - dedi Senat Törağası.

Q.Toqaev deputattardı, ortalıq jäne jergilikti bilik organdarın qoğam ömirindegi ärtürli jağdaylardı naqtı äri dälme-däl jetkizu üşin äleumettik jelilerdi sauattı, jauapkerşilikpen äri bilikti türde paydalanuğa şaqırdı.

Senat Törağasınıñ pikirinşe, älem äleumettik-ekonomikalıq jäne sayasi dürbeleñ kezeñine tap boldı. Qazaqstan öziniñ kümänsiz jetistikterimen qosa, ökinişke oray, naşar twstarımen de külli jahandıq qoğamdastıqtıñ bölinbes bölşegi bolıp tabıladı. Q.Toqaev bwl jağdayda bizdiñ Prezident Strategiyasınıñ maqsattarı men mindetterin jwrtşılıqqa jetkizu jönindegi jwmıstardıñ üstirt, taptaurın sipattan arıluına deputattardıñ nazarın audardı. «Bizdiñ memleketimizdiñ bügini men keleşegi turalı mazmwndı äri qızıqtı pikir almasu boluı tiis», - dedi Törağa.

Q.Toqaev Jastar jılına baylanıstı birqatar wsınıstar ayttı. Onıñ aytuınşa, elimizdegi belsendi äri bilikti jastardıñ ökilderin memleket müddesin ilgeriletu isine tartu maqsatında senatorlardıñ belsendi jwmıs isteui qajet. Parlament joğarğı Palatasınıñ basşısı Senatta ötetin is-şaralarğa, onıñ işinde jalpı otırıstar men komitetterdiñ astanalıq jäne aymaqtıq joğarı oqu orındarınıñ studentterin, käsiporındardıñ jas jwmısşıları men kompaniyalar qızmetkerleriniñ qatısuın wyımdastırudı wsındı. Q.Toqaev qoğamdıq wyımdardıñ, onıñ işinde «Jas Otan» ökilderiniñ qatısuımen memlekettiñ jastar sayasatı mäseleleri boyınşa arnayı şaralar ötkizudi jön sanaydı.

Q.Toqaevtıñ sözinde aytılğan özekti mäseleler boyınşa Byuro müşeleri müddelilik twrğısında pikir almastı.

Byuro otırısında Palatanıñ 17 qañtarda bolatın kezekti otırısınıñ kün tärtibi bekitildi.

Deputattardıñ qarauına Qazaqstan men Täjikstan arasındağı köşi-qon jäne azamattardıñ orın auıstıruı mäselelerin retteytin üş kelisimdi ratifikaciyalau turalı zañ jobaları engizildi. Atap aytqanda, Senat köşi-qon salasındağı ıntımaqtastıq, adamdardıñ readmissiyası, Qazaqstan azamattarınıñ Täjikstan aumağında jäne Täjikstan azamattarınıñ Qazaqstan aumağında bolu tärtibi turalı ükimetaralıq kelisimderdi talqılaydı. Odan basqa, Palata Euraziyalıq ekonomikalıq odaq turalı şartqa Qırğız Respublikasınıñ qosıluı turalı şartqa özgeris engizu turalı hattamanı ratifikaciyalau turalı zañ jobasın qaraydı.

Byuroda Mäjilisten tüsken zañ jobaları bas komitetterge bölinip berildi. Qazaqstan men Qırğızstan arasındağı Qazaqstan-Qırğız memlekettik şekarasınıñ rejimi turalı kelisimdi jäne TMD-ğa qatısuşı memleketterdiñ terrorizmge qarsı küresti jüzege asıratın qwzıretti organdardı materialdıq-tehnikalıq qamtamasız etudegi ıntımaqtastığı turalı kelisimdi ratifikaciyalau turalı zañ jobaları boyınşa Halıqaralıq qatınastar, qorğanıs jäne qauipsizdik  komiteti bas komitet bolıp belgilendi.

Qazaqstan Respublikası Parlamenti
Senatınıñ Baspasöz qızmeti

Abai.kz

0 pikir