سارسەنبى, 16 قاڭتار 2019
624 0 پىكىر 11 قاڭتار, 2019 ساعات 10:45

ق.توقاەۆ: دەپۋتاتتاردىڭ پرەزيدەنت ستراتەگياسىن ناسيحاتتاۋ جۇمىسى ءۇستىرت بولماۋى كەرەك

پارلامەنت سەناتى بيۋروسىنىڭ وتىرىسى بولدى. پالاتا توراعاسى قاسىم-جومارت توقاەۆ شاراعا قاتىسۋشىلارعا ارناعان سوزىندە مەملەكەت باسشىسىنىڭ قازاقستان حالقىنا جولداۋى اياسىندا الەۋمەتتىك سالاداعى، سونداي-اق جاستار جىلىن وتكىزۋگە بايلانىستى ماڭىزدى مىندەتتەر بويىنشا دەپۋتاتتار كورپۋسى الدىنداعى جۇمىستاردىڭ نەگىزگى باعىتتارىن بەلگىلەدى.

«سەناتتىڭ كوپتەگەن دەپۋتاتتارى پارلامەنتتە ايماقتاردىڭ مۇددەسىنە وكىلدىك ەتەدى. دەپۋتاتتار كورپۋسى مەن اتقارۋشى بيلىك ورگاندارى، ەڭ الدىمەن ەل ايماقتارىنداعى الەۋمەتتىك ماسەلەلەر مەن تۇرعىنداردىڭ مۇڭ-مۇقتاجىنا باسا نازار اۋدارۋى ءتيىس. قوعامنىڭ تۇراقتىلىعىنا قاۋىپ توندىرەتىن جاعدايلارعا جول بەرمەۋ ءۇشىن الدىن الۋ شارالارى جەدەل تۇردە ءارى ۋاقىتىندا قابىلدانۋى كەرەك»، - دەدى سەنات توراعاسى.

ق.توقاەۆ دەپۋتاتتاردى، ورتالىق جانە جەرگىلىكتى بيلىك ورگاندارىن قوعام ومىرىندەگى ءارتۇرلى جاعدايلاردى ناقتى ءارى دالمە-ءدال جەتكىزۋ ءۇشىن الەۋمەتتىك جەلىلەردى ساۋاتتى، جاۋاپكەرشىلىكپەن ءارى بىلىكتى تۇردە پايدالانۋعا شاقىردى.

سەنات توراعاسىنىڭ پىكىرىنشە، الەم الەۋمەتتىك-ەكونوميكالىق جانە ساياسي دۇربەلەڭ كەزەڭىنە تاپ بولدى. قازاقستان ءوزىنىڭ كۇمانسىز جەتىستىكتەرىمەن قوسا، وكىنىشكە وراي، ناشار تۇستارىمەن دە كۇللى جاھاندىق قوعامداستىقتىڭ بولىنبەس بولشەگى بولىپ تابىلادى. ق.توقاەۆ بۇل جاعدايدا ءبىزدىڭ پرەزيدەنت ستراتەگياسىنىڭ ماقساتتارى مەن مىندەتتەرىن جۇرتشىلىققا جەتكىزۋ جونىندەگى جۇمىستاردىڭ ءۇستىرت، تاپتاۋرىن سيپاتتان ارىلۋىنا دەپۋتاتتاردىڭ نازارىن اۋداردى. «ءبىزدىڭ مەملەكەتىمىزدىڭ بۇگىنى مەن كەلەشەگى تۋرالى مازمۇندى ءارى قىزىقتى پىكىر الماسۋ بولۋى ءتيىس»، - دەدى توراعا.

ق.توقاەۆ جاستار جىلىنا بايلانىستى بىرقاتار ۇسىنىستار ايتتى. ونىڭ ايتۋىنشا، ەلىمىزدەگى بەلسەندى ءارى بىلىكتى جاستاردىڭ وكىلدەرىن مەملەكەت مۇددەسىن ىلگەرىلەتۋ ىسىنە تارتۋ ماقساتىندا سەناتورلاردىڭ بەلسەندى جۇمىس ىستەۋى قاجەت. پارلامەنت جوعارعى پالاتاسىنىڭ باسشىسى سەناتتا وتەتىن ءىس-شارالارعا، ونىڭ ىشىندە جالپى وتىرىستار مەن كوميتەتتەردىڭ استانالىق جانە ايماقتىق جوعارى وقۋ ورىندارىنىڭ ستۋدەنتتەرىن، كاسىپورىنداردىڭ جاس جۇمىسشىلارى مەن كومپانيالار قىزمەتكەرلەرىنىڭ قاتىسۋىن ۇيىمداستىرۋدى ۇسىندى. ق.توقاەۆ قوعامدىق ۇيىمداردىڭ، ونىڭ ىشىندە «جاس وتان» وكىلدەرىنىڭ قاتىسۋىمەن مەملەكەتتىڭ جاستار ساياساتى ماسەلەلەرى بويىنشا ارنايى شارالار وتكىزۋدى ءجون سانايدى.

ق.توقاەۆتىڭ سوزىندە ايتىلعان وزەكتى ماسەلەلەر بويىنشا بيۋرو مۇشەلەرى مۇددەلىلىك تۇرعىسىندا پىكىر الماستى.

بيۋرو وتىرىسىندا پالاتانىڭ 17 قاڭتاردا بولاتىن كەزەكتى وتىرىسىنىڭ كۇن ءتارتىبى بەكىتىلدى.

دەپۋتاتتاردىڭ قاراۋىنا قازاقستان مەن تاجىكستان اراسىنداعى كوشى-قون جانە ازاماتتاردىڭ ورىن اۋىستىرۋى ماسەلەلەرىن رەتتەيتىن ءۇش كەلىسىمدى راتيفيكاتسيالاۋ تۋرالى زاڭ جوبالارى ەنگىزىلدى. اتاپ ايتقاندا، سەنات كوشى-قون سالاسىنداعى ىنتىماقتاستىق، ادامداردىڭ رەادميسسياسى، قازاقستان ازاماتتارىنىڭ تاجىكستان اۋماعىندا جانە تاجىكستان ازاماتتارىنىڭ قازاقستان اۋماعىندا بولۋ ءتارتىبى تۋرالى ۇكىمەتارالىق كەلىسىمدەردى تالقىلايدى. ودان باسقا، پالاتا ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋى تۋرالى شارتقا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسىن قارايدى.

بيۋرودا ماجىلىستەن تۇسكەن زاڭ جوبالارى باس كوميتەتتەرگە ءبولىنىپ بەرىلدى. قازاقستان مەن قىرعىزستان اراسىنداعى قازاقستان-قىرعىز مەملەكەتتىك شەكاراسىنىڭ رەجيمى تۋرالى كەلىسىمدى جانە تمد-عا قاتىسۋشى مەملەكەتتەردىڭ تەرروريزمگە قارسى كۇرەستى جۇزەگە اسىراتىن قۇزىرەتتى ورگانداردى ماتەريالدىق-تەحنيكالىق قامتاماسىز ەتۋدەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى زاڭ جوبالارى بويىنشا حالىقارالىق قاتىناستار، قورعانىس جانە قاۋىپسىزدىك  كوميتەتى باس كوميتەت بولىپ بەلگىلەندى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz

0 پىكىر