Jeksenbi, 25 Tamız 2019
Sañlaq 1858 3 pikir 1 Aqpan, 2019 sağat 15:01

Timur Segizbaevtiñ siqırlı öneri

HH ğasır halqımız üşin jauırındı mwzdatar jauızdıqtarımen ğana emes, jürekti jılıtar jaqsılıqtarımen de este qaldı. Mädeniet pen sport salasındağı marqasqa twlğalarımız ötken ğasırdıñ özinde-aq el namısın tu etip kötergen edi. Solardıñ biri qazaq sportınıñ sañılağı Timur Segizbaev bolatın.

Qazaq futbolınıñ qara şañırağı sanalatın Semey öñirinde tuğan Timur Sanjarwlı bizdiñ de aladopta alınbağan enşimiz bar ekenin däleldep berdi. Biz sekildi futbolğa keş kelgen halıq üşin Timurday bir wldıñ tuğanı da maqtan. Teñbil dopta özgemen terezesin teñestiru mindeti de äne sol Timurlardıñ moyınında!

Almatınıñ ortalıq stadionına «Qayrattıñ» oyının tamaşalauğa bara qalsañız körermender qatarında jası jetpisten asıp, seksenge tayağan talay köneköz janküyerdi köresiz. Qartayğan jastarına qaramay «Qayrat» dep wrandağanda janayqayları jastardı basıp ozadı. Däl osı futbol süyer ağalarımzdı bügingi Isael' nemese Arşavinniñ janküyerleri deuge tipten qimaysıñ. Menşe olar ötken ğasırda wlt namısı bolğan “Halıq komandası - Qayrattıñ” qoldauşıları. Anıqıraq aytqanda, Timur Segizbaevtardıñ siqırlı önerine arbalğandar ekeni sözsiz.

Odaqtas respublikalar arasında Reseydiñ futbolı basqalarına qarağanda köş ilgeri boldı. Tipti KSRO qwraması älemdegi alpauıt wjımdardıñ biri bolğan. Alayda odaq qwramındağı Qazaqstan sekildi bodan elderdiñ sportı ozıq bola qoyğan joq. Dese de, mıñ jerden Mäskeuge bağındı degeniñizben, el namısı söz bolğan jerde är wlt öz wlınıñ şaşbauın köteretin. Sodan da bolar «Qayrat» körşiles elderdiñ komandasımen kezdesu ötkizgende bükil qazaqstandıqtar taqımın qısıp, tileuin tileytin bolğan.

Ärine, «Qayrat» ta el ümitin jerge tastamağan körinedi. Özbektiñ «Pahtakorına» tizesin batırıp, Mäskeulik komandalarmen de küş sınasıp twratın. Sonday sätte komanda sapında jasınday jarqıldağan Timur Segizbaev bar qazaqtıñ maqtanışı bolğan desedi. Qazaq ejelden “bir wlın maqtasa töbesin kökke tigizetin, jamandasa basın jerge jetkizetin” halıq. Äne sol halıqtıñ mahabbatına bölengen Segizbaev esimi qazaqtıñ sayın dalasında añız bolıp esken körinedi. Aqköñil halıq süygen wlın maqtağanda mäskeulikteriñ jolda qalıp, tura ataqtı Peleniñ özimen qatar qoyğan eken. “Timur doptı qaqırata tepkende qarsılas qaqpası qaq ayırladı” dep añız etetin bolğan.

Solay demegende qaytsın?! Bötenge bodan bolıp, özgege esesi ketip jürgen halıq özinen tuğan bir wldıñ basqadan oza şapqanın körgende qalay quanbasın?! KSRO futbol äleminde Timur Segizbaevtiñ jarq etip şığa kelui qazaq halqınıñ aybının asırıp, mereyin bir kötergeni şındıq. Onıñ ataqtı «Spartak» sındı komandalarğa gol soğuın är qazaq öz jeñisi retinde qabıldağanı sözsiz. Däl sol sättegi quanış bügingi bizdiñ Gennadiy Golovkinniñ jeñisine quanğanımızdan äldeqayda äserli bolsa kerek.

Ol zamanda futbolşılar bügingidey aqşa üşin, ataq üşin oynamaytın. Janküyerler de futboldı bügingidey qızıq üşin, bolmasa bukmekerlik keñselerden aqşa wtıp alu üşin körmeytin. Oyınşılar el men jerdiñ namısı üşin jasıl alañda janın salsa; köp körermen solardıñ tiluin tilep jandarın şüperekke tüyip otıratın. Osı sözimizdiñ däleli üşin ayta keteyik, «Qayratqa» qoldau körsetu üşin Säbit Mwqanov, Äbdildä Täjibaev, Şäken Aymanov, Twmanbay Moldağaliev sındı wlttıñ wlı twlğaları ortalıq stadionğa jii baratın bolğan. Osınday adal janküyerleri üşin Timur Segizbaev, Qwralbek Ordabaev, Seydilda Bayşaqovtar da bar şeberlikterin şığaruğa tırısatın.

Soldan oñğa qaray: Sergey Volgin, Timur Segizbaev, Vahid Masudov

Timur Segizbaev bar bolğanı 29 jasında jasıl alañğa qoş aytqan. Jaraqat sebebinen. Biraq, futboldağı sol qısqa ğwmırınıñ özinde şeberligine talaydı tänti etip ülgirgen. Tipti, bodan wlttı oñay-ospaq maqtay bermeytin mäskeulik mamandardıñ özi Timur ağanıñ önerine tamsanıp, talay maqala jazğanın tarih betteri rastap otır. Ol kisiniñ oyın mäneri jaylı jazğan mamandardıñ köbi, “30-40 metr alıstan goldıq pastar şığarudı wnatatın, keyde sonday qaşıqtıqtan qaqpağa soqqı da bağıttap twratın” deydi. Äri pastarınıñ öte däl, soqqılarınıñ swrapıl bolğanın estelik etip aytadı. Osı jerde qazirgi futbol süyer qauımğa tüsinikti bolu üşin ayta keteyik, siz önerine tamsanıp jürgen Luka Modriç, Kristian Eriksondarıñızdıñ oyın stili sol bizdiñ Timur ağağa wqsaytın bolsa kerek.

Segizbaevtiñ siqırlı önerin endi sağına eske alamız. Ol kisiniñ baqilıq bolğanına da bir jıldan astam uaqıt ötti. Qayğısı men quanışı qatar jüretin qazaq osıdan bir jıl bwrın, täuelsizdik merekesi qarsañında qazaqtan şıqqan alğaşqı käsibi futbolşı Timur Sanjarwlı Segizbaevti soñğı saparğa attandırğan bolatın. El esinde qalğan esil er, qazaq futbolınıñ qara narına qanday qwrmet körsetse de layıq. Osı orayda, soñğı kezderi jii aytılıp jürgen Almatıdağı "ortalıq stadionğa" Timur Segizbaevtiñ esimin bersek degen wsınıstı qoldaytınımızdı ayta keteyik.

Quanış Qappas 

Abai.kz

Foto: uefa.com, sportsffa.kz

3 pikir