Düysenbi, 17 Mausım 2019
Bir saual 1230 5 pikir 13 Naurız, 2019 sağat 11:49

Joğarı bilimniñ qwnı qanşa?

Qazaqstannıñ qay aymaqtarında joğarı bilim eñ qımbatqa tüsedi, balanıñ bilim aluına qordı qaşan jinap bastağan dwrıs jäne mwnı qalay jasauğa boladı.

Jıl sayın jüz mıñdağan qazaqstandıq joğarı sınıp oquşıları bolaşaqta kim bolamın jäne qay universitetke oquğa tüsemin degen kürdeli tañdau aldında twradı. Köp närse: bolaşaqta eñbek narığında swranısqa ie bolu, eñbekaqı mölşeri jäne mansaptıq perspektivalar naq osı şeşimge baylanıstı boladı.

QR statistika jönindegi komitetiniñ derekteri boyınşa, 2018 jılı qazaqstandıq joğarı oqu orındarına 163 336 adam oquğa tüsken. Al barlığı ötken jılda elimizde 542 258 student boldı. Talapkerler arasındağı eñ tanımal mamandıqtar halıqaralıq qwqıq, qarjı, ekonomika jäne qwqıqtanu boldı. Alayda soñğı birneşe jılda İT salasımen, bağdarlamalaumen, derekterdi taldaumen, robototehnikamen, genetikamen baylanıstı mamandıqtarğa qızığuşılıq qattı arttı.

Qazirgi uaqıtta elimizde 124 joğarı oqu ornı jwmıs isteydi, olardağı oqu qwnı aytarlıqtay qattı özgeşelenedi. «Freedom Finance Life» ömirdi saqtandıru kompaniyasınıñ mamandarı aşıq közderden jäne qazaqstandıq joğarı oqu orındarınıñ qabıldau komissiyalarınan alınğan derekterdi taldap, bakalavriatta bir jılğı oqu qwnı boyınşa QR aymaqtarınıñ reytingin qwrastırdı.

«Ortaşa eseppen alğanda, qazaqstandıq universitet bakalavriatındağı bir jıldıq oqu student üşin 396 307 teñgege aynaladı, - dep mälimdedi «Freedom Finance Life» ömirdi saqtandıru  kompaniyasınıñ Basqarma törağası Azamat Erdesov. – Tiisinşe bakalavriattıñ tört jılına 1 585 228 teñge töleu qajet boladı. Köptegen qazaqstandıqtar üşin bwl – jinau qiınğa tüsetin ülken soma. Äsirese joğarı bilimniñ jıl sayın 10-15%-ğa qımbattap otıratındığın eskeretin bolsaq».

Taldau nätijeleri boyınşa, eñ qımbat joğarı bilim – Almatı qalasında: mwnda bakalavriattağı bir jıldıq oqudıñ ortaşa qwnı studentke 671 397 teñgege aynaladı. Tört jılğa 2 685 588 teñge töleuge tura keledi. Ayta ketu kerek, bwl – almatılıq joğarı oqu ornındağı oqudıñ ortaşa qwnı ğana. Oñtüstik astanağa elimizdegi barlıq joğarı oqu orındarınıñ 33%-ı tiesili, sondıqtan qwn ayırması öte ülken jäne jılına 205 000 teñgeden bastap 2 157 000 teñgege deyin türlenedi.

Reytingte Almatıdan keyin Almatı oblısı men Astana twr. Bwl aymaqtarda bakalavriattağı bir jıldıq oqu ortaşa eseppen alğanda tiisinşe 542 216 jäne 532 384 teñge boladı. Bwl rette bir jıldıq oqudıñ eñ joğarğı qwnı – Almatı oblısında 1 250 000 teñge jäne Astanada 1 000 000 teñge.

Reytingte olardıñ soñınan Aqtöbe oblısı (jılına 484 333 teñge), Soltüstik Qazaqstan oblısı (jılına 450 000 teñge) jäne Şığıs Qazaqstan oblısı (jılına 444 114 teñge) ilesedi. Qazaqstannıñ barlıq aymaqtarı boyınşa nätijeler tömendegi kestede keltirilgen.

Rüstem Alamanov

Abai.kz

5 pikir