Särsenbi, 11 Jeltoqsan 2019
Sañlaq 8033 18 pikir 14 Mamır, 2019 sağat 13:44

Mirzieev jemqorlıqtı joyıp, qazaq sportın «nokdaunğa» tüsirdi

Soñğı kezderi boks sportınıñ basınan dau arılmay jür. Äsirese äuesqoy bokstıñ basınan baq taydı. Töreşilerdiñ bwra tartuı men barmaq bastı - köz qıstılıq älemdik arenadağı bokstıñ bedelin tım tömendetip jiberdi. Tipti halıqaralıq Olimpiada komiteti bokstı 2020 jılğı Olimpiada oyındarınıñ bağdarlamasınan alıp tastau mäselesin de qarastırıp jatqan körinedi. 

Oğan qosa, qazaqstandıq boksşılardıñ da nätijesi naşarlap baradı. Bwrın Aziyada ğana emes, älemdik deñgeyde boks derjavası sanalatın Qazaqstan soñğı eki-üş jılda qarqının bäseñdetip aldı. Tipti 2018 jılı ötken Aziya oyındarında birde-bir altın medal' ala almadı. Sonımen qatar, Bükilälemdik boks seriyasınıñ (WSB) segiz mausımına qatısıp, barlığında jüldeli orınnan köringen «Astana Arlans» komandası taratıldı.

Al qazirgi sätte Aziyanıñ alıbı Özbekstan bolıp twr. Bizdiñ boksşılar älemdik dodalarda osı eldiñ sportşılarınan jii jeñilip jür. Mäselen, 2017 jılı Taşkentte ötken Aziya çempionatında qanday "qızıq" bolğanın bärimiz bilemiz. Öz jerinde ötken çempionatta özbek ağayındarımız 10 salmaqtıñ 9-ında altın medal' alıp, aydı aspanğa şığarğan. Alañ ielerinen artılğan jalğız bas jülde bizge bwyırdı da, özge 27 eldiñ boksşıları "altınsız" qalğan.

Bwnı bärimiz ala şapandı ağayındardıñ bwra tartuı dep bildik. Öz jerinde ötken qwrlıq birinşiliginiñ bar "altının" alıp alğanın külki etkenbiz. Söytsek, bwl eldiñ boksşıları şınmen küş ala bastaptı. Odan keyin ötken turnirlerde de biz özbekterdiñ aldın oray almadıq. Mäselen, biıl 16-26 säuir aralığında Tailand astanası Bangkokta ötken HHH Aziya çempionatında Özbekstannan tağı jeñildik. Bizdiñ qwrama Tailandta 2 altın, 2 kümis, 3 qola medal' aldı. Al özbekter 4 altın, bir kümis, bir qola jüldege qol jetkizdi.

Elimiz boksşıları 2017 jıldan bwrınğı üş kezekti Aziya çempionatında da komandalıq esepte köş bastağan. Atap aytqanda, 2011 jılı Oñtüstik Koreyanıñ Inçhon qalasında eki altın medal', 2013 jılı Iordaniyanıñ Amman qalasında jeti altın medal', 2015 jılı Tailandtıñ Bangkok qalasında bes altın medal' jeñip alıp, jalpı esepte jeñiske jetken. Al soñğı eki birinşilikte "öz ağalarımız" üstemdik etip jür.

2018 jılı Indoneziya elinde ötken XVIII Aziya oyındarında bizdiñ boksşılar bar bolğanı eki kümis medalge qol jetkizdi.. Al özbekstandıqtar 5 altın, 2 kümis jülde jeñip aldı. Kümis alğan eki qazaqstandıq Aslanbek Şımbergenov (69 keli) pen Äbilhan Amanqwl (75 keli) ekeui de finalda özbek boksşısına ese jiberdi. Aqtıq sında Aslanbek Bobo Usman Baturovtan, al Äbilhan Israil Madrimovtan jeñildi.

Osı sätsizdikten keyin 12-18 qaraşa aralığında Aqtau qalasında ötken bokstan Qazaqstan çempionatı qorıtındısına say wlttıq qwrama qayta jasaqtaldı. Al jeltoqsanda bokstan Qazaqstan qwramasınıñ bas bapkeri auıstı. Bokstan bas komandanı toğız jıl jattıqtırğan Mırzağali Aytjanovtıñ ornına Ğalımbek Kenjebaev tağayındaldı. Wzaq uaqıt Qazaqstan jastar qwramasın jattıqtırğan Kenjebaev kelgeli bas qwramada biraz özgeris bolğanı ras. Biraq, bwrınğı biikke köterilu üşin äli köp jwmıs isteu kerek.

Ğalımbek Kenjebaev säuir ayında Tailandta ötken Aziya çempionatına mına boksşılardı apardı:

49 keli - Temirtas Jüsipov - qola medal'
52 keli - Änuar Mwzaparov - 1/8 final
56 keli - Qayrat Eräliev - şirek final
60 keli - Zäkir Safiullin - kümis medal'
64 keli - Sanatäli Töltaev - qola medal'
69 keli - Aslanbek Şımbergenov - şirek final
75 keli - Twrsınbay Qwlahmet - altın medal'
81 keli - Bek Nwrmağanbet - altın medal'
91 keli - Vasiliy Levit - qola medal'
+91 keli - Qamşıbek Qoñqabaev - kümis medal'

Bwl ötken jılı qaraşa ayında qayta jasaqtalğan Qazaqstan qwramasınıñ birinişi nomerli boksşıları. Tek jaraqat alğan Äbilhan Amanqwldıñ (75 keli) ornına Twrsınbay Qwlahmet bardı. Qızordalıq boksşı Bangkokta keremet öner körsetti. Käsipqoy boksşılarşa kösilte silteytin jwdırıqtarınıñ arqasında altın medal' jeñip aldı. Tipti 2018 jılı Aziya oyındarınıñ finalında Äbilhan Amanqwldı jeñgen özbek boksşısı Israil Madrimovtı oñay wttı.

Aziya çempionatınan keyin, mamır ayınıñ basında Qızılordada bokstan erler arasındağı Qazaqstan Respublikasınıñ V Spartakiadası ötti. Sır boyında 146 boksşı baq sınadı. Endi sol turnirdiñ jeñimpazdarı men jüldegerlerin atay keteyik:

49 keli
1. Ashat Jüsipov (Nwr-Swltan)
2. Jomart Erjan (Türkistan oblısı)
3. Jandos Nesipjan (Almatı obl), Ermek Mädiev (Jambıl obl)

Bwl salmaqta qazirgi tañda eñ mıqtı boksşı Temirtas Jüsipov ekeni sözsiz. 2018 jılı elimizdiñ "eñ üzdik boksşısı" atanğan Temirtas jaqın arada birinşi nomerdi eşkimge bere qoymas. Biraq jası 31-den astı. Bizdiñ oyımızşa, Jomart Erjan oğan bäsekeles boluğa layıqtı boksşı.

52 keli
1. Säken Bibosınov (Türkistan oblısı)
2. Evgeniy Pavlov (SQO)
3. Abay Quandıqov (Aqtöbe obl), Azat Mahmetov (Nwr-Swltan)

Bwl salmaqta Änuar Mwzaparov negizgi qwramda öner körsetip jür. Biraq Säken Bibosınovtıñ (1997 jıl) qarqını jaman emes. Ötken jılı ğana wlttıq qwramağa alınğan türkistandıq boksşı jaqsı ösip keledi.

56 keli
1. Nwrbol Qaljanov (Mañğıstau)
2. İliyas Süleymenov (Nwr-Swltan)
3. Orazbek Asılqwlov (Aqmola obl), Nığmetulla Moldaşev (ŞQO)

Bwrınğı bapker Aytjanovtıñ süyikti boksşılarınıñ biri Qayrat Eräliev "qartaya" bastadı. İliyas Süleymenov te jas emes. Demek, bwl salmaqta endi şığıp kele jatqan jas boksşılardıñ birine senim artu kerek şığar. Wlttıq qwramada ekinşi nomerli boksşı - Orazbek Asılqwlov (1998 jılı tuğan).

60 keli
1. Samatäli Töltaev (Mañğıstau)
2. Ädilet Qwrmetov (ŞQO)
3. Erswltan Bolat (Aqmola obl), Serik Temirjanov (Pavlodar obl)

Mañğıstaulıq egiz boksşılardıñ jetistigi jaman emes. Samatäli Töltaev bwl salmaqta qazirşe ekinşi nomerli boksşı. 32 jastağı Zäkir Safiullin Aziya çempionatında jaqsı öner körsetti. Biraq, 1999 jılı qaraşada düniege kelgen Töltaevtiñ bolaşağı zor. Qızlordada täjiribeli Ädilet Qwrmetovtı jeñip ketui tegin emes.

64 keli
1. Dilmwrat Mijitov (Almatı)
2. Nwrjan Maqaşbaev (Almatı oblısı)
3. Sabırjan Bekbergenov (Aqmola obl), Sabırjan Äbilov (Qızılorda obl)

Bwl salmaqta mañğıstaulıq egiz boksşılardıñ sıñarı Sanatäli Töltaev köşbasşı. Aziya çempionatında qola jüldeger atandı. Sonımen qatar, türkistandıq Bekdäulet Ibragimov te üzdik boksşı.

69 keli
1. Talğat Şayken (Aqmola oblısı)
2. Ayatolla Täkijanov (Pavlodar oblısı)
3. Stanislav Coy (Jambıl obl), Qanağat Maralov (Nwr-Swltan )

"Qazaqtıñ salmağı" atanğan 69 kelide üzdikter az emes. Abılayhan Jüsipov bar, Aslanbek Şımbergenov bar. Biraq, soñğısı iri turnirlerde "altın" almağalı köp boldı. 2018 jılı Aziya oyındarında, biıl Aziya çempionatında özbek Bobo Usman Baturovtan jeñildi. Eger Abılayhan men Aslanbek jalğastı sätsiz öner körsetetin bolsa jastarğa mümkindik bergen jön şığar. 2018 jılğı jasöspirimder arasındağı Olmipiadanıñ kümis jüldegeri Talğat Şayken sekildi jastar ösip keledi.

75 keli
1. Timur Nwrseyitov (Nwr-Swltan)
2. Ermahan Jakpekov (ŞQO)
3. Erswltan Sovetov (Qarağandı obl), Amandıq Manaşev (Atırau obl)

Bwl salmaqtıñ köşbasşısı Äbilhan Amanqwl bolğanımen, janküyer qauım Twrsınbay Qwlahmettiñ önerine tänti boldı. Äbilhandı jeñgen özbek boksşısın Tailand jerinde qualap jürip sabadı. Biraq Äbilhan özin moyındatqan jas (21 jasta) äri mıqtı boksşı. Aldağı uaqıtta ekeuiniñ arasında qızu tartıs jüretin sekildi.

81 keli
1. Nwrbek Oralbay (Nwr-Swltan)
2. Erik Äljanov (Mañğıstau)
3. Quandıq Jüsip (Qızılorda obl), Dinislam Äbdeşov (Türkistan obl)

Bwl salmaqtıñ mıqtısı - Bek Nwrmağanbet. 1998 jılı düniege kelgen Bek Aziya çempionatında eş qiındıqsız jeñiske jetti. Biraq, Jasöspirimder arasında älem çempionı Nwrbek Oralbaydıñ da qarqını jaqsı. Qazaq boksındağı tağı bir egiz boksşılardıñ sıñarı Nwrbek biıl Qızlordada Spartakiada jeñimpazı atandı. Finalda täjiribeli Erik Äljanovtı jeñdi.

91 keli
1. Aybek Oralbay (Nwr-Swltan)
2. Oñtalap Rahmanov (Qızılorda obl)
3. Bekzat Nwrdäuletov (Mañğıstau), Abzal Qwttıbekov (Türkistan obl)

Wlttıq qwrama sapında öner körsetip jürgen egizderdiñ qatarında Aybek Oralbay da bar. 2000 jılı düniege kelgen Aybek pen Nwrbek qazaq boksınıñ bastı ümitteri. Aybek Oralbay jasöspirimder arasındağı Olimpiada oyındarınıñ jeñimpazı. 91 kelide birinşi nomerli boksşı Vasiliy Levit. Biraq jası 31-ge kelgen Levitti Tailandta käris boksşısı nokautqa tüsirip ketti. Demek, 19 jastağı Aybektiñ Vasiliymen küş sınasatın kezi alıs emes.

+ 91 keli
1. Nwrbolat Sermahanov (Nwr-Swltan)
2. Serjan Seytimbetov (Aqtöba obl)
3. Danil Semenov (Qostanay obl), Nwrswltan Amanjolov (Jambıl obl)

Bwl salmaqta Qamşıbek Qoñqabaev köşbasşı. Qazirişe, onıñ ornına talasatın anıq favorit körinbeydi. Biraq Nwrlan Saparbay (1997 jılı tuğan), Nwrbolat Sermahanov sındı jaqsı boksşılar bar. Sonımen qatar, jasöspirimder arasındağı Olimpiadanıñ kümis jüldegeri Damir Toybay da täuir boksşı.

Büginge deyin sportta kindik Aziyanıñ köşbasşısımız dep jürip Özbekstannıñ qalay ozıp ketkenin bayqamay qalıppız. Endi säp salıp qarasaq, oñtüstiktegi körşimizdiñ bwl jetistigi kezdeysoq emes eken. Qayta memleket tarapınan sportqa oñ közqaras qalıptasuınan bolsa kerek.

2018 jılı qañtar ayında Özbekstan jastar qwraması jastar arasındağı Aziya Çempionatında top jardı. Aziya çempionı atanğan jas futbolşılardı marapattau räsimine qatısqan Özbekstan basşısı Şavkat Mirzieev: «Biz sporttağı jemqorlıqtı joydıq. Mine, sonıñ nätijesi, jastarımız qwrlıq çempionı atanıp jatır», - dedi.

Özbek Prezidentiniñ osı sözi orındı sekildi seziledi bizge. Sporttı damıtudıñ jolı daurığıp dollar şaşu emes körinedi. Aqşa men sayasattıñ äseri jürgen jerde sporttıñ körer küni daurıqpa wrandar men jeñ wşınan jalğasqan jemqorlıq bolmaq.

Quanış Qappas

Abai.kz

18 pikir