Seysenbi, 17 Qırküyek 2019
Abay.tv 6173 17 pikir 10 Mamır, 2019 sağat 19:47

«Jusan-2» operaciyası. Siriyadan 231 otandasımız qaytarıldı

2019 jıldıñ 7-9 mamırı aralığında Qazaqstannıñ arnayı qızmetteri qabıldağan şaralar nätijesinde Siriyadan qazaqstandıq azamattardıñ, äsirese äyelder men balalardıñ ekinşi tobı qaytarıldı.

Auqımı boyınşa bwrın-soñdı bolmağan arnayı operaciya nätijesinde Siriyadan 59 äyel men 156 bala evakuaciyalandı. Bwl turalı Aqordanıñ resmi saytında jariyalanğan Qazaqstan Respublikasınıñ Prezidenti Qasım-Jomart Toqaevtıñ mälimdemesinde aytıldı.

- Meniñ tapsırmam boyınşa 7 jäne 9 mamır künderi Siriyadan 231 Qazaqstan azamatı elge jetkizildi, onıñ 156-sı balalar, deni mektep jasına deyingiler, sonıñ işinde 18-i – jetim balalar.

Bwl auqımdı gumanitarlıq akciya – Twñğış Prezident –Elbası Nwrswltan Nazarbaevtıñ tapsırmasımen biıl qañtar ayında jürgizilgen «Jusan» operaciyasınıñ jalğası boldı.

Memlekettik organdar men ükimettik emes wyımdar elimizge qaytarılğan azamattarmen oñaltu şaraların jürgizdi. Olarğa medicinalıq, psihologiyalıq jäne äleumettik kömek körsetildi.

Qazirdiñ özinde atalğan jwmıstıñ oñ nätije berip otırğanı turalı aytuğa boladı. Biıl qañtar ayında elge oralğan äyelder bwrınğı radikaldıq ömirinen bas tarttı, jwmısqa ornalastı, tuıstarımen qayta baylanıs ornattı. Balaları mektepke, balabaqşağa bardı.

Qaqtığıs aymaqtarına şıqqan Qazaqstan azamattarı mwnday oysız qadamğa terroristerdiñ teris, şın mäninde, jalğan ügit-nasihatınıñ ıqpalımen bardı. Büginde olar jaña ömir bastau üşin öz erkimen Qazaqstanğa oraluda. Olardıñ jasağan qateligi üşin balaları özge elde qinalıp, zardap şekpeui tiis.

Qazaqstan terrorizmmen küres jürgizu, sonday-aq qiın jağdayda qalğan azamattarına qol wşın sozu mindettemelerinen bas tartpaydı. Gumanitarlıq akciya jalğasa beredi. Biz öz azamattarımızdıñ tağdırına eşqaşan bey-jay qaramaymız.

Atalğan gumanitarlıq operaciyağa qatısqan Sırtqı ister ministrliginiñ, Wlttıq qauipsizdik komitetiniñ  jäne basqa da memlekettik organdardıñ qızmetkerlerine jäne şeteldik seriktesterge alğısımdı bildiremin, - dedi memleket basşısı.

Abai.kz

17 pikir