جۇما, 24 مامىر 2019
اباي.tv 3348 17 پىكىر 10 مامىر, 2019 ساعات 19:47

«جۋسان-2» وپەراتسياسى. سيريادان 231 وتانداسىمىز قايتارىلدى

2019 جىلدىڭ 7-9 مامىرى ارالىعىندا قازاقستاننىڭ ارنايى قىزمەتتەرى قابىلداعان شارالار ناتيجەسىندە سيريادان قازاقستاندىق ازاماتتاردىڭ، اسىرەسە ايەلدەر مەن بالالاردىڭ ەكىنشى توبى قايتارىلدى.

اۋقىمى بويىنشا بۇرىن-سوڭدى بولماعان ارنايى وپەراتسيا ناتيجەسىندە سيريادان 59 ايەل مەن 156 بالا ەۆاكۋاتسيالاندى. بۇل تۋرالى اقوردانىڭ رەسمي سايتىندا جاريالانعان قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ مالىمدەمەسىندە ايتىلدى.

- مەنىڭ تاپسىرمام بويىنشا 7 جانە 9 مامىر كۇندەرى سيريادان 231 قازاقستان ازاماتى ەلگە جەتكىزىلدى، ونىڭ 156-سى بالالار، دەنى مەكتەپ جاسىنا دەيىنگىلەر، سونىڭ ىشىندە 18-ءى – جەتىم بالالار.

بۇل اۋقىمدى گۋمانيتارلىق اكتسيا – تۇڭعىش پرەزيدەنت –ەلباسى نۇرسۇلتان نازارباەۆتىڭ تاپسىرماسىمەن بيىل قاڭتار ايىندا جۇرگىزىلگەن «جۋسان» وپەراتسياسىنىڭ جالعاسى بولدى.

مەملەكەتتىك ورگاندار مەن ۇكىمەتتىك ەمەس ۇيىمدار ەلىمىزگە قايتارىلعان ازاماتتارمەن وڭالتۋ شارالارىن جۇرگىزدى. ولارعا مەديتسينالىق، پسيحولوگيالىق جانە الەۋمەتتىك كومەك كورسەتىلدى.

قازىردىڭ وزىندە اتالعان جۇمىستىڭ وڭ ناتيجە بەرىپ وتىرعانى تۋرالى ايتۋعا بولادى. بيىل قاڭتار ايىندا ەلگە ورالعان ايەلدەر بۇرىنعى راديكالدىق ومىرىنەن باس تارتتى، جۇمىسقا ورنالاستى، تۋىستارىمەن قايتا بايلانىس ورناتتى. بالالارى مەكتەپكە، بالاباقشاعا باردى.

قاقتىعىس ايماقتارىنا شىققان قازاقستان ازاماتتارى مۇنداي ويسىز قادامعا تەرروريستەردىڭ تەرىس، شىن مانىندە، جالعان ۇگىت-ناسيحاتىنىڭ ىقپالىمەن باردى. بۇگىندە ولار جاڭا ءومىر باستاۋ ءۇشىن ءوز ەركىمەن قازاقستانعا ورالۋدا. ولاردىڭ جاساعان قاتەلىگى ءۇشىن بالالارى وزگە ەلدە قينالىپ، زارداپ شەكپەۋى ءتيىس.

قازاقستان تەرروريزممەن كۇرەس جۇرگىزۋ، سونداي-اق قيىن جاعدايدا قالعان ازاماتتارىنا قول ۇشىن سوزۋ مىندەتتەمەلەرىنەن باس تارتپايدى. گۋمانيتارلىق اكتسيا جالعاسا بەرەدى. ءبىز ءوز ازاماتتارىمىزدىڭ تاعدىرىنا ەشقاشان بەي-جاي قارامايمىز.

اتالعان گۋمانيتارلىق وپەراتسياعا قاتىسقان سىرتقى ىستەر مينيسترلىگىنىڭ، ۇلتتىق قاۋىپسىزدىك كوميتەتىنىڭ  جانە باسقا دا مەملەكەتتىك ورگانداردىڭ قىزمەتكەرلەرىنە جانە شەتەلدىك سەرىكتەستەرگە العىسىمدى بىلدىرەمىن, - دەدى مەملەكەت باسشىسى.

Abai.kz

17 پىكىر