Jeksenbi, 25 Tamız 2019
Sayasat 5746 0 pikir 12 Mamır, 2019 sağat 20:01

Qasım-Jomart Toqaev öz ştabınıñ müşelerimen kezdesti

QR Prezidenttigine kandidat Qasım-Jomart Toqaev Respublikalıq qoğamdıq ştabqa kelip, qızmetkerlermen, aktivistermen kezdesti. «Nur Otan» partiyası Ortalıq apparatınıñ ğimaratında «Jwmıstı wyımdastıru ortalığı», «Josparlau, saraptau, jäne monitoring ortalığı», «Qarjılıq qoldau ortalığı», «Qwqıqtıq saraptau ortalığı», «Logistika jäne materialdıq qamtamasız etu ortalığı», «Baspasöz ortalığı» jäne respublikalıq qoğamdıq ştabtıñ «TimeQazaqstan» jastar qanatınıñ jwmıstarımen tanıstı. 

Jalpı respublikalıq qoğamdıq ştabqa 190 adam kirgen, onıñ 30-ı «TimeQazaqstan» jastar qanatınıñ müşesi. Jalpı el aumağında 17 aymaqtıq, 210 qalalıq jäne audandıq qoğamdıq ştab jwmıs istep, onda 6 mıñğa juıq adam qızmet körsetetin boladı. Kandidattıñ 19 500 senimdi ökili anıqtalğan.

Qasım-Jomart Toqaevqa saylaualdı nauqannıñ ügit-nasihat jwmıstarınıñ bastalğanı jöninde jan jaqtı aqparat berildi.

QR Prezidenttigine kandidat respublikalıq jäne aymaqtıq qoğamdıq ştab basşılarımen jäne müşelerimen keñes ötkizdi.

Jiınnıñ aşıluındağı sözinde Qasım-Jomart Toqaev saylaualdı nauqannıñ mañızdılığına toqtalıp, saylau - Qazaqstannıñ damuındağı jaña kezeñge jol aşatının atap ötti.

Saylaualdı kezeñde ştabtar men partiyanıñ barlıq wyımdastıruşılıq äleuetin tiimdi paydalanu qajettigin aytıp, birqatar basımdıqtardı anıqtap berdi.

– Bizdiñ saylaualdı bağdarlamamız sabaqtastıq, ädildik jäne örleu degen negizgi üş qağidağa taban tireydi. Öytkeni Elbası sayasatınıñ sabaqtastığı ğana elimizdiñ qarqındı damuın qamtamasız etedi. Azamattar üşin eñ mañızdısı – äl-auqattıñ artuı. Bizdiñ ekonomikalıq jetistikterimizdi är qazaqstandıq sezinui tiis. Bwl – ädildiktiñ belgisi. Sondıqtan aldımızğa naqtı maqsattar qoyıp otırmız. Oğan qol jetkizu üşin biz üzdiksiz damıp, ünemi örlep, örkendeuimiz kerek, – dedi Qasım-Jomart Toqaev.

Qasım-Jomart Toqaev saylaualdı nauqan kezeñin jäne saylaudı  aşıq äri ädil ötkizu üşin qoldanıstağı zañnamalardıñ talaptarı qatañ saqtaluı qajet ekenine basa nazar audardı.

– «Nur Otan» partiyası aşıq saylau ötkizudi jäne demokratiyalıq talaptardıñ qatañ saqtaluın qalaydı. El üşin taza, aşıq, ädil saylaudıñ ötkeni asa mañızdı, - dedi QR Prezidenttigine kandidat.

Keñeste respublikalıq qoğamdıq ştabtıñ basşısı, «Nur Otan» partiyası Törağasınıñ Birinşi orınbasarı Mäulen Äşimbaev Qasım-Jomart Toqaevqa elektoraldı nauqan kezindegi ştabtıñ jwmısı jayında bayandap berdi. Onıñ aytuınşa, elimizdiñ barlıq aymaqtarında 227 qoğamdıq ştab jwmıs isteydi. Ondağı barlıq is-şaralar Qazaqstannıñ saylau turalı zañnamalarına säykes, arnayı jüyelik kestelerge jäne elektoraldı nauqannıñ media-josparına negizdelgen.

Jiın barısında Aqtöbe, Şığıs Qazaqstan oblıstarı men Almatı qalasınıñ saylaualdı ştabınıñ jetekşileri beynebaylanıs arqılı dayındıqtarı turalı bayandadı.

Sonday aq, respublikalıq ştab müşeleri: «Qarulı Küşterdiñ ardagerleri» RQB Ortalıq keñesiniñ törağası Mwhtar Altınbaev, QR Parlamenti Mäjilisiniñ deputatı Bekbolat Tileuhan, ştabtıñ jastar qanatınıñ müşesi, körkem gimnastikadan älemdik sayıstarda top jarğan belgili sportşı Anna Alyab'evalar söz söyledi.

Respublikalıq qoğamdıq ştab müşeleri 13 mamırdan bastap elimizdiñ barlıq öñirlerin aralap, halıqpen kezdesuler ötkizudi josparlap otır. Ol jiındarda kandidattıñ saylaualdı bağdarlamasınıñ bastı qağidaları men halıq üşin özekti mäseleler talqılanbaq.

Abai.kz

0 pikir