قر پرەزيدەنتتىگىنە كانديدات قاسىم-جومارت توقاەۆ رەسپۋبليكالىق قوعامدىق شتابقا كەلىپ، قىزمەتكەرلەرمەن، اكتيۆيستەرمەن كەزدەستى. «Nur Otan» پارتياسى ورتالىق اپپاراتىنىڭ عيماراتىندا «جۇمىستى ۇيىمداستىرۋ ورتالىعى»، «جوسپارلاۋ، ساراپتاۋ، جانە مونيتورينگ ورتالىعى»، «قارجىلىق قولداۋ ورتالىعى»، «قۇقىقتىق ساراپتاۋ ورتالىعى»، «لوگيستيكا جانە ماتەريالدىق قامتاماسىز ەتۋ ورتالىعى»، «ءباسپاسوز ورتالىعى» جانە رەسپۋبليكالىق قوعامدىق شتابتىڭ «TimeQazaqstan» جاستار قاناتىنىڭ جۇمىستارىمەن تانىستى. 

جالپى رەسپۋبليكالىق قوعامدىق شتابقا 190 ادام كىرگەن، ونىڭ 30-ى «TimeQazaqstan» جاستار قاناتىنىڭ مۇشەسى. جالپى ەل اۋماعىندا 17 ايماقتىق، 210 قالالىق جانە اۋداندىق قوعامدىق شتاب جۇمىس ىستەپ، وندا 6 مىڭعا جۋىق ادام قىزمەت كورسەتەتىن بولادى. كانديداتتىڭ 19 500 سەنىمدى وكىلى انىقتالعان.

قاسىم-جومارت توقاەۆقا سايلاۋالدى ناۋقاننىڭ ۇگىت-ناسيحات جۇمىستارىنىڭ باستالعانى جونىندە جان جاقتى اقپارات بەرىلدى.

قر پرەزيدەنتتىگىنە كانديدات رەسپۋبليكالىق جانە ايماقتىق قوعامدىق شتاب باسشىلارىمەن جانە مۇشەلەرىمەن كەڭەس وتكىزدى.

جيىننىڭ اشىلۋىنداعى سوزىندە قاسىم-جومارت توقاەۆ سايلاۋالدى ناۋقاننىڭ ماڭىزدىلىعىنا توقتالىپ، سايلاۋ - قازاقستاننىڭ دامۋىنداعى جاڭا كەزەڭگە جول اشاتىنىن اتاپ ءوتتى.

سايلاۋالدى كەزەڭدە شتابتار مەن پارتيانىڭ بارلىق ۇيىمداستىرۋشىلىق الەۋەتىن ءتيىمدى پايدالانۋ قاجەتتىگىن ايتىپ، بىرقاتار باسىمدىقتاردى انىقتاپ بەردى.

– ءبىزدىڭ سايلاۋالدى باعدارلامامىز ساباقتاستىق، ادىلدىك جانە ورلەۋ دەگەن نەگىزگى ءۇش قاعيداعا تابان تىرەيدى. ويتكەنى ەلباسى ساياساتىنىڭ ساباقتاستىعى عانا ەلىمىزدىڭ قارقىندى دامۋىن قامتاماسىز ەتەدى. ازاماتتار ءۇشىن ەڭ ماڭىزدىسى – ءال-اۋقاتتىڭ ارتۋى. ءبىزدىڭ ەكونوميكالىق جەتىستىكتەرىمىزدى ءار قازاقستاندىق سەزىنۋى ءتيىس. بۇل – ادىلدىكتىڭ بەلگىسى. سوندىقتان الدىمىزعا ناقتى ماقساتتار قويىپ وتىرمىز. وعان قول جەتكىزۋ ءۇشىن ءبىز ۇزدىكسىز دامىپ، ۇنەمى ورلەپ، وركەندەۋىمىز كەرەك، – دەدى قاسىم-جومارت توقاەۆ.

قاسىم-جومارت توقاەۆ سايلاۋالدى ناۋقان كەزەڭىن جانە سايلاۋدى  اشىق ءارى ءادىل وتكىزۋ ءۇشىن قولدانىستاعى زاڭنامالاردىڭ تالاپتارى قاتاڭ ساقتالۋى قاجەت ەكەنىنە باسا نازار اۋداردى.

– «Nur Otan» پارتياسى اشىق سايلاۋ وتكىزۋدى جانە دەموكراتيالىق تالاپتاردىڭ قاتاڭ ساقتالۋىن قالايدى. ەل ءۇشىن تازا، اشىق، ءادىل سايلاۋدىڭ وتكەنى اسا ماڭىزدى، - دەدى قر پرەزيدەنتتىگىنە كانديدات.

كەڭەستە رەسپۋبليكالىق قوعامدىق شتابتىڭ باسشىسى، «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ قاسىم-جومارت توقاەۆقا ەلەكتورالدى ناۋقان كەزىندەگى شتابتىڭ جۇمىسى جايىندا بايانداپ بەردى. ونىڭ ايتۋىنشا، ەلىمىزدىڭ بارلىق ايماقتارىندا 227 قوعامدىق شتاب جۇمىس ىستەيدى. ونداعى بارلىق ءىس-شارالار قازاقستاننىڭ سايلاۋ تۋرالى زاڭنامالارىنا سايكەس، ارنايى جۇيەلىك كەستەلەرگە جانە ەلەكتورالدى ناۋقاننىڭ مەديا-جوسپارىنا نەگىزدەلگەن.

جيىن بارىسىندا اقتوبە، شىعىس قازاقستان وبلىستارى مەن الماتى قالاسىنىڭ سايلاۋالدى شتابىنىڭ جەتەكشىلەرى بەينەبايلانىس ارقىلى دايىندىقتارى تۋرالى باياندادى.

سونداي اق، رەسپۋبليكالىق شتاب مۇشەلەرى: «قارۋلى كۇشتەردىڭ ارداگەرلەرى» رقب ورتالىق كەڭەسىنىڭ توراعاسى مۇحتار التىنباەۆ، قر پارلامەنتى ءماجىلىسىنىڭ دەپۋتاتى بەكبولات تىلەۋحان، شتابتىڭ جاستار قاناتىنىڭ مۇشەسى، كوركەم گيمناستيكادان الەمدىك سايىستاردا توپ جارعان بەلگىلى سپورتشى اننا اليابەۆالار ءسوز سويلەدى.

رەسپۋبليكالىق قوعامدىق شتاب مۇشەلەرى 13 مامىردان باستاپ ەلىمىزدىڭ بارلىق وڭىرلەرىن ارالاپ، حالىقپەن كەزدەسۋلەر وتكىزۋدى جوسپارلاپ وتىر. ول جيىنداردا كانديداتتىڭ سايلاۋالدى باعدارلاماسىنىڭ باستى قاعيدالارى مەن حالىق ءۇشىن وزەكتى ماسەلەلەر تالقىلانباق.

Abai.kz