Beysenbi, 27 Mausım 2019
Bizdiñ şeneunik 9681 17 pikir 14 Mamır, 2019 sağat 15:09

Qaraqwsova jön söz aytıptı

Güljan apa Qaraqwsovanıñ qazir ekiniñ biri biledi. Är aytqan sözi internettiñ "hiti" bop jür. Zamanaui tilmen aytsaq, "haypanutaya" degen teñeu däl keledi.  Mäjilistiñ eñ täjirbieli deputattarınıñ biri. 

Güljan Qaraqwsova biıl 69 jasta. 3 bala, 8 nemere süyip otırğan äje.  Mäjilis deputatı. Senatta da deputat bolğan. Jalpı deputattıq qızmetine biıl 16 jıl. Ekonmist, ğılım doktorı, professor, ayta berseñiz atağı köp...Orden-medal'derin tizbelep jatpayıq. Bir basına jetip-artıladı.

Bir jıldarı Astanadağı (ol kezde bas qalanıñ atı Astana edi ğoy) deputattar üysiz qalıp, biraz uaqıt qımbat qonaq üylerge qonıstanğanı esteriñizde bolar.

Sol qımbat qonaq üyde byudjet esebinen twrıp jatqan öz äriptesterin jaqtap söylep, jurnalisterge jekigen. "Rebyata, Kto kak soderjitsya, tot tak i rabotaet" degen-di. Bwl Qaraqwsovanıñ öz sözi. Düyim jwrt deputattıñ bwl daraqılığın sınğa alğan. Keyin Qaraqwsova öz sözinen aynıp, aqtalğanday boldı. Jä, onı qoyşı, ayta berseñ deputat Qaraqwsovanıñ qıñır-qisıq sözderi köp.

Bwl - "Bizdiñ Sovet odağı" dep söylep, sınğa qalğan Qaraqwsova.

Bwl - "Qartar pansionatın salayıq" dep söylep, sınğa qalğan Qaraqwsova.

Bwl - "taza qazaqı" tilmen "bir bala jaqsı, eki bala jaqsı" dep söylep,  sınğa qalğan Qaraqwsova...

Esimizde, äleumettik jelidegi äjuadan keyin Güljan apa "Qazaq tilin üyrene beremin. Biraq mağan qoldau kerek.  50 jıl orıs tilinde söylep, sol tilde jwmıs jasap, sol tilde oylanıp keldim. Qazaq tilin üyrenudi endi bastadım" degen edi. Onısın qwptadıq jäne.

Şını kerek, Güljan Janpeyisqızın biz jeter jerine jetkizip, şımbayınan ötkizip, köp sınadıq. Zeynetkerligin de ayttıq, qazaq tilinde söylemeytinin de sınadıq. Qazaqqa jat, böten mentalittetke tän bastamaları üşin de söktik. Endi bügin söytken Qaraqwsova jön söz aytıptı. Sınaudı bilgende, maqtaudı bilmeymiz be?

Ötkende Mäjiliste jiın ötti. Wlttıq qordıñ basşıları kelip, deputattarğa esep berdi. Byudjettik kodekske säykes, zeynetaqı qorı aktivterin basqaru qwqığı Wlttıq qordı basqaru keñesine berilipti. YAğni, keñes Wlttıq qordıñ da, Zeynenaqı qorınıñ da aktivterin basqaradı. Biz külki etip jürgen Qaraqwsova deputattardıñ aldına kelgen sol qor basşılarına şüylikti.

Qordı äri beri süyrep jürgende, salımşılardıñ jinaqtarın joğaltıp aludan qauiptenetinin jılarmanday bolıp ayttı.

"Men zeynetkermin. Meniñ ol jerde (qordı aytadı) salımımnan göri köz jasım jinaqtalıp jatır. Men bwl jerde öz azamattarımızdıñ jeke jinağı turalı aytıp otırmın. Memleket ärbir azamattıñ jinağınıñ aman saqtaluına kepil boluı kerek qoy. Ol jinaq tek aman saqtalıp qana qoymay, ol zeynetke şıqqanşa jıl sayın ösip otıruğa tiis. Osını wmıtpağan jön. Ol azamat jıldar boyı jinağan aqşasın zeynetke şıqqan soñ tolıq aluı kerek. Eñ qwrığanda invest tabıs infliyaciyadan tömen bolmauı kerek" dedi ol.

Sonday-aq, deputat Qaraqwsova qızmetterdiñ biriktirilui jwmıstıñ jüyesine äser etip, mindetterdiñ şatasuı, jwmıstıñ jürmey qaluına äkelip soqtıruı mümkin ekenin aytıp:

"Wlttıq qorda aqşa jetpey me? Endeşe eşqanday da täuekelge barmay, aqşaların qaytarıp bereyik. Bizdiñ Birıñğay zeynetaqı qorınıñ problemaları az emes qoy. Men osıdan qorqamın. Mindetterdi qalay bölisedi?" dedi.

Tüyin

Qaraqwsova "Men zeynetkermin. Meniñ ol jerde (qordı aytadı) salımımnan göri köz jasım jinaqtalıp jatır" deu arqılı bükil halıqtıñ köz jası zeynetaqı qorında jinalıp, teñizge aynaluğa tayau qalğanın ayttı. Ol teñiz tolqısa ne bolmaq? Sonı da eskertti. Qordı äri beri süyrep jürgender salımşılardıñ jinaqtarın joğaltıp jibere me degen qaupin de jasırğan joq. Qazir biliktegilerdiñ maylı-qaltasına aynalğan zeynetaqı qorınıñ swrauı bolatının eske saldı. Osı üşin Güljan hanımğa bir alğıs aytıp qoyğannıñ ayıbı bolmas!

Jaraysız, Qaraqwsova hanım!

Nwrgeldi Äbdiğaniwlı

Abai.kz

 

17 pikir