Seysenbi, 25 Mausım 2019
46 - söz 1560 12 pikir 10 Mausım, 2019 sağat 11:09

Ümit säulesin tudırğan saylau 

Bwl saylauğa «halıqtı sayasi şıñdau täjiribesi» degen at berer edim.
Saylau qorıtındısına köñili tolmay, «Dausımdı jep qoydı», «Ümitimdi söndirdi», «Beker barğan ekem, osılay boların bildim ğoy», «Endi saylauğa barmaspın» dep renjip jatqandar köp. Odan bölek ökpesi qara qazanday bop jürgen täuelsiz baqılauşılar da tabılıp jatır. «Tañğı sağat altıdan barıp, tün auğanşa sabılğan eñbegim, tüstenuge şıqpay, därethanağa barmay jürgendegi qayran tirligim bosqa ketti» - dep jatır.

Biliktiñ şeşimine bas şwlğığan Qosanovtı jerden alıp, jerge salıp, qarğıs aytıp jatqandar bar. Bwl ökpe-reniştiñ bäri, bir jağınan, orındı. Öytkeni bwl saylaudıñ soñı ekinşi turdı talap etetin beybit şeruge wlasuı kerek edi.

Ekinşi jağınan, bir kündik belsedilikpen demokratiya ornatqan eşkim joq.

Osı nätijeniñ özinen köp närse alıp twrmız.

1) Halıqtıñ sayasi belsendiligi arttı.

2) Qwqıqtıq sauatı aşıldı.

3) Saylauşı men baqılauşınıñ täjiribesi küşeydi (äsirese baqılauşınıñ mañızı jäne mümkindigimen tanıstıq).

4) Saylau ädil bolğan jağdayda jeñis kimniñ jağına auatının kördik.

5) Bilik bükil resurstarı men rıçagtarın iske qosıp, özine täueldi qwrılımdar armiyasın iske qosıp jatıp, kümänsiz kartina körsete almadı.

6) Kelesi saylauda mümkindigimiz anağwrlım artatının bayqadıq. Sebebi postnazarbaevtıq kezeñde bilikke kim kelse de avtoritarizm älsireydi.

Ädettegidey qoğamdıq liderler deficiti äli de bar. Bwl atqa jüz payız layıq bolmasa da, geografiyası men biografiyası jağınan halıqtıñ jağına şığadı-au degen bir adamımızdıñ solqıldaqtıq tanıtuınıñ özi bizge täjiribe boldı.

Ol üşin Qosanovqa renjudiñ de qajeti joq? Sebebi, biz onıñ qanday deñgeydegi qısımğa tötep bere almağanın bilmeymiz. Obektivti-sub'ektivti sebepteri bizge beymälim bop qala beredi. Ärine, tabandılıq körsete almağanı ökinişti. Bilikpen aldın ala kelisimge otırğanı da ras şığar. Biraq mäsele onda emes. Sebebi halıq Qosanovqa dauıs bergen joq. Jalpaq jwrt onı tanımaydı. Söyte twra dauıs berdi. Halıq Qosanovqa emes, jüyege dauıs berdi. Qosanov bwdan keyingi nauqandarğa kandidattığın wsına qoymas. Bäymenov siyaqtı ol da biliktiñ bir bwrışınan ornın tabar.
Al halıq jüyemen arı qaray küresedi.

Biraq kelesi jolı belsendilik saylau küni ğana emes, kandidattı tirkeuden bastalu qajet ekenin kördik. Baqılauşılarğa kelsek, qanşama täuelsiz baqılauşılar jemisti eñbek körsetti. Belsendi baqılauşılardıñ uçaskelerinde Qosanov jeñip jattı. Özimniñ ğana aynalamdağı tanıs-bilis jigitterdiñ arasınan sonday on şaqtı jigit şığıp, körgen bilgenderin, kelesi jolı eskeretin täjirielerin aytıp jatır. Respublika boyınşa sonday azamattar qanşama. Olardıñ bäri kelesi saylauda artınan talay «şäkirt» ertip, täjiribesimen bölisip, ıqpalın küşeytedi degen senimdemin.

Täuelsiz baqılauşılardı tobın wyımdastırıp, olardıñ zañdıq sauatın aşıp, saylau erejesimen tanıstırğan demokratiyalıq wyımdar, jekelegen belsendi azamattar, täuelsiz blogerler, Azattıq radiosınıñ wjımı alğısqa layıq.

Säken Nwrqabekwlınıñ facebook-tegi paraqşasınan

Abai.kz

12 pikir