Särsenbi, 17 Şilde 2019
Bilik 4392 48 pikir 20 Mausım, 2019 sağat 17:47

Toqaev "jauırdı jaba toqıp" otırğan joq

Äleumettik jeliler arqılı bügingi bilikti sınauşılardıñ da, jaqtauşılardıñ da pikirin oqıp otıramın. «Seniki de dwrıs, seniki de jön» dep qoya saluğa bolatın edi. Biraq, men de öz elimdi, wltımdı, tilimdi şeksiz süyetin adammın. Jalpı men sayasatqa aralasa bermeytinderdiñ qatarınanmın. Aqın-jazuşı halıqtıñ ruhani tärbieşisi dep, tek qana şığarmaşılıqpen jürgen adammın. Biraq, el birligi men tınıştığına qatıstı mäselede sayasatker nemese tarihşı bolu mindetti emes dep oylaymın. Sol sebepti, saylaudan keyin, asıqpay otırıp öz oyımdı bildirudi jön kördim. «Öz sözim, özimdiki» jaqtırsañız öziñiz bilesiz, jaqtırmauğa da haqıñız bar.

«Aytpasa sözdiñ atası öledi» degen. «Sın bolsın, biraq, şın bolsın». Orındı sın bolsa, ol qabıldanadı, tiisti is-şaralar atqarıladı, atqarılıp ta jatqanın körip otırmız. Bayqaymın, keybir azamattar tım artıq ketip, tipti, jeke basqa tiisip jatır, onı da osı jeliden barşañız körip otırsızdar. Söyte otırıp, «Bizde demokratiya joq, söz bostandığı joq» deydi. Eger rasında solay bolsa, tipti osı jelige artıq söz jaza alar ma edi?

«Sın tüzelmey, min tüzelmeydi». Sınnıñ aytılğanı dwrıs. Al eger sınnıñ özi sın kötermey twrsa şe? Bireudi sınardan bwrın özimiz ne istedik, tım bolmasa öz twrmısımızdı, tuısımızdıñ jağdayın, ağayınnıñ, auıldastıñ tirşiligin tüzetu üşin ne istedik? - dep swraq qoysaq bolar edi, özimizge.

Täuelsiz Qazaqstannıñ tarihında ekinşi Prezidentti saylap otırmız. Saylauğa deyingi qızmetin qosıp eseptegende Qasım-Jomart Toqaevtıñ Memleket basşısı qızmetine kiriskenine äli 100 kün de tolmaptı. YAğni, äli tipti, qolğa alğan jwmıstarınıñ alğaşqı nätijeleri de şığıp ülgergen joq.

Jaqında Prezidentti Wlıqtau räsimindegi sözin Qasım-Jomart Kemelwlı bılay dep bastadı: «Prezident retinde halqımızğa mınanı aytqım keledi:

Elimizdiñ är azamatınıñ müddesin qorğau – meniñ bastı maqsatım. Olardı sayasi közqarastarı men wstanımdarına qaray böluge jol bermeymin!
Türli sayasi jäne qoğam qayratkerlerinen kelip tüsken qwndı wsınıstardı, bastamalardı men öz jwmısımda mindetti türde eskeremin.
Aşıq jäne ädil jwmıs isteymiz. Biz üşin eñ mañızdı mindet – zañğa say adal qızmet etu».

Prezident «Qoğamda qordalanğan kez kelgen mäselege qatıstı wsınıs engiziñizder, qarastıramız, birlesip şeşim qabıldaymız», dep otır.
Memleket basşısı bwl sözin Wlıqtau räsiminiñ erteñinde otandıq jäne şeteldik BAQ ökilderimen ötkizgen baspasöz mäslihatında tağı ayttı. Bwl osı äleumettik jelide jäne jariyalanıp jattı. Odan keyin ile-şala europalıq «Euronews» telearnasına bergen swhbatın da kördik. Eñ bastı wstanımı aşıqtıq ekenin aytıp otır.

Prezidenttiñ qızmetine kirise salıp alğaşqı qol qoyğan Jarlıqtarınıñ biri – Wlttıq qoğamdıq senim keñesin qwru.
Qasım-Jomart Toqaev osı qadamdarımen öziniñ BAQ üşin de, jalpı qoğam üşin de dialog qwruğa aşıq ekenin bildirip otır dep oylaymın.
Osı qadamdar aşıqtıqqa dälel emes pe?

Ayta ketetin tağı bir mäsele, eger Wlıqtau räsimindegi Prezidenttiñ sözin mwqiyat tıñdasañızdar, ol bügingi qoğamda qalıptasqan äleumettik-ekonomikalıq jäne basqa da problemalardı, qiınşılıqtardı aşıq aytıp berdi. YAğni, «jauırdı jaba toqıp» otırğan joq. Problemalardıñ bar ekenin, tipti, halıq twrmısınıñ naşarlağanına deyin aşıq aytıp otır. Basqa qay eldiñ basşısı resmi qızmetke kiriskende qoğamnıñ problemasın aşıq körsetip edi? Köp jağdayda aldağı 5 jılda atqaratın şaruağa uäde berip, problemalardıñ üstimen öte şığatın.

Qasım-Jomart Toqaev olay etpedi. Nege? Öytkeni, eldiñ basındağı tauqımetten, qordalanğan köp jılğı problemalardan, auıldıñ tozıp, ağayınnıñ azıp ketkeninen, käsiporındardıñ twralap tınısın aşa almay twrğanınan, el tizginin endi ğana qolına alıp otırğan Prezidenttiñ habardar ekenin halıq bilsin dep otır.

Söytip, endi osı tığırıqtan şığudıñ 10 bağıtın ayqındap, atqaruşı bilikke aldağı 5 jılda qan-sorpa jwmıs twrğanın anıq añğarttı.
Sol siyaqtı jemqorlıqpen küres mäselesi. Bilesizder, bwğan deyin memlekettik qızmet pen jemqorlıqpen küres mekemeleri bir şañıraqtıñ astında edi. Endi jemqorlıqpen ımırasız soğıstıñ bastalğanın ayğaqtağanday öz aldına bölek organ qwrıldı. Käsibi mamandar şoğırlandırılıp, tiisti zañnamalarmen bekitilip jatır. Bwl maydanda endi eşqanday ayauşılıq, barmaq bastı, köz qıstı tirliktiñ bolmaytının körsetpey me?!

Bwdan artıq ne kerek?! Ketken prezident te wnamaydı, kelgeni de jaman dep otırsaq, sırttan bizge bireu jaqsısın äkep bere me? 70 jıldan astam basqalar basqardı ğoy, ol qwqaydı da körip edik qoy. Endi özimizdi özimiz bağalayıqşı, ağayın!

Jalpı, rasında osı el üşin, wlt üşin janı auırıp jürgender bolsa, öz wsınıstarıñızdı zañdı jolmen engizip, keteui ketken dünie bolsa birge tüzetuge, qoğamda, özimiz jürgen ortada ädildikti birge ornatuğa wmtılayıq ta, ağayın!

«Altau ala bolsa, auızdağı ketedi,
Törteu tügel bolsa, töbedegi keledi» degen.
Biriguge şaqıramın! Alaş balası, kök tudıñ astına birigeyik!

Qalqaman Sarin 

Abai.kz

48 pikir