Jeksenbi, 25 Tamız 2019
46 - söz 3488 7 pikir 26 Şilde, 2019 sağat 10:49

Mwhtar Jäkişev turalı birer oy

Keşeden beri jolda kele jatıp Jäkişevtiñ türmeden bosamauına qatıstı türli pikirler oqıdım. Key danışpandar «Oybay, bizdiñ bilik oñbağan eken, sud'yalar taza emes, t.b.» dep jatır. Mwnıñ barlığı dwrıs. Biraq oylanatın bir mäsele bar.

Jigitter, Jäkişev türmege küni keşe qamalğan joq. Ol türmede otırğanına 10 jıl boldı! Sizder osı on jıl işinde onı bosatu üşin naqtı ne istediñizder?

Özderiñizge osı swraqtı qoyıp köriñizder. Eşteñe istemediñizder me? Onda nege ökpeleysizder? Köppen birge şulap post jazdıñızdar, dostarıñızğa jaqsı attandıñızdar. Jaraysızdar! Bİraq bwl – az!

Ünemi taza jüru üşin sizder juınasızdar, suğa tüsesizder ğoy. Tisteriñizdi kütu üşin onı juasızdar. Tisimiz taza bolsın, tänimiz taza bolsın dep post jazbaysızdar ğoy. Al, onda nege Sizder post jazğan soñ barlıq sud'yalar täuelsiz bolıp, ädil şeşim qabıldaydı, Jäkişevti bosatıp jiberedi dep sanaysızdar? Ol üşin naqtı bir ispen aynalısu kerek!

Bilik te mwnı bilip otır, erteñ kün tärtibine basqa «hayp» şığadı, mınau wmıtıladı. Şınında da azın-aulaq qwqıqqorğauşılardan basqa eşkim sayasi twtqındar mäselesimen jüyeli türde aynalısqan joq qoy. Demokratiyalı elde, ädil sot jüyesimen ömir süru üşin aldımen ol üşin äreket etu kerek.

Baltıq elderi, gruzinder, qırğızdar birneşe jıl bwrın demokratiya üşin şın küş saldı. Olarğa deyin polyaktar, çehtar, vengrler äreket jasadı. Olardan birneşe ğasır bwrın francuzdar, ağılşındarğ gollandıqtar men amerikandıqtar äreket jasadı. Eşkimge aspannan eşteñe tüse salğan joq. Al sizderdiñ ol «äreketteriñiz» Feysbukke post jazuğa ketken 15 minut pa?

Bireuler «Oy mınau Wlttıq keñeske müşe bolıp, bir ret Semeyge Jäkişevtiñ sotına barıp kelip edi bärimizdi teristep jatır» deui mümkin. Joq, jigitter. Men bwlay ayta alamın, öytkeni men öz balalarım şın mänindegi qwqıqtıq Qazaqstanda ömir sürui üşin qajetti äreketterdi bwrın, mına WQSK qwrılğanğa deyin bastağam! Mısal kerek pe, bıltır Sayragül sotında boldım, marqwm Jampozov isine qatıstım, Maksimovka auılı twrğındarına kömektesip Kökşetauğa bardım. 2016 jılı Atırauğa Maks pen Talğattıñ sotına qatıstım (ol sotta FB jwldızdarı az boldı), Maks pen Talğat turalı Ükimettiñ resmi jiınında tikeley efirden ayttım. Jäkişevke özim şığarğan, advokatınıñ şığının kötergen Aron Atabektiñ barlıq kitaptarın jiberip keldim, üyiniñ remontına kömektestim, Jañaözen men Şetpedegi mwnayşılardıñ advokattarınıñ aqşasın töledim, Aqtauğa 6 ret barıp, sotqa qatıstım, sonda otırğan Serik Saparğaliğa kömektestim. Twrabek Qwsayınovqa kömektestim...

Eger sizder şınımen Jäkişevti jäne basqalardı tezirek bosatsın deseñizder qwr FB-da post jazıp otıra bermey mañızdıraq birdeñe isteñizder. Joq degende Öskemende ötetin kelesi sotqa uaqıt bölip, bilet alıp nemese öz köligiñizben barıp qatısıñız. Nemese advokat pen qwqıqqorğauşınıñ gonorarın töleñiz. Eger ol üşin şın alañdap jürseñiz sonday naqtı şarua isteñiz. Sözge (postqa) senbeymin. İs-äreket körip twrğanım joq.

Mwhtar Tayjannıñ facebook paraqşasınan

Abai.kz

7 pikir