Seysenbi, 17 Qırküyek 2019
722 0 pikir 19 Tamız, 2019 sağat 10:24

Kabuldağı jarılıstan 63 adam qaza tapqan

Auğanstan astanasında 17 tamızda üylenu toyı ötip jatqan jerde jankeşti jasağan şabuıl saldarınan 63 adam qaza tauıp, 182 adam jaralanğan. Bwl turalı auğan resmileri habarladı.

İşki ister ministrligi ökili Nasrat Rahimi jarılıs üylenu toyı kezinde er adamdar otırğan twsta bolğanın habarlağan. Onıñ sözinşe, qaza tapqandar men zardap şekkenderdiñ arasında balalar men äyelder bar.

Oqiğa kuägeriniñ AR agenttigine aytuınşa, mıñnan astam adam qatısqan toyda sahnağa balalar jinalğan kezde jarılıs bolğan.

"Taliban" qozğalısı biılğı jıl basınan beri Kabuldağı eñ joyqın şabuılğa qatısı barın joqqa şığardı. Bwl jarılıs Vaşington Auğanstandağı 18 jılğa juıq uaqıt jalğasıp jatqan qarulı janjaldı doğaratın beybit bitimge kelu turalı Taliban ökilderimen kelissöz jürgizip jatqan şaqta jasaldı.

DPA aqparat agenttigi "Talibannıñ" resmi ökili Zabihulla Mwdjahidtiñ jarılıstı ayıptağan sözi WhatsApp arqılı taratılğanın habarladı.

AQŞ pen "Taliban" ökilderi arasında bitim jaylı beybit kelissözder jürip jatqanına qaramastan Auğanstanda köp adamnıñ ajalına sebep bolğan şabuıldar bäseñdemey otır. BWW mälimeti boyınşa, biılğı jıldıñ alğaşqı jartısında elde şabuıldar saldarınan qaza bolğan nemese jaralanğan adam sanı 3800-ge jetken.

Auğanstan prezidenti Aşraf Ğani jeksenbi küni Twitter-degi paraqşasına "Taliban" terrorşılarğa "jağday tuğızıp" otırğanı üşin jauapkerşilikten tayqıp kete almaydı dep jazğan.

16 tamızda Auğanstanmen körşi Päkistanda meşitte bolğan jarılıs saldarınan auğan tälipteri jetekşileriniñ biriniñ bauırı mert bolğan. Ol jarılısqa jauapkerşilikti eşkim alğan joq.

Abai.kz

0 pikir