Жексенбі, 17 Қараша 2019
Біздің шенеунік 1595 11 пікір 4 Қараша, 2019 сағат 15:57

Краус түсірген «Ер Төстік» пен Куртунова мүсіндеген «Мәншүк»

Семейдің «Жеңіс» саябағында Совет одағының батыры Мәншүк Мәметоваға арналған ескерткіш қойылыпты. Өкініштісі, ағаштан ойып жасалған мүсін өте ұсқынсыз шығып, жергілікті тұрғындардың наразылығын тудырған. Қазақтың батыр қызының қораш бейнесіне әлемжелі қолданушылары да қарсылық танытып жатыр. 

Бұл мәселе төңірегінде нақты ақпаратты аrnapress.kz ақпараттық порталы жариялады. Порталдың жазуынша, жергілікті тұрғындар бұл мүсін Мәншүк Мәметоваға мүлде ұқсамайды деп есептейді екен.

«Жаңа жылға балабақшалардың біріне апарып қоюға болады. Мыстан кемпірдің орнына. Бірақ саябақта қалай болса солай жасалған “өнер туындысына” орын болмауы керек».

«Бізде талантты суретшілер сондай көп…. солар қайда?….суретшілер кеңесі қайда, эскиздері қайда … бұл жобаларды кім бекітеді? Төмен деңгейде жасалған, расымен де балабақшаға арналған…».

Бұл жергілікті тұрғындардың сөзі.

Портал тілшілері тіпті «шедевр» туындының авторларын да тауып, сұхбат алған екен. Мүсіншілер Юлия Куртунова және Иван деген ерлі-зайпты азаматтар көрінеді. Аталған сұхбаттағы сөздеріне қарасақ, бұлар Семей өңірінің адамдары емес секілді. Тіпті шетелден шақырылған «шеберлер» болуы да мүмкін.

«Бұл сіздердің керемет әкімдеріңіз Ермак Бидахметұлының бастамасы. Ол бізді осы қалаға ағаштан осындай скульптура жасауымыз үшін шақырды. Мұндай жұмыс тозақпен тең. Әрине, біз мұнда келіп, қайрымдылықпен айналысып жатқан жоқпыз. Біздің төрт баламыз бар. Соларды асырап бағуымыз керек. Мен сізге айтайын, жұмысымыз қымбат емес», - депті Юлия Куртунова.

Семейдің әкімі «жоқтан тапқан» мүсіншілер өздерінің Мәншүк Мәметованы салғанына сенімді. Олар тіпті наразылық танытушыларды "қолынан түк келмейтіндер" деп санайтын көрінеді. «Біздің жұмысымызға теріс пікірлер жазған адамдар ештеңе істемей, бос жүргендер», - депті Куртунова сұхбатында.

Аталған жобаға тапсырыс беріп, осы мүсіншілерді аттай қалап алдырған Семей қаласы әкімдігі бұл жобаға жұмсалған нақты ақшаны атай алмайды екен. Есесіне өздеріне түсінікті Ресей елінің тілінде сала құлаш түсініктеме беріпті. Бұл туралы әкімдік өздерінің Instagram желісінде жазды.

Әкімдіктің баспасөзі таратқан ақпаратқа сүйенсек, қаладағы байырғы ағаштар қурай бастаған. Арнайы шешім бойынша осы ағаштарды кесуге тура келген. Көп ағашты бекер отамас үшін ағаш мүсінінің мамандарын шақырып, мүсін жасатуды қолға алған. Осы жоба аясында біз айтып отырған Батыр қыз - Мәншүктің де мүсіні жасалған екен.

Әрине, тәп-тәуір жоба. Ағашты құр кескенше, керекке жаратқан жөн-ақ. Алайда «әдемі басталған ән еді, пұшық келіп қор қолды» дегендей, жұбай мүсіншілер жақсы жобаны жүндей түтіп отыр. Бірақ бұған қала әкімдігінің өздері кінәлі. Қала көркіне көрік қосам десе, қолынан іс келетін өз мүсіншілерімізді ұсыныс етпей ме?! Аты-жөні белгісіз өзге шеберлерді шақырамай-ақ...

Әкімдіктің баспасөз қызметі бұл шағын сәулет нысандарын қаржыландыру бюджеттік емес қорлардың есебінен жүзеге асырылатындығын айтып отыр. Сонымен қатар, дау тудырған мүсін өзге жерге көшірліген көрінеді.

(Айтпақшы Семей қаласы әкімдігінің әлеуметтік желідегі ресми парақшаларында мемлекеттік тілде ақпарат мүлде аз. Қазақстанның емес, Ресейдің мемлекеттік тіліне көбірек мән береді екен. Бұл тақырыпты алдағы уақытта бөлек жазармыз).

Осындай дау тудырып, қоғамның талқысына қалмас үшін әкімдік қызметкерлері әу баста дұрыс қадам жасауы керек еді. Ағаштан түйін түйетін жергілікті шеберлерді шақырып, халыққа жақын ескерткіш орнатса кім қой деді?!

Бұндай шалағай шаруалар біздің шенеуніктерде шаш-етектен. Сауатсыз жұмыс істейді, сын естіген соң түзеген болады. Екі жұмыс, екі шығын! Мүмкін оларға осы да тиімді шығар. Қайта-қайта бөлінген қаржы қалтаға жақсы. «Алтын шыққан жерді белден қазуға» қазақ шенділері шебер-ақ...

Мұндай масқаралықтың бірін өткен жылы жазған едік. Алматы қаласы әкімдігінің Тілдерді дамыту, мұрағаттар және құжаттама басқармасы «Azia animation» деген компанияға тапсырыс беріп, «Ер Төстік» ертегісінің желісімен мультфильм түсіріпті. Бір қызығы ол кезде де отбасылық шеберлер қазақ ертегісін қалағанынша жұлмалаған еді.

Игорь Краус, Артур Краус деген ағайынды жігіттер түсірген мультфильмдегі кейіпкерлер «түрі құбыжық, адам етін жейді, қазақша дұрыс сөйлей алмайды». Сөйтіп, Алматы қаласы әкімдігінің Тілдерді дамыту басқармасы қазақ менталитетінен мүлде хабары жоқ ағайынды Краустардың қазақ ертегілерін күстаналауына жол берген болатын. Бұл мультфильм кейін ашық қордан жойылғанымен, «Azia animation» компаниясының қоржынында бұндай дүниелер әлі толып тұр. Атышулы «Алдар көсе» анимациялық фильмін де осы ағайындылар түсірген.

Сөз соңында айтарымыз, айдаладағы біреулер қашанғы қазақ мәдениетін масқаралай береді. Ау, шенділер, халық мұрасын қашанғы «ұстағанның қолында, тістегеннің аузында» жібере бересіңдер?! Кез-келген жұмысты қолға аларда жеті рет өлшеп, бір рет кесу керек қой. Болары болып, бояуы сіңген соң тыраштанып қайта дұрыстамай. Ең маңыздысы, осындай мәселелерде жоғарыға беретін есеп-қисаптың «мұздай» болуын ғана емес, жұмыстың нәтижесін басты назарда ұстаған жөн...

Қуаныш Қаппас

Abai.kz

11 пікір