Бейсенбі, 28 Наурыз 2024
46 - сөз 3352 0 пікір 10 Тамыз, 2020 сағат 13:28

«Абай алдындағы парыз»

Президент жарлығымен бүгін, 10-тамыз – «Абай күні» болып белгіленді!

«Қазағым, қалың елім қайран жұртым?..»
(Абай)

Абай алдындағы парыз

Әр әрпі - нұрлы, шуақты,
Бір көріп жүрек ұнатты.
Абайды қайта оқысам,
Қазақтың өзі сияқты.

Сезімді, көзді арбайды-ау,
Қанша оқы - шөлің қанбайды-ау.
Болмысы, ойы, мінезі,
Қазақтан титтей аумайды-ау.

Аумайды-ау, тіпті, аумайды-ау,
Оқыған бей-жай қалмайды-ау.
Сан ғасыр бұрын болса да
Бүгінгі саған арнайды-ау.

Миыңды жуып тот басқан,
Жоғыңды бірге жоқтасқан.
Бүгінгі барша қазақтың
Әр жүрек қылын дөп басқан.

Бір сәуле көктен себелеп,
Тастайды-ау тұсап, өрелеп…
Қазақтан құйып, соққандай
Қазақы байлам керемет!

Қазақ боп сынап, мінеймін…
Қазақ боп күліп, жүдеймін…
Абайды оқи берген соң,
Қазақ боп қайта түлеймін!

Айтқаны - атқан таң ба екен?
Шекер ме екен, бал ма екен?..
Қазақта болсын қанша ақын,
Абайдай бірі бар ма екен?..

Әр жолы - нап-нақ, епті ғой,
Күйдіре сүйіп кетті ғой…
Абайға тілек арнауға
Батылым да әзер жетті ғой…

Бұлықсып тұр-ау бұла түн,
Таусылды күшім, қуатым…
Өзіңе арнап сөз айтқан
Кеше гөр, мені Ұлы Ақын?..

"Болдым, - дей көрме, - ермегі…",
Қиналып, ұлың терледі…
Өзіңе жазған хұсни-хат
Кеше гөр, мендей пендені?

Бүгіннен жолдар арызым,
Қайтара да алмас қарызым,
Бұл менің Сіздің алдында
Түбі бір өтер парызым!..

Жұмаш Кенебай Көкбөрі

Abai.kz

0 пікір

Үздік материалдар

Алғыс айту күні

Алғыс айту күні және оның шығу тарихы

Жомартбек Нұрман 1562
Алашорда

Қожанов межелеу науқанында (Жалғасы)

Бейбіт Қойшыбаев 2254
Ғибырат

Қайсар рухты ғазиз жан

Мұхтар Құл-Мұхаммед 3522