Бадахшан провинциясы губернаторының орынбасары Ахтармұхаммад Хайрзода 16 желтоқсанда Азаттық радиосының ауған қызметіне «әлемнің түрлі елдерінен жиналған шамамен 450 содыр провинцияның таулы өңірлеріне бекінгенін» хабарлады.

Оның айтуынша, содырлардың төрт түрлі ұйыммен - Жамоат Ансоруллох, Түркістан ислам қозғалысы, Өзбекстан ислам қозғалысы және Кавказ слам имаратымен байланысы бар.

«Содырлар Вардудж ауданына бекінген. Провинциядағы тұрақсыздықты пайдаланған олар Моймай және Нусай аудандарына өтіп, қазір сонда орнықты. Бұл жағдай, әрине, Тәжікстанды алаңдатып отыр», - деді Хайрзода.

Тәжік билігінің хабарлауынша, Бахадшан және Тахор провинцияларындағы террористік, экстремистік топтар құрамында 80-100 тәжік азаматы бар.

16 желтоқсанда Тәжікстанның шекара әскеріндегі дереккөз Озоди радиосына шекарадағы ауған аудандарындағы жағдайды бақылап отырғанын айтты.

«Біз ауған билігімен байланыс орнаттық. Содырлардың шекараға жақындағанын солардан білеміз. Шекарада бұл топтарға қарсы тұратын күш бар», - деді дереккөз.

Ауғанстанның Бадахшан провинциясы мен Тәжікстан арасындағы шекара ұзындығы 900 шақырымнан асады.

Abai.kz