Пашинян өзі жүргізген саясаттың соғыстың басталуына себеп болып, соның салдарынан Таулы Қарабақ айналасындағы аудандардың Әзербайжанға өтті деген айыптаулармен келіспеді. Армения премьер-министрінің пікірінше, соғыс өрті объективті себептерден тұтанған.

Оппозиция мерзімінен бұрын парламент сайлауын өткізуді талап етіп отыр. Пашинян мұндай шешімді жалғыз өзі қабылдай алмайтынын, ол үшін тараптар «консенсусқа» келуі керектігін айтты.

Ереванда Пашинянның қызметтен кетуін, мерзімінен бұрын сайлау өтуін талап етушілер жаппай наразылық акциясын өткізіп жатыр. Олар Арменияның көрші елмен соғыста жеңілуіне Пашинян кінәлі деп есептейді.

Оппозиция жалпыұлттық ереуілді 22 желтоқсанда бастайтынын мәлімдеді.

Пашинян биліктен кетпейтінін айтты. Бірақ оның парламенттегі жақтастары мерзімінен бұрын сайлау өткізу мүмкіндігін талқылауға дайын екенін білдірген.

Abai.kz