Өзбекстан премьер-министрінің орынбасары Бехзод Мусаев елде коронавирус індетін жұқтырған науқастар қалмады деп мәлімдеді.

"Денсаулық сақтау саласына соңғы отыз жылда бөлінбеген көп қаржы бөлінді. Вирусты емдеуге арналған дәрі-дәрмек әлемнің кез келген жерінен жеткізіліп жатыр. Мамандар да шетелден шақырылды. Нәтижесінде елде коронавирус жұқтырған бірде бір науқас қалмады", – деді Мусаев.

Денсаулық сақтау министрлігінің 19 желтоқсандағы көрсеткіші бойынша, Өзбекстанда коронавирус анықталғандардың жалпы саны 75 675 адам. 73 099 науқас емделіп шыққан, 612-сі қайтыс болған.

Өзбекстанда коронавирус бойынша статистикаға тек арнайы медициналық зертханада расталған мәліметтер алынады. Ал вирус белгілері бар, бірақ үй жағдайында емделгендер, сонымен бірге пневмониямен ауырғандар ресми статистикаға енбейді.

Abai.kz