Палата Спикері Нұрлан Нығматулиннің төрағалығымен өткен Парламент Мәжілісінің жалпы отырысында депутаттар азаматтардың жекелеген санаттарын әлеуметтік қорғау мәселелері бойынша заңнамаға түзетулерді мақұлдады.

Еңбек және халықты әлеуметтік қорғау министрі Серік Шапкенов атап өткендей, заң жобасы азаматтардың жекелеген санаттарын, оның ішінде мүгедектер, мүгедек балаларды тәрбиелеп отырған отбасылар, еңбек  ардагерлерін қолдауды арттыру мақсатында жетілдіріліп отыр.

"Қазіргі уақытта 66 мың бірінші топтағы мүгедектердің ішінде әрбір үшінші адамға күтім бойынша жәрдемақы да, жеке көмекшінің қызметі де берілмейді. Бұл комадағы адамдар, төсек тартып жатқан мүгедектер және т.б. Заң жобасын қабылдау нәтижесінде күтім бойынша жәрдемақы қосымша сырттан күтімді қажет ететін 24 мың адамды қамтиды. Бүгінде жаңа нұсқаулықты енгізу бойынша дайындық жұмыстары жүріп жатыр", - деді министр.

Сонымен қатар мүмкіндігі шектеулі балалардың жәрдемақысы 37% дейін өсетін болды.

Abai.kz