Сенбі, 31 Шілде 2021
1481 2 пікір 16 Маусым, 2021 сағат 14:15

Елімізде бала құқын қорғау жөнінде жұмыс тобы құрылады

Қауіпсіздік Кеңесінің аппараты жанынан бала құқығы мен заңды мүддесін қорғау, кәмелетке толмағандарға қатысты қылмыстық қол сұғушылықтың алдын алу және жолын кесу жөніндегі ведомствоаралық жұмыс тобы құрылады, – деп хабарлайды Ақорданың ресми сайты.

Хабарламада Президент Жолдауында балалардың қауіпсіздігі мен құқығын қорғау мәселелеріне ерекше назар аудару, кәмелетке толмағандарға қатысты зорлық-зомбылыққа байланысты тергеліп жатқан әрбір істі бақылауды қамтамасыз ету міндетін қойғаны жазылған.

«Осы жұмыстың қазіргі жағдайын талқылау және оны жетілдіру бойынша шаралар әзірлеу мақсатында Президенттің көмекшісі – Қауіпсіздік Кеңесінің хатшысы Әсет Исекешев төрағалық еткен кеңес өтті. Кеңеске бала құқықтары жөніндегі уәкіл Аружан Саин, Жоғарғы сот, Бас прокуратура, ішкі және сыртқы істер, әділет, білім және ғылым министрліктерінің өкілдері қатысты», – деп хабарланды Ақорда сайтында.

Кеңесте кәмелетке толмағандарға қатысты зорлық-зомбылыққа қарсы іс-қимыл, бала саудасы, сондай-ақ балалар үйі мен интернаттарда тиісті жағдайларды қамтамасыз ету мәселелері қаралды.

«Кеңес қорытындысы бойынша Қауіпсіздік Кеңесінің аппараты жанынан балалардың құқықтары мен заңды мүдделерін қорғау, кәмелетке толмағандарға қатысты қылмыстық қол сұғушылықтың алдын алу және жолын кесу жөніндегі барлық уәкілетті органның қызметін үйлестіру үшін тұрақты жұмыс істейтін ведомствоаралық жұмыс тобын құру туралы шешім шықты.

Сондай-ақ, мемлекеттік органдарға кәмелетке толмағандарға жыныстық тиіспеушілікке қарсы қылмыстар жасағаны үшін жазасын өтегеннен кейін бас бостандығынан айыру орындарынан босатылған адамдарды бақылау мен есепке алуды қамтамасыз ету бойынша қосымша шаралар қабылдау тапсырылды», – делінген хабарламада.

Abai.kz

2 пікір