Ауғанстанның Түркіменстанмен шекараласатын Герат және Бадгис аймағында тәліптер мен ауған жасақтары арасында кескілескен ұрыс жүріп жатыр. Бұл туралы түркімен БАҚ-тары хабарлады. 

Ұрыс 7 шілдеде басталды және Бадгис провинциясының әкімшілік орталығы Калайи-Нау қаласының бірқатар аудандарында әлі күнге дейін жалғасуда. Полиция орталығы, әскери база және Ұлттық қауіпсіздік дирекциясы штабы жанында қақтығыстар болып жатыр. Ауғанстан әскери күштері Бадгиске арнайы жасақтарды кіргізген.

Соңғы мәліметтер бойынша Калайи-Науда 69 тәліп өлтіріліп, 23-і жараланған. Ауғанстанның басқа провинцияларында соңғы тәулікте 107 Талибан лаңкестері өлтіріліп, 58-і жараланды деп хабарлады Ауғанстан қорғаныс министрлігі.

Abai.kz