17-қаңтар күні азаматтық белсенді, ақын, түрмедегі жылдары "саяси тұтқын" деп танылған Кенжебек Әбішев 56 жасқа қараған шағында қайтыс болды. Қаралы хабарды Азаттықа Әбішевтың әйелі Гүлмира Әбішева растады, деп хабарлайды Abai.kz Азаттыққа сілтеме жасап.

– Таңғы бес жарымда жүріп кетті. "Асқазаным шеге жұтып қойғандай боп, ауырып тұр" деп шағымданды. Жедел жәрдем шақырып едім, олар келгенше жүріп кетті. "Жүрегі, инфаркт" деді. Қуанышым ұзаққа бармады ғой, көнем ғой, не істеймін басқа?, – деді жасын тыя алмаған белсендінің әйелі.

Кенжебек Әбішев былтыр 13 қазанда шартты түрде мерзімінен бұрын босап шыққан еді. Ол "жазасының" қалған бөлігі яғни, 2 жыл 4 ай 20 күнді бостандығы шектелген күйі өтеуі тиіс-тін.

Алматы облыстық соты 2018 жылғы 21 желтоқсанда Кенжебек Әбішевті "терроризмді насихаттады" деген айыппен жеті жылға соттаған еді. Билік оны "Қазақстанның демократиялық таңдауы" қозғалысына қатысы бар деп айыптады. Нұр-Сұлтан соты бұл қозғалысты экстремистік ұйым деп таныған. Бірақ Еуропарламент оны бейбіт ұйым деп атаған. Қозғалысқа қуғындағы экс-банкир, қазір шетелде тұратын Мұхтар Әблязов жетекшілік етеді.

2019 жылы апелляциялық сот үкімді өзгеріссіз қалдырған. Бірақ 2020 жылғы 13 наурызда Қапшағай қалалық соты жаза мерзімін азайтқан.

Abai.kz