Қыркүйектің 10 күні ғаламторда Өзбекстан азаматтарын украин әскерилері тұтқынға алған видео жарияланды. Бұл видеоның қашан түсірілгені белгісіз.

Тұтқынға түскендердің бірі Өзбекстанның Самарқанд облысының тумасы, Мәскеуде оқыған 22 жастағы Ахмедов Мухриддин Солиоғлы. Видеода ол ақша табу үшін жалдамалы болғанын айтады.

Видеода тағы бір өзбек азаматы Мәскеудегі құрылыста құжатсыз жұмыс істеп, Украинаға жіберілгенін айтады. Украина қарулы күштерінің Харьков облысына сәтті шабуылы нәтижесінде көптеген ресейлік әскерилер тұтқынға алынған болатын.

Бұған дейін Мәскеудегі Өзбекстан елшілігі азаматтарға шет мемлекеттердің аумағында еріктілер батальонын құру немесе соғыс қимылдарына қатысу ел заңнамасы бойынша қылмыс екенін ескерткен еді. Өзбекстан Қылмыстық кодексінің 154-бабына сәйкес, еріктілер батальондарына және шетел аумақтарындағы әскери қимылдарға қатысу «жалдамалылық» деп танылады. Оларды он жылға дейінгі бас бостандығынан айыру жазасы қаралған.

Abai.kz