Мемлекет басшысы құқық қорғау органдарына журналистерге қарсы бағытталған бірқатар қылмыс бойынша мұқият тергеу жүргізуді тапсырды. Бұл туралы Президенттің Баспасөз хатшысы Руслан Желдібай хабарлады.

«Қоғамдық қауіпсіздік пен мемлекеттің беделіне нұқсан келтіру үшін жасалған бұл заңсыз әрекеттердің орындаушылары ғана емес, тапсырыс берушілері де анықталуға тиіс", - деп жазды ол Facebook-парақшасында.

Кейінгі кезде журналистерге жасалған шабуылдар көбейді. 15 қаңтарда Алматыда журналист Динара Егеубаеваның көлігін белгісіз біреулер өртеп кетті. Ұсталған күдіктілер «интернет арқылы әлдбіреуден тапсырыс алғанын» айтқан. 19 қаңтарда журналист Вадим Борейконың пәтерінің есігіне белгісіз адамдар монтаж көбігін жағып, желімдеп кеткен. Журналистің айтуынша, олар пәтерді өртеп жібергісі келген.

Abai.kz