Еліміздің оңтүстік бөлігінде жер дүмпулері жиіледі. 23 наурыз түнде Шымкент, Тараз және Түркістан облысының жергілікті тұрғындары жер сілкінісін сезді. Бұл туралы Stan.kz хабарлады.

Құтқарушылардың жедел ақпараты бойынша, жер сілкінісі 2-3 баллға тең. Жер асты дүмпулері Алматы уақыты бойынша 02:07-де тіркелген. Зардап шеккендер мен қирандылар туралы ақпарат болған жоқ.

"Жер сілкінісінің эпицентрі Алматыдан оңтүстік-батысқа қарай 740 шақырым жерде, Тәжікстан аумағында орналасқан. Магнитудасы – 6.5. 101 және 112 желілерінде зардап шеккендер мен қиратулар туралы ақпарат түскен жоқ", - деп хабарлады Шымкент ТЖБ.

Жергілікті тұрғындар Шымкент қаласының орталығында да, қала сыртында да дүмпулерді сезіп, көпшілігі үйінен шығып кеткен.

Тағы бір жер дүмпуі таңғы 06:27-де Алматыдан оңтүстік-батысқа қарай 724 км жерде орын алды. Оның магнитудасы – 4.4.

Abai.kz