Полиция "тергеу жалғасып жатыр, тергеу мүддесіне байланысты өзге ақпарат жарияланбайды" деді. 13 қарашада полиция "Қылмысты хабарламау" және "Қауіпті жағдайда қалдыру" баптары бойынша қылмыстық іс қозғағанын хабарлады.
Бұрынғы ұлттық экономика министрі Қуандық Бишімбаев 11 қарашада Астана сотының шешімімен "Адам өлтіру" бабымен екі айға қамалған. Бишімбаев әйелі Салтанат Нүкенованы өлтірді деген күдікке ілінген. 31 жастағы әйел Астанадағы мейрамханалардың бірінде қатыгездікпен ұрып-соғудан көз жұмған.
Қуандық Бишімбаев 2018 жылы жемқорлық бабымен 10 жылға сотталған еді. Қызылордадағы әйнек зауытына бөлінген ақшаның бір миллиард теңгесін жымқырды деп айыпталған. 2019 жылы қазанда Бишімбаевты шартты жазамен түрмеден босатқан.
Экс-министр Қуандық Бишімбаев әйелінің қазасынан соң әлеуметтік желіде зорлық-зомбылыққа қарсы "Заңды өзгерт, жазаны қатаңдат" деген ұранмен флешмоб басталды. Желі қолданушылары үкіметтен тұрмыстағы зорлық-зомбылыққа қарсы шараларды, заңды қатаңдатуды, жазаны күшейтуді, отбасындағы зорлыққа қылмыстық статус беруді, әлеуметтік қызметтердің қолдау көрсетуін қамтамасыз етуді талап етіп, билікті тез арада шара қабылдауға шақырды.
Abai.kz
