7 қарашада Ұлыбритания 2023 жылғы мамырдан бергі Ресейге қарсы ең үлкен санкция пакетін жариялады. Лондон 56 компания мен жеке тұлғаға санкция салды.
Оған Қазақстанда тіркелген я орналасқан Stanex Group, Kazstanex, Zapchasttrade, Rabadaziya, CPS Energy, Tawkz компаниялары іліккен.
Ұлыбритания санкция тізіміндегі Қытай, Түркия және Орталық Азияда орналасқан кәсіпорындар Украинаға басқыншылық жасаған Ресейдің әскери өнеркәсібіне қажет тауарлар (станок, микроэлектроника және дрон компоненттері) жеткізумен және шығарумен айналысады деп мәлімдеді.
Лондон бұл санкция Украинада заңсыз соғыс жүргізіп жатқан Ресейді маңызды ресурстардан айырып, мүмкіндігін шектейді деді.
АҚШ жақында Kazstanex компаниясына санкция салған. Вашингтонның мәліметінше, Kazstanex Өзбекстандағы бөлімшесі – Uzstanex фирмасымен бірге Ресейге сатуға, жеткізуге тыйым салынған станоктарды Еуропадан алып, қытайлық Shanghai Winsun компаниясы арқылы Ресейге жөнелтіп отырған.
