Кеше Қазақстан Ұлттық Банкі жылдық 15,25% базалық мөлшерлемені өзгертпей сақтау туралы шешім қабылдады. «Бұл инфляциялық қысымды бақылауда ұстау үшін қажет», - деп түсіндірген еді бұл шешімді.

Осыған байланысты ҚР Парламенті Мәжілісінің депутаты, «Ақ жол» демпартиясының төрағасы Азат Перуашев: «Бұл шешім емес, бұл - қорыққаннан басын құмға тығу!», - деп сыни пікірін білдірді.

Азат Перуашев:

– Инфляцияға теңгенің көптігі емес, отандық тауар өндірісінің жетіспеушілігі қысым жасайтыны, оның табиғи салдары ішкі нарықтың импортқа тәуелділігі екені баршаға бұрыннан белгілі. Ал доллардың нығаюы, дәлірек айтсақ, сауда шектеулерінің ауыртпалығынан Қазақстан да зардап шегетін Ресей рублі бағамының төмендеуі (рубльдің теңгеге айырбасталуына және республикада долларды сатып алуға байланысты) әсер етіп отыр.  Салдарынан инфляция теңгені одан әрі құнсыздандырып, қысымға ұшырап жатыр. Бұл санкциялар салдарынан құлдыраған рубльдің экономикамызды да құлдыратып, жерге тыққанынша жалғасады!

Ықтимал шешімдер: рубль/теңге айырбастаудан бас тарту (бірақ бұл экономикалық және саяси себептер бойынша мүмкін емес); немесе – ішкі нарықты отандық тауарлармен толтыра отырып, өз өндірісін ынталандыру.

Бұл жылдам жұмыс емес, сонымен қатар, мұндай базалық мөлшерлемемен бизнес несиелері әлі де шамамен 20%-да тұрады. Ал мұндай пайызбен өндірісті дамыту мүмкін емес.

«Даму» қорының субсидиялары (несиелер құнының айырмашылығын 7-9%-ға дейін жабады) жағдайды сақтай алмайды, өйткені олар шаруашылық жүргізуші субъектілердің 1%-ына ғана барады және іс жүзінде экономиканың құрылымына әсер етпейді. Бұл жағдайда Ұлттық банктің базалық мөлшерлемесін күрт және батыл төмендету әлдеқайда тиімді болар еді. Бірақ Ұлттық банк экономиканы ойламай, мүлде шешім қабылдамаудың себебін іздеуде.

Abai.kz