Өткен аптада АҚШ конгресінде өткен тыңдауда Ақ үй мемлекеттік барлау департаментінің жауаптысы Тулси Габбард Американың 18 барлау органдарының мәліметін қортындылап, Ши Жинпин басшылығындағы Қытайдың экономика, ғылым-техника, әскери салада әлемнің алды болуға барын салып отырғанын жеткізді.

Оның айтуынша қазір Қытай тап болған басты ішкі толғақты мәселе - экономикалық өсімнің баяулауы, егер халық әлеуметтік жағдайға наразы болып, көшеге шықса, ел ішінде тұрақсыздық туындауы мүмкін. Сонымен бірге Қытайдың Америкамен, басқа да шетелдермен экономикалық байланысы барған сайын шиеленісуде. Бұл да экономикалық өсім мен жұмыссыздыққа әсер етуі мүмкін.

Қытай тарабы дипломатикалық жолдар арқылы Трамп билігімен бітімге келіп, екі ел мүддесін реттеуді көздегенмен, Тайуан мәселесін де, Шығыс және Оңтүстік теңіз аймақтарындағы даулы мәселелерге ұстанымын өзгертпек емес. Ең озық қаруларын Үнді-Тынық мұхит аймағына орналастырып жатыр. Ондағы ойы "әскери қақтығыс бола қалған жағдайда, басым орында болуды көздейді" дейді баяндамашы.

Ол сондай-ақ Қытайдың АҚШ-қа кибершабуылды үдеткенін, жартылай өткізгіш жасауға қажетті сирек метеллдарды жеткізуге шектеу қойғанын да атап өтті.

Мәлім болғанындай 2022 жылдан бастап Ресей, Қытай, Иран, Солтүстік Кореяның арақатынасы қоюлана түскен. Оған ең алдымен Кремль мүдделі екен. Путин Ираннан соғысқа қажет дрондар алса, Солтүстік Кореядан қарудан бөлек, Ким Чен Ынның әскерін де соғысқа тартқан. Қытайдың экономикалық қолдауына арқа сүйеген.

Ал Еуроодақтың Сыртқы істерге жауапты өкілі Кая Каллас Еуропаның кезекті киберқауіпсіздік жиынында "Қытай мен Ресей ақпараттық шабуыл арқылы Еуропаның демократиялық жүйесіне үлкен қауіп төндіріп отыр" деп мәлімдеді.

Оның мәліметінше өткен 2024 жылы әлемнің 80 елі мен 200-ден астам органдары кибершабуылға ұшыраған.

Ресейдің ақпараттық шабуылының басты тақырыбы - Украина соғысынан бөлек, Париж олимпиадасы, Молдовадағы сайлау, Германиялық фермерлердің ереуілі болған. Орыс жұмсақ күштері теріс ақпараттар тарату арқылы, адамдардың сеніміне селкем түсіруге тырысқан. Мұндай қитұрқы әрекеттің астарында демократиялы қоғамның тұрақтылығын шайқау, демократиялық жүйені күйрету, мемлекеттер арасына жік салу, сол арқылы Еуропаның халықарадағы рөлін әлсірету мақсаты жатыр екен.

Ресей мен Қытай жымысқы ойларын жүзеге асыру үшін мемлекеттік әрі жеке коммукациялық компанияларға сүйенеді екен. Жалған ақпарларды танымал блогер, үкімет сайттары, қоғам белсенділері арқылы өтірікті шындай, ақсақты тыңдай етіп таратады екен. Екі тараптың Украина туралы тарататын мәліметтері ақылдасып алғандай бірдей шығады екен. Еуропа Украинаның негізгі қолдаушысы болғандықтан Ресейдің басты нысанасына айналған.

Abai.kz