Әл-Фараби атындағы Қазақ ұлттық университеті Заң факультеті қылмыстық құқық қылмыстық іс жүргізу және криминалистика кафедрасы  өзінің инновациялық білім беру бағдарламалары мен ғылыми-зерттеу жұмыстары арқылы еліміздегі маңызды әлеуметтік-экономикалық мәселелерге белсенді түрде үлес қосып келеді.

Бұл жолы кафедраның білім алушыларымен  табиғи ресурстарды тиімді пайдалану, экологиялық мәселелерді шешу және энергия қауіпсіздігін қамтамасыз ету тұрғысынан маңызды тақырып —Тұрақты даму мақсаттарының жетінші бағыты «Қолжетімді және таза энергия», бүкіл әлемдегі адамдарға тұрақты, қымбат емес және экологиялық таза энергия көздерін ұсынуды көздейтінін назарға ала отырып,осы маңызды мәселені талқыладық.

Тұрақты даму мақсаты 7 (ТДМ 7) әлемдік қауымдастықтың ең өзекті мәселелерінің бірі – энергия саласындағы теңгерімділік пен экологиялық тұрақтылықты қамтамасыз ету мақсатында ұсынылды. Бұл мақсатының негізінде әр адам мен қоғамға арзан, сенімді, жаңартылатын және таза энергия көздеріне қолжетімділікті қамтамасыз ету тұр. ТДМ 7 келесі негізгі міндеттерді көздейді:

1) Арзан және сенімді энергия: Халықтың күнделікті қажеттіліктерін қамтамасыз ететін энергия көздерін ұсыну, олардың сенімділігі мен тиімділігін арттыру.

2) Жаңартылатын энергия көздері: Күн, жел, су және геотермалдық энергия сияқты экологиялық таза көздерді кеңінен қолдану арқылы парниктік газдардың шығарындыларын азайту.

3) Энергия тиімділігі: Қазіргі энергия тұтыну үлгілерін оңтайландыру, энергияны үнемдеу және тиімді пайдалану бойынша шараларды жүзеге асыру.

Талқылау барысында білім алушылар әлемдік энергетика секторы көптеген сынақтар мен қиындықтарға тап болып жатқанын да айтып өтті. Дәстүрлі энергия көздеріне тәуелділік климаттық өзгерістерді жеделдетеді, ал энергияның қолжетімділігі мен бағасы әлеуметтік-экономикалық теңсіздікке әкеледі. Осы тұрғыда ТДМ 7 әлемдік және аймақтық деңгейде энергетикалық қауіпсіздік пен тұрақтылықты нығайтуға бағытталған стратегиялар мен шешімдерді іске асыруды қажет ететінін тілге тиек етті. Еліміздегі энергия өндіру саласындағы қазіргі жағдайды сөз етіп, елімізде дәстүрлі энергия көздерінен таза энергияға көшу бойынша атқарылып жатқан жұмыстарға ерекше назар аударды. Қазақстанның энергетикалық саласы әлі де көмір мен мұнайға тәуелді, алайда соңғы жылдары елде жаңартылатын энергия көздерін дамытуға бағытталған маңызды қадамдар жасалды. Студенттер еліміздің энергетикалық секторында қайта жаңғыртылатын энергия көздеріне көшу қажеттілігін атап өтіп, осы салада жаңа бастамалар мен технологияларды енгізу маңызды екенін мәлімдеді. Қазақстанның Үкіметі 2030 жылға қарай жаңартылатын энергия көздерінен алынатын электр энергиясының үлесін 10%-ға жеткізуді жоспарлап отыр. Бұл бағыттағы нақты қадамдар ретінде кафедра  студенттері елімізде жел, күн және су энергиясын пайдалану бойынша жобаларды дамыту, сондай-ақ осы салаларға инвестициялар тарту қажеттігін атап өтті.ТДМ 7 әлемдік энергетикалық саясаттың негізгі бағытын көрсетеді. Таза және қолжетімді энергияны қамтамасыз ету – экологиялық, экономикалық және әлеуметтік тұрақтылықтың кепілі. Еліміздің  осы бағыттағы бастамалары мен жобалары болашақта елдің энергетикалық қауіпсіздігін арттырып, халықтың өмір сүру сапасын жақсартуға зор ықпал етеді.

Темірболат Н.

Әл-Фараби атындағы ҚазҰУ Заң факультеті қылмыстық құқық, қылмыстық іс жүргізу және криминалистика кафедрасының оқытушысы

Abai.kz