Үкімет отырысында цифрландыру вице-министрі Қаныш Төлеушин көптеген қызмет түрі онлайн форматқа ауыстырылғанын айтты.

– Бұрын зейнетақы тағайындау процесі азаматтың тікелей қатысуын талап ететін. Төлем алу үшін түрлі құжат жинап, еңбек өтілін растау қажет болатын. Қағаз жүзінде мәліметтерді өңдеу кешігулерге, кезектерге және зейнетақыны қолмен есептеу кезінде қателік жіберу қаупінің артуына әкелетін. Қазір пилоттық режимде мүлде жаңа тәсіл енгізілді. Жас ерекшелігіне қарай скоринг негізінде жүйе автоматты түрде зейнетақы ісін қалыптастырып, еңбек өтілі туралы деректерді тексереді және азаматтың өтінішінсіз-ақ проактивті түрде төлем тағайындайды, – деді Төлеушин.

Оның айтуынша, бұл қызмет көрсету мерзімін 10 күннен 1 күнге дейін қысқартып, рәсімдік қадамдардың санын азайтуға мүмкіндік берген. Ведомство бұл жобаны Еңбек және халықты әлеуметтік қорғау министрлігіне кеңінен енгізуді ұсынды.

Сонымен қатар жұмыс іздеушілерді тіркеу, оларды жұмысқа орналастыру және асыраушысынан айырылуына байланысты жәрдемақы тағайындау процестері де онлайн форматқа көшірілмек.

2025 жылғы 1 шілдедегі жағдай бойынша Қазақстанда зейнеткерлер саны – 2 млн 489 мың адам. Орташа зейнетақының жиынтық мөлшері – 143 529 теңге. Оның ішінде ортақ (солидарлы) зейнетақы – 95 912 теңге, базалық зейнетақы – 47 617 теңге. Жуырда зейнетақы жинақтарының көлемі 24 триллион теңгеден асқаны белгілі болды.

Abai.kz