ۇكىمەت وتىرىسىندا تسيفرلاندىرۋ ۆيتسە-ءمينيسترى قانىش تولەۋشين كوپتەگەن قىزمەت ءتۇرى ونلاين فورماتقا اۋىستىرىلعانىن ايتتى.

– بۇرىن زەينەتاقى تاعايىنداۋ پروتسەسى ازاماتتىڭ تىكەلەي قاتىسۋىن تالاپ ەتەتىن. تولەم الۋ ءۇشىن ءتۇرلى قۇجات جيناپ، ەڭبەك ءوتىلىن راستاۋ قاجەت بولاتىن. قاعاز جۇزىندە مالىمەتتەردى وڭدەۋ كەشىگۋلەرگە، كەزەكتەرگە جانە زەينەتاقىنى قولمەن ەسەپتەۋ كەزىندە قاتەلىك جىبەرۋ قاۋپىنىڭ ارتۋىنا اكەلەتىن. قازىر پيلوتتىق رەجيمدە مۇلدە جاڭا ءتاسىل ەنگىزىلدى. جاس ەرەكشەلىگىنە قاراي سكورينگ نەگىزىندە جۇيە اۆتوماتتى تۇردە زەينەتاقى ءىسىن قالىپتاستىرىپ، ەڭبەك ءوتىلى تۋرالى دەرەكتەردى تەكسەرەدى جانە ازاماتتىڭ ءوتىنىشىنسىز-اق پرواكتيۆتى تۇردە تولەم تاعايىندايدى، – دەدى تولەۋشين.

ونىڭ ايتۋىنشا، بۇل قىزمەت كورسەتۋ مەرزىمىن 10 كۇننەن 1 كۇنگە دەيىن قىسقارتىپ، راسىمدىك قادامداردىڭ سانىن ازايتۋعا مۇمكىندىك بەرگەن. ۆەدومستۆو بۇل جوبانى ەڭبەك جانە حالىقتى الەۋمەتتىك قورعاۋ مينيسترلىگىنە كەڭىنەن ەنگىزۋدى ۇسىندى.

سونىمەن قاتار جۇمىس ىزدەۋشىلەردى تىركەۋ، ولاردى جۇمىسقا ورنالاستىرۋ جانە اسىراۋشىسىنان ايىرىلۋىنا بايلانىستى جاردەماقى تاعايىنداۋ پروتسەستەرى دە ونلاين فورماتقا كوشىرىلمەك.

2025 جىلعى 1 شىلدەدەگى جاعداي بويىنشا قازاقستاندا زەينەتكەرلەر سانى – 2 ملن 489 مىڭ ادام. ورتاشا زەينەتاقىنىڭ جيىنتىق مولشەرى – 143 529 تەڭگە. ونىڭ ىشىندە ورتاق (سوليدارلى) زەينەتاقى – 95 912 تەڭگە، بازالىق زەينەتاقى – 47 617 تەڭگە. جۋىردا زەينەتاقى جيناقتارىنىڭ كولەمى 24 تريلليون تەڭگەدەن اسقانى بەلگىلى بولدى.

Abai.kz