"Жібек жолы Медиа" агенттігінің Тяньцзиньнен хабарлауынша, тамыздың 30-ы күні кешке Қытай Халық Республикасының Төрағасы Си Цзиньпин Тяньцзинь қаласындағы Қонақүй сарайында Қытайға ШЫҰ-ның 2025 жылғы саммитіне және Қытай халқының Жапон агрессиясына қарсы соғысындағы әрі Екінші дүниежүзілік соғыстағы фашизмге қарсы жеңістің 80 жылдығына арналған іс-шараларға қатысуға келген Қазақстан Президенті Қасым-Жомарт Тоқаевпен кездесті.

Си Цзиньпин Қытай мен Қазақстанның өзара сенім артып, иек арта алатын стратегиялық әріптестер екенін атап өтті. Халықаралық ахуал қалай өзгерсе де, екі ел әрқашан тату көршілік пен достықтың басты бағытын берік ұстанып, ашықтық пен ортақ ұтыстың негізгі қағидатынан айнымай, ортақ тағдыр қауымдастығын құрудың басты бағытын бұлжытпай жалғастыруы қажет. Сондай-ақ, тараптар бір-бірінің негізгі мүдделері мен аса маңызды мәселелерінде нық қолдау көрсетіп, жан-жақты ынтымақтастықты бекемдеп, кеңейтіп, Қытай–Қазақстан қатынастарының жаңа белестерге көтерілуіне серпін беруі тиіс екенін айтты.

Си Цзиньпин екі елдің даму стратегияларын ұштастыруды күшейту, өзара тиімді ынтымақтастықтың жаңа тетіктері мен өсу нүктелерін табуды; энергетикалық әріптестікті нығайтып, өзара байланыс пен инфрақұрылымдық «қатты жалғасуды» ілгерілетуді, саясат пен механизм саласындағы «жұмсақ жалғасуды» тереңдетуді; халықтар арасындағы өзара түсіністі нығайтып, «Қытай–Қазақстан мәдени алмасу жылын» табысты өткізуді; көпжақты ынтымақтастықты арттырып, ШЫҰ-ны іс жүзінде күшейтуді, БҰҰ-ды өзек еткен халықаралық жүйені бірлесе қорғап, халықаралық тәртіптің әділетті әрі қисынды бағытта дамуына үлес қосуды баса айтты.

Тоқаев өз кезегінде Қытайдың ШЫҰ-ға төрағалығы нәтижелі болғанын атап өтіп, Қазақстан осы ұйымның барлық күн тәртібіне белсене қатысқанын және алдағы саммиттің сәтті өтуі үшін Қытаймен тығыз ынтымақтасуға әзір екенін жеткізді. Ол Қытай халқын Жапон агрессиясына қарсы соғыстағы жеңістің 80 жылдығымен құттықтап, Қытай халқы әлемдік фашизмге қарсы жеңіске тарихи үлес қосқанын, ерекше ерлік пен отансүйгіштік танытқанын айтты. Тоқаев Қытай мен Қазақстан қарым-қатынастары бұрын-соңды болмаған жоғары деңгейге жеткенін, былтыр екіжақты сауда көлемі тарихи рекорд жаңартқанын, ірі жобалар қарқынды дамып жатқанын атап өтті. Қазақстан Қытаймен практикалық ынтымақтастықты тереңдетуге, мәдени-гуманитарлық байланыстарды нығайтуға және екіжақты қатынастарды жаңа деңгейге көтеруге мүдделі екенін білдірді.

Кездесу барысында екі ел басшылары даму стратегияларын ұштастыру, энергетика, ғылым мен техника, тұрғын үй құрылысы, білім, спорт, жабайы жануарларды қорғау сияқты салаларға қатысты 20-дан астам екіжақты құжаттарға қол қойылғанын жариялауға және Қазақстанда екі жаңа «Лу бан шеберханасының» ашылуына куә болды.

Abai.kz