"جىبەك جولى مەديا" اگەنتتىگىنىڭ تيانتسزيننەن حابارلاۋىنشا، تامىزدىڭ 30-ى كۇنى كەشكە قىتاي حالىق رەسپۋبليكاسىنىڭ توراعاسى سي تسزينپين تيانتسزين قالاسىنداعى قوناقۇي سارايىندا قىتايعا شىۇ-نىڭ 2025 جىلعى سامميتىنە جانە قىتاي حالقىنىڭ جاپون اگرەسسياسىنا قارسى سوعىسىنداعى ءارى ەكىنشى دۇنيەجۇزىلىك سوعىستاعى فاشيزمگە قارسى جەڭىستىڭ 80 جىلدىعىنا ارنالعان ءىس-شارالارعا قاتىسۋعا كەلگەن قازاقستان پرەزيدەنتى قاسىم-جومارت توقاەۆپەن كەزدەستى.

سي تسزينپين قىتاي مەن قازاقستاننىڭ ءوزارا سەنىم ارتىپ، يەك ارتا الاتىن ستراتەگيالىق ارىپتەستەر ەكەنىن اتاپ ءوتتى. حالىقارالىق احۋال قالاي وزگەرسە دە، ەكى ەل ارقاشان تاتۋ كورشىلىك پەن دوستىقتىڭ باستى باعىتىن بەرىك ۇستانىپ، اشىقتىق پەن ورتاق ۇتىستىڭ نەگىزگى قاعيداتىنان اينىماي، ورتاق تاعدىر قاۋىمداستىعىن قۇرۋدىڭ باستى باعىتىن بۇلجىتپاي جالعاستىرۋى قاجەت. سونداي-اق، تاراپتار ءبىر-ءبىرىنىڭ نەگىزگى مۇددەلەرى مەن اسا ماڭىزدى ماسەلەلەرىندە نىق قولداۋ كورسەتىپ، جان-جاقتى ىنتىماقتاستىقتى بەكەمدەپ، كەڭەيتىپ، قىتاي–قازاقستان قاتىناستارىنىڭ جاڭا بەلەستەرگە كوتەرىلۋىنە سەرپىن بەرۋى ءتيىس ەكەنىن ايتتى.

سي تسزينپين ەكى ەلدىڭ دامۋ ستراتەگيالارىن ۇشتاستىرۋدى كۇشەيتۋ، ءوزارا ءتيىمدى ىنتىماقتاستىقتىڭ جاڭا تەتىكتەرى مەن ءوسۋ نۇكتەلەرىن تابۋدى; ەنەرگەتيكالىق ارىپتەستىكتى نىعايتىپ، ءوزارا بايلانىس پەن ينفراقۇرىلىمدىق «قاتتى جالعاسۋدى» ىلگەرىلەتۋدى، ساياسات پەن مەحانيزم سالاسىنداعى «جۇمساق جالعاسۋدى» تەرەڭدەتۋدى; حالىقتار اراسىنداعى ءوزارا ءتۇسىنىستى نىعايتىپ، «قىتاي–قازاقستان مادەني الماسۋ جىلىن» تابىستى وتكىزۋدى; كوپجاقتى ىنتىماقتاستىقتى ارتتىرىپ، شىۇ-نى ءىس جۇزىندە كۇشەيتۋدى، بۇۇ-دى وزەك ەتكەن حالىقارالىق جۇيەنى بىرلەسە قورعاپ، حالىقارالىق ءتارتىپتىڭ ادىلەتتى ءارى قيسىندى باعىتتا دامۋىنا ۇلەس قوسۋدى باسا ايتتى.

توقاەۆ ءوز كەزەگىندە قىتايدىڭ شىۇ-عا توراعالىعى ناتيجەلى بولعانىن اتاپ ءوتىپ، قازاقستان وسى ۇيىمنىڭ بارلىق كۇن تارتىبىنە بەلسەنە قاتىسقانىن جانە الداعى ءسامميتتىڭ ءساتتى ءوتۋى ءۇشىن قىتايمەن تىعىز ىنتىماقتاسۋعا ءازىر ەكەنىن جەتكىزدى. ول قىتاي حالقىن جاپون اگرەسسياسىنا قارسى سوعىستاعى جەڭىستىڭ 80 جىلدىعىمەن قۇتتىقتاپ، قىتاي حالقى الەمدىك فاشيزمگە قارسى جەڭىسكە تاريحي ۇلەس قوسقانىن، ەرەكشە ەرلىك پەن وتانسۇيگىشتىك تانىتقانىن ايتتى. توقاەۆ قىتاي مەن قازاقستان قارىم-قاتىناستارى بۇرىن-سوڭدى بولماعان جوعارى دەڭگەيگە جەتكەنىن، بىلتىر ەكىجاقتى ساۋدا كولەمى تاريحي رەكورد جاڭارتقانىن، ءىرى جوبالار قارقىندى دامىپ جاتقانىن اتاپ ءوتتى. قازاقستان قىتايمەن پراكتيكالىق ىنتىماقتاستىقتى تەرەڭدەتۋگە، مادەني-گۋمانيتارلىق بايلانىستاردى نىعايتۋعا جانە ەكىجاقتى قاتىناستاردى جاڭا دەڭگەيگە كوتەرۋگە مۇددەلى ەكەنىن ءبىلدىردى.

كەزدەسۋ بارىسىندا ەكى ەل باسشىلارى دامۋ ستراتەگيالارىن ۇشتاستىرۋ، ەنەرگەتيكا، عىلىم مەن تەحنيكا، تۇرعىن ءۇي قۇرىلىسى، ءبىلىم، سپورت، جابايى جانۋارلاردى قورعاۋ سياقتى سالالارعا قاتىستى 20-دان استام ەكىجاقتى قۇجاتتارعا قول قويىلعانىن جاريالاۋعا جانە قازاقستاندا ەكى جاڭا «لۋ بان شەبەرحاناسىنىڭ» اشىلۋىنا كۋا بولدى.

Abai.kz