Ауғанстан мен Пәкістан – екі мұсылман ел өткен бейсенбі күні Түркияның Ыстамбұл қаласында 19 қазанда Катарда қол жеткізілген атысты тоқтату келісімін ұзарту үшін кездесті.

Дегенмен Пәкістан Сыртқы істер министрлігі жексенбі күні мәлімдеме жасап, келіссөздердің жұма күні аяқталғанын хабарлады.

Сыртқы істер министрлігі: «Талибан» режимі біздің Ауғанстан территориясын Пәкістанға қарсы шабуылдар жасау үшін пайдаланбау туралы негізгі талабымызға жауап бермеді, сонымен қатар нақты жауапкершіліктен жалтаруға тырысты», - деп айыптады.

Мәлімдемеде сондай-ақ «Талибан режимі тек уақытша атысты тоқтату келісімін ұзартқысы келетіні» атап өтілді.

Талибан үкіметінің баспасөз хатшысы Забихулла Муджахид сенбі күні: «Келіссөздер барысында Пәкістан тарапы барлық қауіпсіздік жауапкершілігін Ауғанстан үкіметіне аударуға әрекеттенді», - деп айыптады.

Ол келіссөздердің сәтсіз аяқталуына жауапкершілік толығымен Пәкістанға жүктелетінін ашық айтты.

Пәкістан Сыртқы істер министрлігі: «Пәкістан екіжақты дауларды диалог арқылы шешуге ұмтылады, бірақ Пәкістан үшін басты мәселе – Ауғанстаннан келетін терроризм қаупі бірінші кезекте шешілуі керек», - деп мәлімдеді.

Талибан үкіметі «шабуылға ұшыраған кезде өзін-өзі қорғау құқығы бар екенін» мәлімдеп, атысты тоқтату келісімі «өз күшінде қалады» деп сендірді.

Біріккен Ұлттар Ұйымының мәліметі бойынша, қазан айындағы қақтығыс 70-тен астам адамның өмірін қиды, оның ішінде 50-ге жуығы ауғандық бейбіт тұрғын.

Исламабад көршілес Ауғанстаннан қарулы топтарға, әсіресе Пәкістан Талибанына (ТТП) қолдау көрсетуді тоқтатуға кепілдік беруін талап етеді.

Кабул ТТП-ға қолдау білдіріп отырғанын жоққа шығарып, керісінше Пәкістанды аймақтағы «Ислам мемлекеті» (ISIS) ұйымын қаржыландырып отыр деп айыптайды.

Қазан айында Кабулда жарылыс болып, Талибан үкіметі оған Пәкістанды айыптап, шекара қорғаныс күштеріне шабуыл жасады.

Пәкістанның қорғаныс министрі Ходжа Асиф қақтығыстан кейін: «Пәкістан ядролық держава ретінде Талибан режимін толығымен жойып, арсеналының аз ғана бөлігімен оларды үңгірлеріне қайта қуып тыға алады», - деп мәлімдеген еді.

Оған жауап ретінде Талибанның ішкі істер министрі Сиражуддин Хаккани: «Біз мұсылманбыз, бауырлармыз, көршіміз, бірақ кейбір адамдар (Пәкістанда) әдейі немесе байқаусызда отпен ойнап, соғыс ашып жатыр», - деді.

Ол ауған халқының «соғысты қаламайтынын» атап көрсетті, бірақ «ұлттық аумақты қорғау» Талибан үшін «басымдықтардың бірі» екенін қайталады.

Жексенбі күні Түркия президенті Ердоған келіссөздер «қазіргі уақытта дұрыс бағытта жүріп жатыр» деп мәлімдеді.

Ол журналистерге: «Оң нәтижеге сенеміз», - деді. Ол сондай-ақ түрік министрлерінің осы аптада Исламабадқа баруы мүмкін екенін айтты.

Abai.kz