Қазіргі заманда сенім қол қойылған келісімшарттан да қымбат. Әсіресе, оны жүздеген мың адам қарайтын блогер айтса. Бір видео — жай ғана контент емес. Ол — бағыт. Ұсыныс. Ықпал. Ал кейде — шешім.

Әлеуметтік желі тағы да сот залымен түйісті. Бұл жолы мәселе — заңсыз құрылыс пен блогер жарнамасы төңірегінде.

EGOV.PRESS  телеграм арнасының жазуынша: «Жүздеген мың жазылушысы бар инфлюенсердің жарнамасынан кейін 64 адам қаржысынан айырылған. Тергеу материалдары бұл істің ауқымы әлдеқайда кең екенін көрсетеді».

Сурет: Телеграм скрині.

Кейбір дереккөздерге сәйкес, Қазақстан Республикасының Қаржы мониторингі агенттігі блогер Асхат Ниязовты заңсыз салынған тұрғын үй кешенін жарнамалағаны үшін әкімшілік жауапкершілікке тартқан. Оған 137 000 теңге айыппұл салынған, ал жарнама үшін ол 6 миллион теңге алған делінеді. Құрылысшылар қазіргі уақытта тергеу изоляторында.

Мәселенің ресми жағын нақтылау үшін біз Қаржы мониторингі агенттігіне сұрау салдық.. Агенттік біздің сауалымызға жауап берді.

ҚМА жауабы:

«Қаржы мониторингі агенттігінің мәліметінше, 361 000-нан астам жазылушысы бар блогер және «Обожаю» YouTube арнасының иесі Асхат Ниязов заңсыз үлестік құрылыс жобаларын насихаттағаны үшін әкімшілік құқық бұзушылық жасады деп айыпталған.

Тергеу барысында құрылыс салушы Dala SK Construction LLC компаниясының еншілес компаниясы мен «Обожаю» жеке кәсіпкері арасында 6 миллион теңгеге жарнама қызметтері туралы келісім жасалғаны анықталған.

Агенттік өкілдерінің сөзінше, блогер құрылыстың заңдылығын тексермеген, рұқсат сұрамаған және жарнамаланған жобалардың заңды мәртебесін белгілемеген. Жарияланған бейнежазбаларда жобалар заңды және сенімді ретінде жарнамаланған, әлеуетті инвесторларды адастырған.

Нәтижесінде, Абай ауданы бойынша қаржылық мониторинг департаментінің материалдарына сүйене отырып, жергілікті атқарушы орган А.С. Ниязовқа ҚР Әкімшілік құқық бұзушылық туралы кодексінің 455-бабының 2-бөлігінің 8-тармағы бойынша айып таққан. Айыппұл толық төленген.

Сонымен қатар Қаржы мониторингі агенттігінің Абай аймақтық департаменті азаматтардан үлестік құрылыс желеуімен заңсыз қаражат сұраған «Dala SK Construction» ЖШС мен бірнеше еншілес компаниялардың басшылығына қатысты тергеуді аяқтағанын мәлімдеді. Тергеу деректеріне сәйкес, екі жыл бойы компания басшылығы қажетті рұқсатсыз тұрғын үй кешендерін салған.

Азаматтардан қаражат тарту үшін онлайн ресурстарда нарықтық бағадан төмен және пайызсыз бөліп төлеу шарттарымен пәтерлер ұсынылған. Нәтижесінде 64 үлескерден заңсыз жиналған қаражаттың жалпы сомасы 1 миллиард теңгеден асқан», - дейді

Бұл іс тек бір әкімшілік хаттамамен өлшенетін мәселе емес. Бұл — цифрлық дәуірдегі ықпал мен жауапкершіліктің салмағы туралы оқиға. Бір тарап тергеу изоляторында отыр. Екінші тарап айыппұл төлеп шықты. Ал үшінші тарап — жинаған қаражатынан айырылған ондаған отбасы.

Әлеуметтік желіде айтылған бір сөз кейде жарнама ғана емес. Ол — шешім қабылдауға түрткі. Ал сол шешімнің құны миллиардқа жетсе, қоғам жауапкершілік туралы сұрақты міндетті түрде қояды.

Abai.kz