قازىرگى زاماندا سەنىم قول قويىلعان كەلىسىمشارتتان دا قىمبات. اسىرەسە، ونى جۇزدەگەن مىڭ ادام قارايتىن بلوگەر ايتسا. ءبىر ۆيدەو — جاي عانا كونتەنت ەمەس. ول — باعىت. ۇسىنىس. ىقپال. ال كەيدە — شەشىم.

الەۋمەتتىك جەلى تاعى دا سوت زالىمەن ءتۇيىستى. بۇل جولى ماسەلە — زاڭسىز قۇرىلىس پەن بلوگەر جارناماسى توڭىرەگىندە.

EGOV.PRESS  تەلەگرام ارناسىنىڭ جازۋىنشا: «جۇزدەگەن مىڭ جازىلۋشىسى بار ينفليۋەنسەردىڭ جارناماسىنان كەيىن 64 ادام قارجىسىنان ايىرىلعان. تەرگەۋ ماتەريالدارى بۇل ءىستىڭ اۋقىمى الدەقايدا كەڭ ەكەنىن كورسەتەدى».

سۋرەت: تەلەگرام سكرينى.

كەيبىر دەرەككوزدەرگە سايكەس، قازاقستان رەسپۋبليكاسىنىڭ قارجى مونيتورينگى اگەنتتىگى بلوگەر اسحات نيازوۆتى زاڭسىز سالىنعان تۇرعىن ءۇي كەشەنىن جارنامالاعانى ءۇشىن اكىمشىلىك جاۋاپكەرشىلىككە تارتقان. وعان 137 000 تەڭگە ايىپپۇل سالىنعان، ال جارناما ءۇشىن ول 6 ميلليون تەڭگە العان دەلىنەدى. قۇرىلىسشىلار قازىرگى ۋاقىتتا تەرگەۋ يزولياتورىندا.

ماسەلەنىڭ رەسمي جاعىن ناقتىلاۋ ءۇشىن ءبىز قارجى مونيتورينگى اگەنتتىگىنە سۇراۋ سالدىق.. اگەنتتىك ءبىزدىڭ ساۋالىمىزعا جاۋاپ بەردى.

قما جاۋابى:

«قارجى مونيتورينگى اگەنتتىگىنىڭ مالىمەتىنشە، 361 000-نان استام جازىلۋشىسى بار بلوگەر جانە «وبوجايۋ» YouTube ارناسىنىڭ يەسى اسحات نيازوۆ زاڭسىز ۇلەستىك قۇرىلىس جوبالارىن ناسيحاتتاعانى ءۇشىن اكىمشىلىك قۇقىق بۇزۋشىلىق جاسادى دەپ ايىپتالعان.

تەرگەۋ بارىسىندا قۇرىلىس سالۋشى Dala SK Construction LLC كومپانياسىنىڭ ەنشىلەس كومپانياسى مەن «وبوجايۋ» جەكە كاسىپكەرى اراسىندا 6 ميلليون تەڭگەگە جارناما قىزمەتتەرى تۋرالى كەلىسىم جاسالعانى انىقتالعان.

اگەنتتىك وكىلدەرىنىڭ سوزىنشە، بلوگەر قۇرىلىستىڭ زاڭدىلىعىن تەكسەرمەگەن، رۇقسات سۇراماعان جانە جارنامالانعان جوبالاردىڭ زاڭدى مارتەبەسىن بەلگىلەمەگەن. جاريالانعان بەينەجازبالاردا جوبالار زاڭدى جانە سەنىمدى رەتىندە جارنامالانعان، الەۋەتتى ينۆەستورلاردى اداستىرعان.

ناتيجەسىندە، اباي اۋدانى بويىنشا قارجىلىق مونيتورينگ دەپارتامەنتىنىڭ ماتەريالدارىنا سۇيەنە وتىرىپ، جەرگىلىكتى اتقارۋشى ورگان ا.س. نيازوۆقا قر اكىمشىلىك قۇقىق بۇزۋشىلىق تۋرالى كودەكسىنىڭ 455-بابىنىڭ 2-بولىگىنىڭ 8-تارماعى بويىنشا ايىپ تاققان. ايىپپۇل تولىق تولەنگەن.

سونىمەن قاتار قارجى مونيتورينگى اگەنتتىگىنىڭ اباي ايماقتىق دەپارتامەنتى ازاماتتاردان ۇلەستىك قۇرىلىس جەلەۋىمەن زاڭسىز قاراجات سۇراعان «Dala SK Construction» جشس مەن بىرنەشە ەنشىلەس كومپانيالاردىڭ باسشىلىعىنا قاتىستى تەرگەۋدى اياقتاعانىن مالىمدەدى. تەرگەۋ دەرەكتەرىنە سايكەس، ەكى جىل بويى كومپانيا باسشىلىعى قاجەتتى رۇقساتسىز تۇرعىن ءۇي كەشەندەرىن سالعان.

ازاماتتاردان قاراجات تارتۋ ءۇشىن ونلاين رەسۋرستاردا نارىقتىق باعادان تومەن جانە پايىزسىز ءبولىپ تولەۋ شارتتارىمەن پاتەرلەر ۇسىنىلعان. ناتيجەسىندە 64 ۇلەسكەردەن زاڭسىز جينالعان قاراجاتتىڭ جالپى سوماسى 1 ميلليارد تەڭگەدەن اسقان»، - دەيدى

بۇل ءىس تەك ءبىر اكىمشىلىك حاتتامامەن ولشەنەتىن ماسەلە ەمەس. بۇل — تسيفرلىق داۋىردەگى ىقپال مەن جاۋاپكەرشىلىكتىڭ سالماعى تۋرالى وقيعا. ءبىر تاراپ تەرگەۋ يزولياتورىندا وتىر. ەكىنشى تاراپ ايىپپۇل تولەپ شىقتى. ال ءۇشىنشى تاراپ — جيناعان قاراجاتىنان ايىرىلعان ونداعان وتباسى.

الەۋمەتتىك جەلىدە ايتىلعان ءبىر ءسوز كەيدە جارناما عانا ەمەس. ول — شەشىم قابىلداۋعا تۇرتكى. ال سول شەشىمنىڭ قۇنى ميللياردقا جەتسە، قوعام جاۋاپكەرشىلىك تۋرالى سۇراقتى مىندەتتى تۇردە قويادى.

Abai.kz