Корея Республикасының Президенті Ли Чжэ Мён Қасым-Жомарт Тоқаевқа және Қазақстанның Ұлттық қауіпсіздік комитетіне алаяқтық жасады деген күдікке ілінген Оңтүстік Корея азаматтарын ұстауға және отанына қайтаруға көмектескені үшін алғыс айтты.

Сөз 23 шілдеде Қазақстанда ҰҚК тарапынан ұсталған Корея Республикасының 14 азаматы туралы болып отыр. Комитеттің мәліметінше, оларға отанында телекоммуникация жүйелерін пайдалану арқылы ұйымдасқан қылмыстық топ құрамында алаяқтық жасады деген айып тағылып, іздеу жарияланған.

Ли Чжэ Мённың хабарлауынша, күдіктілер Қазақстанға Камбоджа мен Вьетнам арқылы келіп, Оңтүстік Корея азаматтарына қатысты дауыстық фишингпен (voice phishing) айналысқан. Ұсталғаннан кейін шамамен екі апта өткен соң олар отанына қайтарылды, қазіргі уақытта полиция тергеу жүргізіп жатыр.

«Ұстаудан бастап елге қайтаруға дейінгі бүкіл процесті осыншалықты жылдам жүргізу Қазақстан Президенті Тоқаев пен Қазақстанның Ұлттық қауіпсіздік комитетінің белсенді қолдауы мен ынтымақтастығының арқасында мүмкін болды», - деп жазды Ли Чжэ Мён X әлеуметтік желісінде.

Тінту барысында ұсталғандардан заңсыз әрекеттерде пайдаланылды деген болжаммен компьютерлік техника, ноутбуктер мен ұялы телефондар тәркіленді.

Сонымен қатар, Оңтүстік Корея Президенті алдағы «Корея - Орталық Азия» саммиті шеңберінде Қасым-Жомарт Тоқаевпен кездесетініне үміт білдірді.

Abai.kz